ކުރިއަށް އޮތް ހަފްތާގައި މިނިމަމްވޭޖް ބޯޑު ރަސްމީކޮށް އިފްތިތާހު ކުރެވިގެންދާނެ: ފައްޔާޒު
މިނިމަމްވޭޖް ބޯޑްގެ މަސައްކަތް ކުރިއަށްދާނެ ގޮތް އާންމު ކުރެވިގެންދާނެ
އިކޮނޮމިކް މިނިސްޓަރ ފައްޔާޒު އިސްމާއީލް
ކުރިއަށް އޮތް ހަފްތާގައި މިނިމަމްވޭޖް ބޯޑު ރަސްމީކޮށް އިފްތިތާހު ކުރެވިގެންދާނެ ކަމަށް އިކޮނޮމިކް މިނިސްޓަރ ފައްޔާޒު އިސްމާއީލް ވިދާޅުވެއްޖެއެވެ.
ރާއްޖެޓީވީން ބުރާސްފަތި ދުވަހު ގެނެސްދިން ހާއްސަ ކަވަރޭޖްގައި ވާހަކަ ދައްކަވަމުން މިނިސްޓަރު ފައްޔާޒު ވިދާޅުވީ މިނިމަމްވޭޖް ބޯޑްގެ މަސައްކަތް ކުރިއަށްދާނެ ގޮތް އާންމު ކުރެވިގެންދާނެ ކަމަށާއި މިނިމަމްވޭޖް ކަނޑައެޅުމަށް ގޮތެއް ނިންމާނީ ދެ ފަރާތްތަކުގެ ހުރި ކަންބޮޑުވުންތައް ވަރަށް ރަނގަޅަށް ބެލުމަށް ފަހުގައި ކަމަށެވެ. އަދި މި އަހަރުގެ ތެރޭގައި އެކަންކަން ފުރިހަމަ ކުރުމަށް ފަހު އަންނަ އަހަރު އެކަންތައްތައް ޤާނޫނުގެ ސިފައިގައި ގެނެވޭވަރު ކަމާ ބެހޭ ފަރާތްތަކުން ކުރާނެ ކަމަށް ވެސް އޭނާ ވިދާޅުވިއެވެ.
"ކުރިއަށް އޮތް ހަފްތާގެ ތެރޭގައި ވޭޖް ބޯޑް ރަސްމީކޮށް އިފްތިތާހު ކުރެވިގެންދާނެ. ވޭޖް ބޯޑުގެ މަސައްކަތް ހުންނާނެ ގޮތުގެ ޓާމްސް އޮފް ރިފަރަންސްއާ މި ހުރިހާ ކަމެއް ވެސް އަޅުގަނޑުމެން މިދަނީ ކުރަމުން،" ފައްޔާޒު ވިދާޅުވިއެވެ.
ތަރައްޤީގެ މަޝްރޫއުތައް ފަށާފައި ވަނީ ރާއްޖޭގެ އިޤްތިސާދާ ނުބައްދަލު އަދަދަކަށް ކަމަށާއި ކުންފުނިތަކުގެ ހާލަތު އޮތީ ވަރަށް ދެރަކޮށް ކަމަށް ފައްޔާޒު ފާހަގަކުރެއްވިއެވެ.
ފައްޔާޒު ވިދާޅުވީ މި އަންނަ އަހަރުގެ ކުރީކޮޅުގައި މާލޭގެ ބަނދަރުގެ މަސައްކަތް ވެސް ފެށިގެންދާނެ ކަމަށެވެ.
"މީގެ 20 އަހަރު ކުރިން ކުރަންޖެހޭ ކަމެއް މާލޭ ޕޯޓް ފުޅާކުރުން އެއީ، މި އަންނަ އަހަރުގެ ކުރީކޮޅުގައި އެ މަސައްކަތް ފެށި، ތިން އަހަރު ދުވަސް ތެރޭގައި އިރާދުކުރެއްވިއްޔާ 20 ނުވަތަ 30 އަހަރަށް ބޭނުންވާ ކެޕޭސިޓީ ހުންނަ ވަރުގެ ޕޯޓެއް ހެދިގެންދާނެ،" ފައްޔާޒު ވިދާޅުވިއެވެ.
އިންކަމް ޓެކްސްއަކީ ދައްކަންޖެހޭ އެއްޗެއް ކަމަށް ގިނަ ވިޔަފާރިވެރިން ޤަބޫލުކުރާކަން ފާހަގަކުރައްވާ ފައްޔާޒު ވިދާޅުވީ އިންކަމް ޓެކްސް ދެއްކުމާ ދޭތެރޭގައި ވިޔަފާރިވެރިންގެ ކަންބޮޑުވުމެއް ނެތް ކަމަށެވެ. އަދި ވިޔަފާރިވެރިން ކަންބޮޑުވާ ކަމަކީ އިންކަމް ޓެކްސް ދެއްކުމުން އެ ފައިސާއަށް ވަނީ ކިހިނެއްތޯކަން ވެސް ފައްޔާޒު ވިދާޅުވިއެވެ.
