ސައުދީ އޮފިޝަލުންތަކެއް ދުރާލާ ރާވާއިގެން ޙަޝޯގީ މަރާލިކަމުގެ ހެކި އެބަހުރި: އ.ދ
ޙަޝޯގީ މަރާލަން ރޭވީ ވެސް އަމަލީ ގޮތުން ބައިވެރިވީ ވެސް ސައުދީ އޮފިޝަލުންތަކެއް
ތުރުކީގައި ހުންނަ ސައުދީ އެމްބަސީގެ ދޮރާށި
ސައުދީ ނޫސްވެރިޔާ ޖަމާލް ޙަޝޯގީ މަރާލީ ދުރާލާ ރާވައިގެން ކަމުގެ ހެކި އެބަހުރި ކަމަށާއި، އޭނާ މަރާލީ ސައުދީ އޮފިޝަލުންތަކެއް ކަމަށް އދ.އިން ހާމަކޮށްފިއެވެ.
ޙަޝޯގީ މަރާލެވުނު ގޮތް ހޯދަން އދ.ން އިސްނަގައިގެން ކުރި ތަހުގީގަށް ފަހު، އދ.ގެ ސްޕެޝަލް ރެޕަޓުއަރ ފޯރ އެކްސްޓްރާ ޖުޑީޝަލް ކިލިންގސް އޯރ އަރބިޓްރަރީ އެކްސިކިއުޝަންސް އެގްނިސް ކަލަމަރޑް ވިދާޅުވީ، އޭނާ ތުރުކީއަށް ކުރި ދަތުރުގައި ލިބުނު ހެކީގެ އަލީގައި ބުނެވޭނީ ޙަޝޯގީއަކީ ދުރާލާ ރާވައިގެން ހިންގި ޖަރީމާއެއްގައި ފުރާނަ ގެއްލުނު ފަރާތެއް ކަމަށެވެ. މިކަންތައް ރޭވީ ވެސް އަދި މި ކަމުގައި އަމަލީ ގޮތުން ބައިވެރިވީ ވެސް ސައުދީ އޮފިޝަލުންތަކެއް ކަމަށް ކަލަމަރޑް ވިދާޅުވިއެވެ.
ކަލަމަރޑް ވިދާޅުވީ ފުރަތަމަ ގަސްދުކުރީ ރަހީނުކުރަން ކަމެއް ނުވަތަ ރަހީނުނުކުރެވިއްޖެ ހާލަތެއްގައި މަރާލަން ކަމެއް ތަހުގީގުން ކަނޑައެޅިފައި ނުވާކަމަށެވެ. އޭނާ ވަނީ ސައުދީ ސަރުކާރުން މި މައްސަލަ ތަހުގީގު ކުރުމަށް ތުރުކީ ސަރުކާރަށް އެއްވެސް އެއްބާރުލުމެއް ނުދޭ ކަމަށް ވިދާޅުވެފައެވެ. އަދި މިކަމާއި ގުޅިގެން މައްސަލައާއި ގުޅޭ އެތައް ފޮރެންސިކް ހެކިތަކެއް ހޯދުމަށް ތުރުކީގެ ކަމާއިބެހެ ފަރާތްތަކަށް ހުރަސްއެޅުނު ކަމަށް ވެސް ކަލަމަރޑް ވިދާޅުވިއެވެ.
ސައުދީން ތުރުކީގައި ހުންނަ އެ ގައުމުގެ އެމްބަސީ ތެރޭގައި ޙަޝޯގީ މަރާލެވުނު ކަމަށް އެއްބަސްވުމަށް ފަހު ވެސް، މައްސަލައިގެ ތަހުގީގަށް އެއްވެސް އެއްބާރުލުމެއް ދީފައި ނުވާތީ ކަލަމަރޑް ކަންބޮޑުވުން ފާޅުކުރެއްވިއެވެ. އަދި މައްސަލައިގައި ސައުދީން ދައުވާ ކުރަން ނިންމާފައިވާ 11 މީހުންނަށް ދެފުށްފެންނަ ހަމަހަމަ ޝަރީއަތެއް ލިބިދާނެ ކަމާއި މެދު ކަލަމަރޑް ޝައްކު އުފެއްދެވިއެވެ.
ކަލަމަރޑްގެ ތަހުގީގު ފުރިހަމަ ކުރުމަށް ފަހު އެއްމެ ފަހުގެ ރިޕޯޓް އދ.ގެ އިންސާނީ ހައްގުތަކާއި ބެހޭ ކައުންސިލަށް ހުށައަޅަން ހަމަޖެހިފައި ވަނީ އަންނަ ޖޫން މަހުގެ ތެރޭގައެވެ. ކަލަމަރޑްގެ ރިޕޯޓްގައި ޖިނާއީ ގޮތުން މައްސަލައިގެ ޒިންމާ ނަގަން ޖެހޭނެ ފަރާތްތަށް ވެސް ހިމެނިގެން ދާނެއެވެ.
ޙަޝޯގީގެ މަރުގެ މައްސަލައާއި ގުޅިގެން ވަލީ އަހުދު މުހައްމަދު ބިން ސަލްމާންގެ އިސްތަށިފުޅުގައި ޙަޝޯގީ މަރާލަން އަމުރުކުރެއްވި ކަމަށް ތުހުމަތު ކުރެއްވި ކަމުގައިވީ ނަމަވެސް، ސައުދީ ސަރުކާރުން ތަކުރާރުކޮށް ބުނެފައިވަނީ ޙަޝޯގީ މަރާލުމުގައި ވަލީއަހުދުގެ އެއްވެސް އަތެއް ނޯންނާނެ ކަމަށެވެ.
