ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު އާއި ގައްދޫ ދާއިރާގެ މެންބަރު އަހުމަދު ރަޝީދު ޕީޕަލްސް ނޭޝަނަލް ކޮންގްރެސްއަށް ގުޅިވަޑައިގެންފިއެވެ.
އެދެބޭފުޅުން އެޕަޓީއަށް ގުޅިވަޑައިގެންނެވިކަން ހާމަކުރެއްވީ، ޕީއެންސީ އުފެއްދުމަށްޓަކައި އާދިއްތަ ދުވަހުގެރޭ ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން އެޕާޓީގެ ވަގުތީ ރައީސް ފޮނަދޫ ދާއިރާގެ މެންބަރު އަބުދުއްރަހީމް އަބުދުﷲ އެވެ. އޭނާ ވިދާޅުވިގޮތުގެ އެ ދެމެންބަރުން އެޕާޓީއާއި ގުޅިވަޑައިގަތީ، އާދިއްތަ ދުވަހުއެވެ.
އަދުރޭ ވިދާޅުވީ، ޕީއެންސީ ރަޖިސްޓްރީވެގެން މަޖިލީހަށް ވަންނާނީވެސް މަޖިލީހުގެ ގާނޫނީ ހައިސިއްޔަތާއި އެކުގައި ކަމަށެެވެ.
ބާރަށު ދާއިރާގެ މެންބަރު ޝުޖާ ޕީއެންސީ އާއި ގުޅިވަޑައިގަތީ، ކުރީގެ ނައިބުރައީސް އަޙުމަދު އަދީބް އިސްކޮށް ހުންނަވައިގެން އުފެއްދި އެމްޓީޑީއަށް އޭނާ ސޮއިކުރައްވަން އުޅުއްވާ ކަމުގެ އަޑުތަކެއް ފެތުރިފައި ވަނިކޮށެވެ. އަދި ދާދިފަހުން އޭނާ ވަނީ އަމިއްލަފުޅު ޓްވިޓާއިން އެމްޓީޑީގެ ލޯގޯގެ ވީޑިއޯއެއް ޓްވީޓްވެސް ކުރައްވާފައެެވެ. އާދިއްތަ ދުވަހުގެރޭ ދެން ޕީއެންސީއަށް ގުޅިވަޑައިގެންނެވި މެންބަރު އަހުމަދު ރަޝީދަކީ ކުރިން ޕީޕީއެމްގެ މެންބަރެކެވެ.
