ދިވެހިރާއްޖެއިން އިންޑިއާއަށް ކަނޑައެޅުއްވި ފުރަތަމަ އަންހެން ސަފީރު އާއިޝަތު މުޙައްމަދު ދީދީ، އެ ކަމަނާގެ ސަފީރުކަމުގެ ފަތްކޮޅު އިންޑިއާގެ ރައީސް ރާމް ނާތު ކޯވިންދްއަށް އަރުއްވައިފިއެވެ.
އެކަމަނާގެ ސަފީރުކަމުގެ ފަތްކޮޅު އިންޑިއާ ގެ ރައީސްއަށް އެރުވީ ހުކުރު ދުވަހު އިންޑިއާގެ ރައީސްގެ ގަނޑުވަރު ކަމުގައިވާ "ރަޝްތްރަޕަތީ ބަވަން" ގައި އޮތް ހާއްސަ ރަސްމިއްޔާތެއްގައެވެ. މި ރަސްމިއްޔާތަށްފަހު އިންޑިއާ ގެ ރައީސް ކޯވިންދް، އެ ކަމަނާއާ ބައްދަލުކުރައްވައި މަރުޙަބާ ވިދާޅުވިއެވެ. އަދި ރާއްޖޭގެ ރައީސުލްޖުމްހޫރިއްޔާގެ އިތުރުން ސަރުކާރަށާއި ދިވެހިންނަށް ވެސް އުފާފާގަތިކަން ލިބުމަށް އެދޭކަމަށް ވިދާޅުވިއެވެ.
މި ބައްދަލުކުރެއްވުމުގައި ސަފީރު ދެއްކެވި ވާހަކަފުޅުގައި ދިވެހިރާއްޖޭގެ ތަރައްޤީއަށް އިންޑިއާ އިން ދެމުންގެންދާ ގިނަގުނަ އެހީތަކަށް ޝުކުރުއަދާ ކުރައްވައި، އެ ކަމަނާގެ ސަފީރުކަމުގައި ކުރިއަށް އޮތް ދުވަސްތަކުގައި ދެ ޤައުމުގެ ގުޅުން އިތުރަށް ބަދަހިކުރެއްވުމަށް މަސައްކަތްޕުޅު ކުރައްވާނެކަމުގެ ޔަޤީންކަން އެރުވިއެވެ.
އާއިޝަތު މުޙައްމަދު ދީދީ އަކީ 1 ނޮވެމްބަރު 1965 ގައި އިންޑިއާ އާއި ދިވެހިރާއްޖެއާ ދެމެދު ސިޔާސީ ގުޅުން ޤާއިމްކުރުމަށްފަހު، އިންޑިއާގައި ރާއްޖެ ތަމްސީލް ކުރެއްވުމަށް ކަނޑައެޅުއްވި 5 ވަނަ ސަފީރެވެ.
