މަޖިލިސް މެމްބަރުންނަކީ ރައްޔިތުންނަށް ޚިދުމަތްކުރަން އައްޔަނުކުރާ ވަކީލުންތަކެއް ކަމަށް އެމްޑީޕީގެ ރައީސް އަދި ކުރީގެ ރައީސުލްޖުމްހޫރިއްޔާ މުުޙައްމަދު ނަޝީދު ވިދާޅުވެއްޖެއެވެ.  

ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ހއ ހޯރަފުށީ ދާއިރާއަށް އެމްޑީޕީގެ ޓިކެޓުގައި ވާދަކުރައްވާ އަޙުމަދު ސަލީމްގެ ކެމްޕެއިން އިފްތިތާހު ކުރުމަށް ބުރާސްފަތި ދުވަހުގެރޭ ހޯރަފުށީ އަތޮޅު މަދަރުސާގައި ބޭއްވި ޖަލްސާއެއްގައި ނަޝީދު ވިދާޅުވީ، މަޖިލިސް މެމްބަރުންނަކީ ރައްޔިތުންގެ ފަރާތުން އައްޔަނުކުރެވޭ ވަކީލުންތަކެއް ކަމަށާއި، ރައްޔިތުންނަށް އެ މެމްބަރުން ޖަވާބުދާރީ ވާން ޖެހޭނެ ކަމަށެވެ. 

19 ވަނަ ރައްޔިތުންގެ މަޖިލީހުގައި އެމްޑީޕީން ގެންގުޅޭނެ ސިޔާސަތުތަކަށް އަލިއަޅުވާލައްވައި ނަޝީދު ވިދާޅުވީ، އެ މަޖިލިސް މެދުވެރިކޮށް ދިވެހިރާއްޖޭގެ ރަށްތަކުގެ މުއްސަނދިކަމާއި ތަނަވަސްކަން ރައްޔިތުންނަށް ފޯރުކޮށްދެއްވާނެ ކަމަށާއި، ރަށްރަށުގެ ތަރައްޤީގެ މަޝްރޫއުތަކަށް ބޭނުންވާ މަސައްކަތްތައް ކުރުމަށް މަގުފަހިކޮށް ،ލާމަރުކަޒީ އުސޫލުން ކައުންސިލުތައް ހިންގާނެ ކަމަށެވެ. 

އޭގެ އިތުރުން އެންމެ ކުޑަ އުޖޫރައަކީ 6000 ރުފިޔާއަށް ހެދުމަކީ އެމްޑީޕީގެ އަމާޒެއް ކަމަށާއި، ވަޒީފާއެއްނެތި އުޅޭ ޒުވާނުންނަށް ފަހި މަގެއް ހޯދައި ދިނުމަކީ އެމްޑީޕީއިން ކުރަން ނިންމާފައިވާ މުހިއްމު ކަމެއްކަން އެމަނިކުފާނު ފާހަގަކުރެއްވިއެވެ. އެގޮތުން ވަޒީފާ ހޯދުމުގެ މަސައްކަތުގައި އުޅޭ ޒުވާނުންނަށް މަހަކު މަދުވެގެން 1500 ރުފިޔާ ލިބޭނެ އިންތިިޒާމެއް ހަމަޖައިސަވައިދެއްވާނެ ކަމަށްވެސް ނަޝީދު ވިދާޅުވިއެވެ. 

ސަލީމްގެ އިތުރުން ހއ އަތޮޅުން މަޖިލީހަށް ވާދަކުރައްވާ އެމްޑީޕީ ކެނޑިޑޭޓުންގެ ކެމްޕެއިން ޕްރީ ލޯންޗު ކުރުންވެސް އެ ޖަލްސާގައި ކުރިއަށް ގެންގޮސްފައިވެއެވެ. އެގޮތުން ބާރަށު ދާއިރާގެ އެމްޑީޕީ ކެނޑިޑޭޓް އަޙުމަދު އަބްދުﷲ އާއި، ކެލާ ދާއިރާގެ އެމްޑީޕީ ކެނޑިޑޭޓް އިބްރާހިމް ޝަރީފާއި، ދިއްދޫ ދާއިރާގެ އެމްޑީޕީ ކެނޑިޑޭޓް އަބްދުﷲ ވަހީދާއި، އިހަވަންދޫ ދައިރާގެ އެމްޑީޕީ ކެނޑިޑޭޓް މުހައްމަދު ޝިފާއުގެ ކެމްޕެއިން ޕްރީ ލޯންޗު ކުރުން ރައީސް ނަޝީދު ވަނީ އިފްތިތާހު ކޮށްދެއްވާފައެވެ.