ގާނޫނުން ބޭރުން އެއްވެސް ބަޔަކާއި ދޭތެރޭ އަމަލެއް ނުކުރަން: ޝަރީފް
28 ޖެނުއަރީ 2019 | ހޯމަ 19:30އެ ކޮމިޝަނުން އަބަދުވެސް ކަންތައްތައް ކޮށްފައި އޮންނާނީ މަޖިލިހުން ކަނޑައަޅާފައިވާ ގާނޫނީ އިމުގެ ތެރެއިން ކަމަށް ޝަރީފް ވިދާޅުވި
އިލެކްޝަންސް ކޮމިޝަންގެ ރައީސް އަހްމަދު ޝަރީފް މިރޭގެ ރަސްމިއްޔާތުގައި ވާހަކަދައްކަވަނީ
އެއްވެސް ސިޔާސީ ޕާޓީއަކާއި ނުވަތަ ފަރުދަކާއި ދޭތެރޭގައި ވެސް ގާނޫނުން ބޭރުން ކަމެއް ކޮށްފައި ނުވާނެ ކަމަށް އިލެކްޝަންސް ކޮމިޝަންގެ ރައީސް އަހްމަދު ޝަރީފް ވިދާޅުވެއްޖެއެވެ.
އިލެކްޝަންސް ކޮމިޝަންގެ އާ ލޯގޯ އާއި ކުލަ އިފްތިތާހު ކުރަން ބޭއްވި ހަފުލާގައި ވާހަކަދައްކަވަމުން އެ ކޮމިޝަނުގެ ރައީސް އަހުމަދު ޝަރީފް ވަނީ ކޮމިޝަނުން އެއްވެސް ބަޔަކާއި މެދު ޒާތީވެގެން އުޅޭ ކަމަށްް ދެކެވޭ ވާހަކަތަކަށް ވަރަށް ހޫނު ރައްދެއް ދެއްވާފައެވެ.
"ޕީޕީއެމްއާއި ދޭތެރޭގައި އަޅުގަނޑުމެން އިލެކްޝަންސް ކޮމިޝަނުން ޒާތީ ގޮތެއް ގެންގުޅޭ ކަމަށް ނުވަތަ ޕީޕީއެމްއާއި ގުޅިފައި ހުރި ޕާޓީއެއް އުފެދެމުން ދާއިރު އެ ޕާޓީއާއި ދޭތެރޭގައި ޒާތީ ގޮތެއް ގެންގުޅޭ ކަމަށް ދެކެވޭ ވާހަކަތަކަކީ ހަގީގަތާ ހިލާފު ވާހަކައެއް،" ޝަރީފް ވިދާޅުވިއެވެެ.
ޝަރީފް ވިދާޅުވީ އެ ކޮމިޝަނުން އަބަދުވެސް ކަންތައްތައް ކޮށްފައި އޮންނާނީ މަޖިލިހުން ކަނޑައަޅާފައިވާ ގާނޫނީ އިމުގެ ތެރެއިން ކަމަށެވެ.
މި ހަފުލާގައި ޕީޕީއެމްގެ މެމްބަރުންނާއި މެދު އިލްކްޝަންސް ކޮމިޝަނުން ޒާތީކޮށް ކަންކުރާ ކަމަށް ބުނެ، މަޖިލިސް މެދުވެރިވެގެން އެ ކޮމިޝަން ޖަވާބުދާރީ ކުރުވަން އުޅުމުން، ޝަރީފް ވަނީ އެކަމަށް ތައުރީފްކުރައްވާފައެވެ. ޝަރީފް ވިދާޅުވީ އިލެކްޝަންސް ކޮމިޝަން ޖަވާބުދާރީ ކުރެވޭނީ ގާނޫނީ އިމުގެ ތެރެއިން ކަމަށެވެ.
"އަޅުގަނޑުމެން އަބަދުވެސް ދަންނަވަން ތަނެއްގައި ދޮރެއް ކައިރީ ހުރެގެން ވާހަކަ ދެއްކިޔަކަސް އަދި އިލެކްޝަންސް ކޮމިޝަނަކުން ޖަވާބުދާރީއެއް ނުވާނެ ކަމަށް. އަޅުގަނޑުމެން ޖަވާބުދާރީ ވާނީ ގާނޫނުގައި އޮންނަ ގޮތުގެ މަތިން، ގާނޫނާއި އެއް ގޮތަށް އިލެކްޝަންސް ކޮމިޝަންގެ މެމްބަރުން ޖަވާބުދާރީ ކުރުވާށޭ" ޝަރީފް ވިދާޅުވިއެވެ.
ޝަރީޕް މިހެން ވިދާޅުވި އިރު ކުރީގެ ރައީސް ޔާމިން އިސްވެ ހުންނަވައިގެން އުފައްދަވާ ޕީއެންސީ އުފައްދަން އިލެކްޝަންސް ކޮމިޝަނުން ހުއްދަ ދިނީ، 24 ގަޑި އިރު މަޖިލިސް ހުޅުވައިގެން ވިޔަސް ޕީއެންސީ ރަޖިސްޓްރީ ކުރައްވަން ތައްޔާރަށް ހުންނެވި ކަމަށް ރައްޔިތުންގެ މަޖިލީހުގެ ރައީސް އަދި ޖޭޕީގެ ލީޑަރު ގާސިމް އިބްރާހިމް ވިދާޅުވި ފަހުންނެވެ.
ޕީއެންސީ އުފައްދަން ހުއްދަ ދިނުމާއި އެކީ އާދިއްތަ ދުވަހު އެ ޕާޓީ އުފެއްދުމުގެ ޖަލްސާ ބާއްވާފައި ވާއިރު، ޕީއެންސީ އުފައްދަން ޕީޕީއެމްގެ މުދަލާއި ވަސީލަތްތައް ބޭނުންކުރާ ކަމަށް ބުނާ މައްސަލަ އީސީން މިހާރު ވަނީ ބަލަން ފަށައިފައެވެ.
