ހުޅުމާލޭ އަތިރިމަތީގައި ހުރި ކެފޭތައް އެޗްޑީސީން ހުސްކުރަން ފަށައިފި
އެތަން ހުސްކުރަން އެންގީޖެނުއަރީ 31ގެ ކުރިން
ހުޅުމާލެ ބީޗް ސަރަހައްދު -- އެޗްޑީސީން ވަނީ އެތަން ހުސްކުރަން ފަށާފައި
ހުޅުމާލޭ ބީޗް ސަރަހައްދުގައި ކެފޭ، ރެސްޓޯރެންޓްތައް ހުސްކުރުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީން) ދީފައިވާ މުހުލަތު ހަމަވުމާއެކު އެތަން ހުސްކުރަން ފަށައިފި އެވެ.
ހުޅުމާލޭ ބީޗް ސަރަހައްދު ހުސްކުރުމަށް އަންގާފައިވަނީ މިދިޔަ ޑިސެމްބަރު މަހު ތެރޭގައެވެ. އެތަން ޖެނުއަރީ 31 އަށް ހުސްކުރުމަށް އެޗްޑީސީން ކޮށްފައިވާ އިއުލާނެއްގައި ބުނެފައިވަނީ ހުޅުމާލޭގެ އިރުމަތީފަރާތުގެ ގޮނޑުދޮށާއި ހޭލިފަށް ސަރަޙައްދަކީ ހުޅުމާލޭގައި ދިރިއުޅޭ އެންމެހާ އާންމު ފަރުދުންނާއި ހުޅުމާލެއަށް ޒިޔާރަތްކުރާ ފަރާތްތަކުން ބޭނުންކުރުމަށް ކަނޑައަޅާފައިވާ އާންމު ސަރަޙައްދެއް ކަމަށެވެ. އަދި އެ ސަރަޙައްދަކީ އެޗްޑީސީން ހުޅުމާލޭގައި ދިރިއުޅޭ އެންމެހާ އާންމު ފަރުދުންނާއި ހުޅުމާލެއަށް ޒިޔާރަތްކުރާ ފަރާތްތަކުން ބޭނުންކުރުމަށް ވަކި ގޮތަކަށް ތަރައްޤީ ކުރުމަށް ކަނޑައަޅާފައިވާ ސައްޙައްދެއް ކަމަށްވެސް އެ އިއުލާނުގައި ވެއެވެ.
އެޗްޑީސީގެ މެނޭޖިން ޑިރެކްޓަރ ސުހައިލް އަހުމަދު ވިދާޅުވީ ބޭނުންވެލައްވަނީ މިހާރުގެ ގޮތަށް ވަކި ކުރެވިގެން ބީޗް ސަރަހައްދު ބޭނުންކުރުން ނޫންކަމަށާއި އެތަން ބޭނުންކުރަމުން އައީ އެ ކޯޕަރޭޝަނުން ހުއްދަ ދީގެން ބޭނުންކުރާ ތަނެއް ނޫންކަމަށެވެ.
" ފެންސް ޖަހައިގެން ވަކި ޕްރޮޕަޓީއެއްގެ ގޮތުގައި ބޭނުންނުކޮށް ޕަބްލިކް ސަރަހައްދު ބޭނުންކުރާށޭ ކޮމާޝަލް އެކްޓިވިޓީއެއްގެ ގޮތަށް. އެތަނަކީ ވަކި ބަޔަކަށް އޮތްތަނެއް ނޫނޭ. އެކަހަލަ ލެވެލްއެއްގައި އަޅުގަނޑުމެން މި ބަލަނީ މިހާރު ހުރި ސްޓްރަކްޗާތައް ނަގާފައި އެބޭފުޅުންނާ ވެސް ވާހަކަ ދެކެވިގެން އެތަން ބޭނުންކުރާ މީހުންގެ ވެސް ފައިދާއަށް ވިޔަފާރި ކުރާ މީހުންގެ ވެސް ފައިދާއަށް އެތަން ބޭނުން ކުރެވޭނެ ގޮތަކަށް." ސުހައިލް ރވިދާޅުވިއެވެ.
