ޝަރުއީ ކޯޓުތަކަކީ އެއް ކޯޓުން އަނެއް ކޯޓަށް ލަފަޔާއި ބާރު ދިނުމުގެ އިހުތިޔާރު އޮންނަ ތަނެއްނޫން: ހިސާން
6 ފެބުރުއަރީ 2019 | ބުދަ 05:04ގާނޫނު އަސާސީން ލަފައެއް ދެވޭނީ ހަމައެކަނި ސްޕްރީމް ކޯޓަށް
އެމްޑީޕީގެ ލީގަލް ޑިރެކްޓަރ ހިސާން ހުސެން
އެއްވެސް ޝަރުއީ ކޯޓަކީ އެހެން ކޯޓަކަށް ނުވަތަ އެހެން އިދާރާއަކަށް ލަފަޔާއި ބާރު ދިނުމުގެ އިހުތިޔާރު އޮންނަ ތަނެއް ނޫން ކަމަށް އެމްޑީޕީގެ ލީގަލް ޑިރެކްޓަރ ހިސާން ހުސެން ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން ހިސާން ވިދާޅުވީ ޝަރުއީ ކޯޓްތަކުން ކުރަންޖެހޭ މަސައްކަތަކީ އެކޯޓަކަށް ހުށައެޅިފައިވާ މައްސަލަތައް ބެލުން ކަމަށެވެ.
ރާއްޖޭގެ ގާނޫނުއަސާސީއާއި ގާނޫނުތައް ވަރަށް ސާފް ކަމަށާއި ގާނޫނު އަސާސީން ލަފައެއް ދެވޭނީ ހަމައެކަނީ ސްޕްރީމް ކޯޓަށް ކަމަށެވެ. އެގޮތުން ރައްޔިތުންގެ މަޖިލީހުން ގަރާރެއް ނެރެ މަޖިލީހުގެ ލަފަޔަކަށް އެދިއްޖެ ހާލަތުގައި ކަމަށެވެ.
މީގެ އިތުރުން ވެސް ގާޒީންނަށް އެފަރާތްތަކުގެ ދައުރަކީ ކޮބައިކަން ވަރަށް ރަނގަޅަށް ސާފްވެ ގާނޫނު ވެސް ރަނގަޅަށް އެނގެން ޖެހޭ ކަމަށާއި ގާޒީންނަށް އެފަރާތްތަކުގެ ހައްގަކީ ކޮބައިކަން ދެނެގަތުމަށް ޓަކައިވެސް އެކަމަކީ މުހިންމު ކަމެއް ކަމަށް ހިސާން ވިދާޅުވިއެވެ.
ފަނޑިޔާރުން އެއްކޯޓުން އަނެއްކޯޓަށް ބަދަލުކުރާ މައްސަލައަށް އިޝާރާތް ކުރައްވާ ހިސާން ވިދާޅުވީ ފަނޑިޔާރަކު އެއްވެސް ކުށެއްނެތި އެކި އެކި ކޯޓުތަކަށް ބަދަލު ކުރުމަކީ ބަލައި ގަނެވޭނެ ކަމެއް ނޫން ކަމަށާއި އެއްވެސް ގާނޫނެއް މާޒީއަށް ރުޖޫއަވާ ގޮތަށް ހެދުމަކީ ގަބޫލު ކުރެވޭނެ ކަމެއް ނޫން ކަމަށެވެ.
ހިސާން ވިދާޅުވީ ހައިކޯޓަށް ހުށައެޅޭ މައްސަލަތަށް އަވަސްކުރުމުގެ ވިސްނުމުގައި އުތުރު ގޮތްޕާއި ދެކުނު ގޮފި އުފެދިގެން ދިޔަ ކަމަށާއި ނަމަވެސް ވޭތުވެ ދިޔަ ދުވަސްތަކުގައި އެއީ ނަމެއްގެ ގޮތުގައި އުފައްދާފައިވާ ތަނަކަށް ވެގެން ގޮސްފައިވާ ކަމަށެވެ. އެގޮތުން ރައްޔިތަކަށް އެކަމުގެ މަންފާ ކުރިތަން ފެނިގެން ގޮސްފައި ނުވާ ކަމަށް ވެސް އޭނާ ވިދާޅުވިއެވެ.
" މިހާރު ހުށައަޅާފައި އޮތް ހުށައެޅުމުގައި އޮންނާނެ ޖަހާފަ އުތުރުގޮފި އަދި ދެކުނު ގޮފި އުވާލާއިރު ހައިކޯޓުން ކަނޑައަޅާ މައްސަލަތައް އަތޮޅުތަކުގައި ހުންނަ ކޯޓުތަކުގައި ހިންގި ދާނެ ކަމަށް. ޑިސްޓްރިކް ކޯޓުތަކެއް އުފެއްދުން އެއީ އަޅުގަނޑުމެން ހުށައަޅާފައި އޮތް އެއް ހުށައެޅުން" ހިސާން ވިދަޅުވިއެވެ.
ހިސާން ވިދާޅުވީ މައްސަލައެއް ކޯޓަށް ހުށައެޅުމުން އެމައްސަލައެއް ބަލައިގަތުމާއި ނުގަތުން އޮތީ އެކޯޓެއްގެ ރަޖިސްޓްރާ ނިންމާ ގޮތެއްގެ މައްޗަށް ކަމަށާއި ރަޖިސްޓްރާގެ ނިންމުމާއި މެދު ހިތްހަމަ ނުޖެހިއްޖެނަމަ ރަޖިސްޓްރާގެ ނިންމުން ކޯޓްގައި އިސްތިއުނާފް ކުރެވޭ ގޮތަށް އޮންނަ އޮތުމަކީ މިހާރުވެސް ގާނޫނުގައިލިޔެވިފައިވާ ވާހަކައެއް ކަމަށެވެ.
ހިސާން ވިދާޅުވީ ހުރިހާވެސް މައްސަލައަކީ ގާނޫނުގައި ލިޔެފައިވާ ގޮތަށް އަމަލު ނުކޮށް ކޯޓް ތަކުން ތަފާތު އުސޫލުތައް އެކި އެކި ކަންކަމުގައި ގެންގުޅުން ކަމަށެވެ. އެއް އުސޫލެއްގައި އެއްގޮތެއްގައި ދެމި ތިބުމަކީ މުހިންމު ކަމެއް ކަމަށް ހިސާން ވިދާޅުވިއެވެ.
