މީޑިއާ ކައުންސިލްގެ މެމްބަރުކަމަށް ކުރިމަތިލުމުގެ ފުރުސަތު ހުޅުވައިފި
2 ފެބުރުއަރީ 2019 | ހޮނިހިރު 07:43ކުރިމަތިލާން ބޭނުންވާ ފަރާތްތަކުން 13 ފެބްރުއަރީ 2019 ވާ ބުދަ ދުވަހުގެ 12:00 ގެ ކުރިން ހުށަހަޅަންޖެހޭ
މީޑިއާ ކައުންސިލްގެ މެމްބަރުން
މޯލްޑިވްސް މީޑިއާ ކައުންސިލްގެ މީޑިއާގެ މެންބަރު ކަމަށް ކުރިމަތިލުމަށް ފުރުސަތު ހުޅުވާލައިފިއެވެ.
މިނިސްޓްރީ އޮފް ހޯމް އެފެއާޒްއިން ކޮށްފައިވާ އިއުލާނެއްގައި ބުނެފައިވަނީ ޤާނޫނު ނަންބަރު 2008/15 މޯލްޑިވްސް މީޑިއާ ކައުންސިލުގެ ޤާނޫނުގެ ދަށުން އެކުލަވާލެވިފައިވާ މީޑިއާ ކައުންސިލްގެ މީޑިއާގެ މެންބަރެއްގެ މުއްދަތު 2019 ފެބްރުއަރީ 5 ގެ ނިޔަލަށް ހަމަވާތީ، އެމަގާމަށް މެންބަރަކު ޢައްޔަން ކުރުމަށް ބޭނުންވާ ކަމަށެވެ. އެގޮތުން މީޑިއާކައުންސިލްގެ މީޑިއާގެ މަގާމަށް ކުރިމަތިލައްވަން އެދިވަޑައިގަންނަވާ މީޑިއާތަކުން، 13 ފެބްރުއަރީ 2019 ވާ ބުދަ ދުވަހުގެ 12:00 ގެ ކުރިން ވަނަވަރު، އައިޑެންޓިޓީ ކާޑުގެ ކޮޕީއާއި، ތަޢުލީމީ ފެންވަރު އަންގައިދޭ ލިޔުންތަކުގެ ކޮޕީއާއި ކުށުގެ ރެކޯޑާއި ޕާސްޕޯޓް ސައިޒްގެ ފޮޓޯއަކާއެކު މިނިސްޓްރީ އޮފް ހޯމްއެފެއާޒް އަށް ސިޓީއަކުން ހުށަހެޅުއްވާނެ ކަމަށެވެ.
މީޑިއާ ކައުންސިލް އެކުލެވިގެންވަނީ މީޑިއާގެ 8 މެންބަރުންނާއި އާންމުންގެ 7 މެންބަރުން ހިމެނޭގޮތަށެވެ. ކައުންސިލަށް ހޮވޭ މެންބަރުންގެ މުއްދަތަކީ މީލާދީ 2 އަހަރެވެ. އަދި އެއްވެސް ފަރާތަކަށް ކައުންސިލުގެ މެންބަރުކަމުގައި ވިދިވިދިގެން 2 ދައުރު އަދައެއް ނުކުރެވޭނެ ކަމަށް އިއުލާނުގައި ވެއެވެ.
މިދިޔަ ޑިސެމްބަރު މަހުގައި ވަނީ މީޑިއާ ކައުންސިލްގެ މީޑިއާތައް ތަމްސީލު ކުރާ އަށް މެންބަރުންގެ ތެރެއިން ހަތް މެންބަރުންގެ މަޤާމަށާއި އާއްމުން ތަމްސީލު ކުރާ ހަތް މެންބަރުންގެ މަޤާމަށް މީހުން އިންތިޚާބު ކޮށްފައެވެ.
