ޕީއެސްއެމްގެ ކަރަޕްޝަންގެ 14 މައްސަލައެއް އޭސީސީން ބަލަނީ!
28 ޖެނުއަރީ 2019 | ހޯމަ 09:56އެމްޑީގެ ބިއުރޯއެއް ހެދުމަށް ވެސް 4 މިލިއަން ރުފިޔާ ޚަރަދު ކުރި
ޕަބްލިކް ސާވިސް މީޑިއާ، ޕީއެސްއެމް
އެންޓިކަރަޕްޝަން ކަމިޝަން (އޭސީސީ) އިން ބަލަމުންދަނީ ޕަބްލިކް ސާވިސް މީޑިއާ ޕީއެސްއެމްގެ ކަރަޕްޝަންގެ 14 މައްސަލައެއް ކަމަށް އެ ކަމިޝަނުން ބުނެފިއެވެ.
އޭސީސީން ބަލަމުންދާ ކަރަޕްޝަންގެ 14 މައްސަލައިގެ ތެރޭގައި އެތަނުގައި ކުރިން މަސައްކަތްކުރެއްވި އިސް ވެރިންގެ ހިޔާނާތުގެ ދެ މައްސަލައެއް ވެސް ހިމެނެއެވެ. އޭގެ ތެރޭގައި ހިމެނެނީ މޯލްޑިވްސް މީޑިއާ އިންސްޓިޓިއުޓް ގާއިމްކުރުމަށްޓަކައި ނުހަދާ ހުރި އިމާރާތެއްގެ ދެ ފްލޯއެއްގެ ކުއްޔަށް ޕީއެސްއެމް އިން ފައިސާ ދައްކަމުން ދިޔަ މައްސަލައަކާއި ޖަޕާނު ސަރުކާރުގެ އެހީގައި ގާއިމް ކުރަން ހަމަޖެހިފައިވާ އިންޓަގްރޭޓެޑް ސާވިސް ޑިޖިޓަލް ބްރޯޑްކާސްޓިން (އައިޓީޑީބީ) ގެ ޕްރޮޖެކްޓްގެ ތެރެއިން 41 މިލިއަން ރުފިޔާ ނެގިކަމުގެ މައްސަލައެކެވެ.
ނުނިމި ހުރި އިމާރާތެއްގެ ދެ ފްލޯއެއްގެ ކުއްޔަށް ޕީއެސްއެމް އިން ފައިސާ ދައްކަމުން ދިޔަ މައްސަލައިގައި ޕީއެސްއެމްގެ ޕްރޮކިއުމެންޓް ޑިޕާޓްމެންޓްގެ ކުރީގެ ޑިރެކްޓަރު މުހައްމަދު ހާޝިމްގެ މައްޗަށް ވަނީ ދައުވާ އުފުލާފައެވެ. ދެހާސް 15 ވަނަ އަހަރުގެ ޑިސެމްބަރު މަހުން ފެށިގެން ހަތް މަސް ދުވަހުގެ ކުލި ޕީއެސްއެމް އިން އެގޭގެ ވެރިފަރާތަށް ދައްކާފައިވާއިރު އިމާރާތް އެކުންފުންޏާ ހަވާލުކޮށްފައިނުވާ ކަމަށް އޭސީސީން ބުނެއެވެ. އެގޮތުން 481،000ރ. ކުލީގެ ގޮތުގައި ގަވައިދާ ހިލާފަށް ހަރަދުކޮށްފައިވާ ކަމަށް އޭސީސީން ބުނެއެވެ.
އައިޓީޑީބީގެ ޕްރޮޖެކްޓްގެ ތެރެއިން ހިމެނޭ ދައުވާގައި ބުނެފައި ވަނީ ޕީއެސްއެމްގެ އިސްވެރިންނަށް ފައިދާވާ ގޮތަށް 16 މިލިއަނުގެ ބަދަލުގައި 179 މިލިއަން ރުފިޔާ ފިނޭންސް މިނިސްޓްރީން ހޯދަން ނިންމައި، އެ ފައިސާ ހޯދުމަށް މިނިސްޓްރީ އަށް ހުށަހަޅި ކަމަށެވެ. ނަމަވެސް އެ އަދަދަކީ ޕްރޮޖެކްޓްގެ ހަތަރު އިންސައްތައަށް ވާ ފައިސާއަށް ވުރެ މާ ބޮޑު އަދަދެއް ކަމަށް ބުނެ 57 މިލިއަން ރުފިޔާ ފިނޭންސުން ދޭން ހަމަޖެއްސި ކަމަށެވެ. އަދި 57 މިލިއަން ރުފިޔާއިން އެ ޕްރޮޖެކްޓަށްވާ 16 މިލިއަން ކަނޑާލުމުން ބާކީވާ 41 މިލިއަން ރުފިޔާ ޕީއެސްއެމްގެ އިސްވެރިން ބޭނުން ކޮށްފައިވާ ކަމަށާއި އަދި އެ މައްސަލައިގައި ޕްރޮޖެކްޓް މެނޭޖަރަކަށް ހުރި މީހާ ވަޒީފާއިން ވަކިކޮށް ފަހުން އެތަނުގެ އެހެން އިސް މުވައްޒަފަކާ ހަވާލުކުރެވުނު ކަމަށް ވަނީ ބުނެފައެވެ. އަލަށް ހަވާލު ކުރި މުއައްޒަފަށް ވެސް 41 މިލިއަންގެ މައްސަލަ އެނގުނު ހިސާބުން އޭނާ އެހެން ޑިޕާޓްމަންޓަކަށް ބަދަލުކޮށްފައިވާ ކަމަށް ވެއެވެ.
އެނގިފައިވާ ގޮތުގައި ޕީއެސްއެމްގެ ބޯޑުގައި ހުންނަވައިގެން ރައީސް ޔާމީންގެ ކެމްޕެއިންގައި ވަރަށް ބޮޑަށް އުޅުއްވި ޑެޕިއުޓީ މެނޭޖިން ޑިރެކްޓަރު އަހުމަދު އިކުރާމާއި ޕީއެސްއެމްގެ ކުރީގެ މެނޭޖިން ޑިރެކްޓަރު އިބްރާހީމް ހަލީލްގެ ކަރަޕްޝަންގެ މައްސަލަތަކެއް ވެސް އޭސީސީން ދަނީ ބަލަމުންނެވެ. އޭގެ ތެރޭގައި ޕީއެސްއެމުން ނެރުނު މަޖައްލާ، "މާލްދީބް" ނެރުމަށް ކުރި މަސައްކަތާއި ޕީއެސްއެމް އިމާރާތުގައި ކުލަލުން އަދި އަޑުގެ އެންޓަނާތައް ބަދަލު ކުރުން ފަދަ މަސައްކަތްތަކުގައި ހިމެނޭ ކަރަޕްޝަންގެ މައްސަލަތައް އޭސީސީން ދަނީ ބަލަމުންނެވެ.
މީގެ އިތުރުން ޕީއެސްއެމުން ހަތަރު މިލިއަން ރުފިޔާ ހޭދަކޮށްގެން އެ މީޑިއާގެ މެނޭޖިން ޑިރެކްޓަރގެ ހާއްސަ ބިއުރޯއެއް ހެދި މައްސަލައެއް ވެސް އޭސީސީ އިން ބަލަމުންދާކަން ވަނީ އެނގިފައެވެ. އޭރު ޕީއެސްއެމްގެ މެނޭޖިން ޑިރެކްޓަރަކީ އިބްރާހީމް ހަލީލެވެ.
