ފަތަން ދަސްކޮށްދޭ އިންސްޓްރަކްޓަރުން ތަމްރީނުކުރުމުގެ ކޯހުގައި ބައިވެރިވުމަށް ހުޅުވާލައިފި

ފަތަން ދަސްކޮށްދިނުމުގެ މަސައްކަތުގައި ހަރަކާތްތެރިވާ އިންސްޓްރަކްޓަރުން ތަމްރީނުކުރުމުގެ ކޯހެއް މާލޭގައި ހިންގަން ނިންމާ، ބައިވެރިވުމުގެ ފުރުސަތު ހުޅުވާލައިފިއެވެ.

ސްވިމިން އެސޯސިއޭޝަނުން އިންތިޒާމުކޮށްގެން ބާއްވާ މި ކޯސް އޮންނާނީ އަންނަ ފެބްރުއަރީ މަހުގެ ދެވަނަ ދުވަހުން ފެށިގެން 28 ވަނަ ދުވަހުގެ ނިޔަލަށެވެ.

ސްވިމިން އެސޯސިއޭޝަނުން ބުނީ މި ކޯހުގައި ބައިވެރިވެވޭނީ ދިވެހިންނަށް އެކަނި ކަމަށާއި، އެ މީހަކީ ފަތަން ދަސްކޮށްދިނުމުގެ މަސައްކަތްކުރެވޭ ފަދަ ސިއްހަތެއްގައި ހުރި މީހަކަށް ވާންޖެހޭނެ ކަމަށެވެ.

މީގެ އިތުރުން އެ އެސޯސިއޭޝަނުން ބުނީ ކޯހުގައި ބައިވެރިވެވޭނީ މީހެއްގެ އެހީއަކާ ނުލައި ހުއްޓުމެއް ނެތި 400 މީޓަރަށް ފަތަން އެނގޭ އުމުރުން 18 އަހަރާ 45 އަހަރާ ދެމެދުގެ މީހުންނަށް ކަމަށެވެ.

މިކޯސް ފުރިހަމަކުރުމަށް ފަހު ސެޓްފިކެޓް ދެވޭނީ ސްވިމިން އެސޯސިއޭޝަނުން ކަނޑައަޅާ މުއްދަތެއްގެ ތެރޭގައި ކޯހުގެ އަމަލީ ބައި ފުރިހަމަކޮށް، ހާޒިރީން %95 އަށް ވުރެ މަތިން ހޯދައި، ތިއަރީ ޓެސްޓާއި ޕްރެކްޓިކަލް ޓެސްޓްތަކުން %75 އަށް ވުރެ މަތިން މާކްސް ހޯދާ މީހުންނަށް ކަމަށް އެ އެސޯސިއޭޝަނުން މައުލޫމަތު ދެއެވެ.

ކޯހުގައި ބައިވެރިވުމަށް ޝައުގުވެރިވާ މީހުން، ކޯހުގައި ބައިވެރިވުމުގެ އޮންލައިން ފޯމު ފުރިހަމަކޮށް 30 ޖެނުއަރީ 2019 ވަނަދުވަހު 14:00 ގެކުރިން ހުށަހަޅަން ޖެހޭނެ ކަމަށާއި، އިތުރު މަޢުލޫމާތު ސާފުކުރެއްވުމަށް ރަސްމީ ބަންދުނޫން ދުވަސްދުވަހު ހެނދުނު 08:00 ން މެންދުރު 14:00 އަށް 3323429 އަށް ގުޅުއްވުމަށް އެދޭކަމަށް ސްވިމިން އެސޯސިއޭޝަނުން އެދެއެވެ.