ކަރަޕްޝަނާ ދެކޮޅަށް ފެށި މަސައްކަތުން ސައުދީން 106 ބިލިއަން ޑޮލަރު އަނބުރާ ހޯދައިފި
ކަރަޕްޝަނުގެ މައްސަލަތައް ބެލުން ފެށުނީ 2017 ގައި
ކަރަޕްޝަނުގެ މައްސަލަތައް ބެލުމަށް އުފެއްދި ކޮމިޓީގެ ޗެއަރއަކީ ވަލީއަހުދު މުހައްމަދު ބިން ސަލްމާން
ސައުދީ އަރަބިއްޔާގެ ވަލީއަހު މުހައްމަދު ބިން ސަލްމާންގެ އަމުރުފުޅަށް ކަރަޕްޝަނާ ދެކޮޅަށް 2017ވަނަ އަހަރުގެ ނޮވެމްބަރު މަހު ފެށި އޮޕަރޭޝަނުގެ ތެެރެއިން މިހާތަނަށް 106 ބިލިއަން އެމެރިކާ ޑޮލަރު ހޯދިފައިވާކަމަށް އެގައުމުން ބުނެފިއެވެ.
ޖުމްލަ 381 މީހެއް ސައުދީގެ ޝާހީ ކޯޓަށް ހާޒިރު ކުރެވުނުކަމަށް އެ އިދާރާއިން ބުދަދުވަހު ނެރުނު ރިޕޯޓްގައި ވެއެވެ. ނަމަވެސް ނަންތައް ހާމަކޮށްފައެއް ނުވެއެެވެ.
ފައިސާ ހޯދާފައިވާ ފަރާތްތަކުގެ ތެރޭގައި އަމީރުންނާއި، ވަޒީރުންނާއި، މަތީ ފަންތީގެ ވިޔަފާރިވެރިން ހިމެނޭކަމަށް ސައުދީން ބުނެއެވެ.
ބަޔާނުގައި ބުނެފައިވާ ގޮތުގައި 87 މީހަކު އެމީހުންގެ މައްޗަށް ކުރެވުނު ކަރަޕްޝަނުގެ ތުހުމަތަށް އިއުތިރާފްވެ ބަދަލުގައި ރިއަލް އެސްޓޭޓް އަދި ކުންފުނިތަކާއި ފައިސާ ނުވަތަ އެނޫން ހަރުމުދާ ދިނުމަށް އެއްބަސްވެފައިވާކަމަށެވެ.
ކަރަޕްޝަނާ ދެކޮޅަށް ފެށިކަމަށް ބުނާ ކެމްޕެއިން ނިންމާލާފައިވެސް މިވަނީ އެ ކެމްޕެއިން ފެށިގޮތަށް ކުށްލި ގޮތަކަށެވެ. ނަމަވެސް މިފަދަ އާ ބުރެއް ފެށިދާނެކަމަށް ވިޔަފާރިވެރިން ދެކެއެވެ.
ސައުދީގައި 2017 ވަނަ އަހަރު ނޮވެމްބަރު މަހު ވަނީ ކަރަޕްޝަނުގެ ތުހުމަތުގައި އެ ގައުމުގެ މަޝްހޫރު މަހުޖަނުންނާއި، ޝާހީ އާއިލާގެ މެމްބަރުންނާއި އަދި މިނިސްޓަރުން ވެސް ހައްޔަރުކޮށްފައެވެ.
ކަރަޕްޝަނާ ދެކޮޅަށް ސައުދީން ފެށި އޮޕަރޭޝަން ފެށީ ކަރަޕްޝަންގެ މައްސަލަތަކާ ގުޅިގެން ބޮޑެތި ބާރުތަކަކާއެކު އެ އަހަރުގެ ނޮވެމަބަރު މަހު އެކުލަވާލި ހާއްސަ ކޮމިޓީއަކުންނެވެ. މިކޮމިޓީގެ ޗެއަރމަނަކަށް އައްޔަން ކޮށްފައި ވަނީ ވަލީއަހުދު މުހައްމަދު ބިން ސަލްމާނެވެ.
