އެމްޑީޕީން ޖުޑިޝަރީ އިސްލާހު ކުރުމަށް ހުށަހެޅި ހުށަހެޅުމަކީ ވަކި ފަނޑިޔާރަކަށް އަމާޒުކޮށް އެކުލަވާލި ހުށަހެޅުމެއް ނޫން: ނަޝީދު
27 ޖެނުއަރީ 2019 | އާދީއްތަ 19:35އެންމެހާ ފަނޑިޔާރުންނާއި ވަކީލުން އެހީތެރިވެދިނުމަށް އެދިލެއްވި
އެމްޑީޕީން ހިންގި މަސައްކަތު ބައްދަލުވުމުގައި ރައީސް ނަޝީދު ވާހަކަ ދައްކަވަނީ
އެމްޑީޕީން ޖުޑިޝަރީ އިސްލާހު ކުރުމަށް ހުށަހެޅި ހުށަހެޅުމަކީ ވަކި ފަނޑިޔާރަކަށް އަމާޒުކޮށް އެކުލަވާލި ހުށަހެޅުމެއް ނޫން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އާދިއްތަ ދުވަހުގެ ރޭ ނަޝީދު ކުރެއްވި ޓުވީޓެއްގައި ވިދާޅުވީ އެ ހުށަހެޅުމަކީ ވަކި ފަނޑިޔާރަކަށް އަމާޒުކޮށްގެން އެމްޑީޕީން ހުށަހެޅި ހުށަހެޅުމެއް ނޫން ކަމަށާއި އެއީ މިދިޔަ 10 އަހަރު އެމްޑީޕީން ކުރި ތަޖުރިބާގެ އަލީގައި އެކުލަވާލި އިހްލާސްތެރި އެކުލަވާލުމެއް ކަމަށެވެ. އަދި އެންމެހާ ފަނޑިޔާރުންނާއި ވަކީލުން އެކަމަށް އެހީތެރިވެދިނުމަށް އެމަނިކުފާނު ވަނީ އެދިވަޑައިގެންފައެވެ.
ރާއްޖޭގެ ޝަރުއީ ދާއިރާ އިސްލާހު ކުރުމަށް އެމްޑީޕީ މެޖޯރިޓީ އޮންނަ މަޖިލީހަކުން ކުރާނެ ކަންތައްތައް ހިމެނޭ ގޮތަށް އެ ޕާޓީގެ ފަރާތުން އިސްލާހު ހުށަހެޅުއްވީ ތުޅާދޫ ދާއިރާއަށް އެމްޑީޕީ ޓިކެޓުގައި ވާދަ ކުރައްވާ ގާނޫނީ ވަކީލު ހިސާން ހުސައިންނެވެ. އެ ކަރުދާހުގައި ވަނީ ޑީޖޭއޭ އާއި ޖުޑީޝަލް ސާވިސް ކޮމިޝަން (ޖޭއެސްސީ) އާއި ކޯޓުތައް އިސްލާހު ކުރުމެވެ. ޑީޖޭއޭ ހިންގާނީ ސުޕްރީމް ކޯޓުގެ ދަށުން ނޫން ކަމަށާއި އެ ޑިޕާޓްމަންޓް ހިންގާނީ ޗީފް ޖުޑީޝަލް އެޑްމިނިސްޓްރޭޓަރުގެ ދަށުން ކަމަށް ހިސާން ހުށަހެޅުއްވި ކަރުދާހުގައިވެއެވެ. އެ ކަރުދާހުގައިވާ ގޮތުން ޗީފް ޖުޑީޝަލް އެޑްމިނިސްޓްރޭޓަރު އައްޔަންކޮށް، ވަކިކުރާނީ ރައްޔިތުންގެ މަޖިލީހުންނެވެ. ގުޅިފައިވާ ޕާޓީތަކުގެ މެނިފެސްޓޯގައިވެސް ބުނެފައި ވަނީ އެ ގޮތަށެވެ.
ހިސާން ހުށަހެޅުއްވި ކަރުދާހުގައި އިތުރަށް ފާހަގަކޮށްފައި ވަނީ ފަނޑިޔާރުންގެ ޝަރުތުތައް އަލުން ރިވިއު ކުރުމަށެވެ. އެގޮތުން ގާނޫނު އަސާސީގެ 149 ވަނަ މާއްދާގައިވާ ޝަރުތުތައް އިތުރަށް ދިރާސާކޮށް، ފަނޑިޔާރުންގެ ސުލޫކީ އަދި އަހުލާގީ މިންގަނޑުގެ މާނަ ފުޅާ ކުރުން ހިމެނެއެވެ. އެމްޑީޕީގެ ޖުޑީޝަލް ރިފޯމް އެޖެންޑާގައި ފަނޑިޔާރުންގެ ޝަރުތު އިތުރު ކުރުމަށް ހުށަހަޅާ ކަންތައްތަކުގެ ތަފްސީލު ހިމަނާފައެއް ނުވެއެވެ.
އެ އިސްލާހުތަކަށް ހިޔާލު ހުށަހެޅުމަށް އެމްޑީޕީން ވަނީ ހުޅުވާލާފައެވެ. އެގޮތުން އަންގާރަ ދުވަހާއި ހަމައަށް ހިޔާލު ހުށަހެޅުމުގެ ފުރުސަތު ވަނީ ހުޅުވާލާފައެވެ.
