އިންޑިއާ އިން ރާއްޖެއަށް ކަނޑައެޅުއްވި ސަފީރަކަށް އެ ގައުމުގެ މިނިސްޓްރީ އޮފް ޕެޓްރޯލިއަމް އެންޑް ނެޗުރަލް ގޭހުގެ ޖޮއިންޓް ސެކްރެޓަރީ ޝްރީ ސަންޖޭ ސުދީރް އައްޔަން ކުރައްވައިފިއެވެ. 

އާ ސަފީރު އައްޔަން ކުރައްވާފައިވާކަން ހާމަކުރައްވައި އިންޑިއާގެ އެކްސްޓަރނަލް އެފެއަރޒް މިނިސްޓްރީގެ ވެބްސައިޓްގައި ވަނީ ވަރަށް އަވަހަށް އެ މަނިކުފާނު މަގާމުގެ މަސްއޫލިއްޔަތާ ހަވާލުވެވަޑައިގަންނަވާނެ ކަމަށެވެ.

ސަންޖޭ ސުދީރްއަކީ 1993 އިން ފެށިގެން އިންޑިއާގެ ޚާރިޖީ ޚިދުމަތުގައި ދެމިހުންނެވި ބޭފުޅެކެވެ. އެ މަނިކުފާނު ވަނީ އިންޑިއާ އިން ސިޑްނީއަށް ކަނޑައޅުއްވާފައި ހުންނަވާ ކޮންސުލް ޖެނެރަލްގެ މަގާމާއި އެކްސްޓަރނަލް އެފެއަޒް މިނިސްޓަރުގެ އޮފީހުގެ ޖޮއިންޓް ސެކްރެޓަރީ އަދި އެ އޮފީހުގެ ވެރިޔާގެ މަގާމް އަދާކުރައްވާފައެވެ.

އިންޑިއާ އިން މިހާރު ރާއްޖެއަށް ކަނޑައަޅުއްވާފައި ހުންނަވާ ސަފީރު އަކިލޭޝް މިޝްރާ އެ މަގާމަށް ހަމަޖައްސަވާފައި ވަނީ ކެނަޑާގެ ޓޮރޮންޓޯގައި އިންޑިއާގެ ކޮންސުލް ޖެނެރަލްގެ މަގާމުގައި ހުންނަވަނިކޮށް 2015 ވަނަ އަހަރުގެ ޑިސެމްބަރު މަހުއެވެ.
އަކިލޭޝްއަކީ އިންޑިއާގެ ހާރިޖީ ވުޒާރާގައި އާއި އިންޑިއާގެ ތަފާތު އެމްބަސީތަކުގައި މަސައްކަތް ކުރައްވާފައިވާ ހާރިޖީ ދާއިރާގެ ތަޖުރިބާ ބޮޑު ބޭފުޅެކެވެ. 

އިންޑިއާ އާއި ރާއްޖޭގެ ގުޅުން 2012 ވަނަ އަހަރުގެ ފެބްރުއަރީ މަހުން ފެށިގެން ނުތަނަވަސްވެފައި އޮތް އޮތުން ނިމުމަކަށް ގެނެވި ރައީސް އިބްރާހިމް މުހައްމަދު ސާލިހްގެ ވެރިކަމާ އެކު ދެ ގައުމުގެ މެދުގައި އޮތް ގާތްގުޅުން ވަނީ އިއާދަކުރެވިފަައެވެ.

މަގާމާ ހަވާލުވެ ވަޑައިގަތުމަށް ފަހު ކުރެއްވި ފުރަތަމަ ރަސްމީ ދަތުރުފުޅުގައި ރައީސް ސާލިހު އިންޑިއާއަށް ވަޑައިގެންނެވިއިރު އެ މަނިކުފާނު ހުވާކުރެއްވުމުގެ ރަސްމިއްޔާތަށް އިންޑިއާގެ ބޮޑުވަޒީރު ނަރެންދުރަ މޯދީ ވަނީ ވަޑައިގެންފައެވެ.