ގުރައިދޫ ބަނދަރުގެ ބޮޑުބައެއް ހަލާކުވެ ލަފާފުރުމަށް ދަތިވެއްޖެ
5 ފެބުރުއަރީ 2019 | އަންގާރަ 06:50މިފާއިތުވި ދެއަހަރު ބަނދަރު ހެދުމުގެ މަޝްރޫއު ބަޖެޓްގައި ހިމެނި ނަމަވެސް އަމަލީ މަސައްކަތް ނުކުރޭ
ގުރައިދޫ ބަނދަރުގެ އެއްގަމުތޮށި ވެއްޓިފައި
ތ.ގުރައިދޫ ބަނދަރުގެ ބޮޑުބައެއް ހަލާކުވެ ލަފާފުރުމަށް ދަތިވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން ކައުންސިލްގެ ނައިބް ރައީސް ތައުފީގު އަލީ ވިދާޅުވީ ބަނދަރުގެ އެއްގަމު ތޮށީގެ ބޮޑު ބައެއް ވެއްޓިފައިވާ ކަމަށާއި، ބަނދަރުގެ ނެރު ތޮއްޓާއި، ބޭރު ތޮށި ވެސް ނެތް ކަމަށެވެ.
ތައުފީގު ވިދާޅުވީ ލަފާ ފުރުމަށް ބޮޑެތި ދަތިތަކެއް ކުރިމަތިވެފައިވާ ކަމަށާއި، މިއީ ރައްޔިތުންގެ ވަރަށް ބޮޑު ޝަކުވާ އެއް ކަމަށެވެ. އަދި މިކަމުގެ ސަބަބުން އޮޑިވެރިންނަށާއި، އާންމުންނަށް ބޮޑެތި ދަތިތަކެއް ކުރިމަތިވެފައިވާ ކަމަށެވެ.
އޭނާ ވިދާޅުވީ ބަނދަރު އެއްގަމު ތޮށި ވެއްޓެމުން ދާތީ ކުރީގެ ސަރުކާރުގެ ކަމާ ބެހޭ މުއައްސަސާތަކުގެ ސަމާލުކަމަށް ގެނައި ނަމަވެސް މިމައްސަލައަށް ހައްލު ހޯދައިދިނުމަށް އަމަލީ މަސައްކަތް ކޮށްފައިނުވާ ކަމަށާއި، މިފާއިތުވި ދެއަހަރު ބަނދަރު ހެދުމުގެ މަޝްރޫއު ބަޖެޓްގައި ހިމަނައި ރައްޔިތުންނަށް ދެއްކީ ހުވަފެން ކަމަށެވެ.
މީގެ އިތުރުން ތައުފީގު ވިދާޅުވީ ދިޔަވަރު ހިކޭ ދުވަސްވަރު، ބަނދަރުގެ ފަޅުތެރެއަށް ފަސްއެޅިފައި ހުރުމުން ހިކި ދިޔާގައި އޮޑިފަހަރަށް ބަނދަރު ބޭނުން ނުކުރެވޭ ކަމަށެވެ.
''ބަނދަރަށް ވަރަށް ބޮޑަށް ފަސްއެޅިފަ. އެހެންވީމަ ހިކި ދިޔާގަ ބަނދަރަށް ބޯޓު ފަހަރަށް ނުވަދެވޭނެ. ދެން ދިޔަވަރު ބޮޑު ނުވަނީ އޮޑި ނުވެސް ނެރެވޭނެ. މިގޮތަށް މަސައްކަތް ކުރަންޖެހޭތީ އޮޑިވެރިންނަށް ވެސް ބޮޑެތި ގެއްލުންތަކެއް ވަމުންދަނީ" ތައުފީގު ވިދާޅުވިއެވެ.
ތައުފީގު ވިދާޅުވީ ބަނދަރުގެ ހާލަތު މިސަރުކާރުގެ ސަމާލު ކަމަށް ގެނެސްފައިވާ ކަމަށާއި، އުންމީދު ކުރަނީ އިބްރާހިމް މުހައްމަދު ޞޯލިހުގެ މިވެރިކަމުގައި ބަނދަރު އަލުން ހެދިގެން ދިއުން ކަމަށެވެ.
