ހޭންޑްބޯލް ޖޫނިއާ ރެފްރީ ކޯހުގައި ބައިވެރި ވުމުގެ ފުރުސަތު ހުޅުވާލައިފި

ހޭންޑްބޯލް މޯލްޑިވްސްއިން އިންތިޒާމުކޮށްގެން ކުރިއަށް ގެންދާ ހޭންޑްބޯލް ޖޫނިއާ ރެފްރީ ކޯހުގެ ދެވަނަ ބެޗުގައި ބައިވެރިވުމުގެ ފުރުސަތު ހުޅުވާލައިފިއެވެ.

މިކަމާ ގުޅިގެން ހޭންޑްބޯލް މޯލްޑިވްސްއިން ނެރުނު އިއުލާނެއްގައި ބުނެފައިވަނީ، މިއީ ލެވެލް 2 އަދި 3 ގެ ރެފްރެޝާރ ކޯހެއް ކަމަށާއި، ކޯހުގައި ބައިވެރިވުމުގެ ފުރުސަތު މިމަހުގެ 28 ވަނަ ދުވަހުގެ ނިޔަލަށް ހުޅުވާލެވިފައި ވާކަމަށެވެ.

އަންނަ އީގަސްޓް މަހުގެ 1 އިން 10 ގެ ނިޔަލަށް ކުރިއަށް ގެންދިއުމަށް ހަމަޖެހިފައިވާ މި ކޯހުގައި ކޮންމެ ދުވަހަކު ހަވީރު 16:00 އިން 18:00 އަށް، އަދި ރޭގަންޑު 20:00 އިން 22:30 އަށް ކިޔެވުން ކުރިއަށްދާނެ ކަމަށް އެސޯސިއޭޝަނުން ވަނީ ބުނެފައެވެ.

ހޭންޑްބޯލް މޯލްޑިވްސްއިން ބުނެފައިވަނީ، މި ކޯހުގައި ބައިވެރިވާން ބޭނުންވާ ފަރާތްތަކުން މިމަހުގެ 28 ވަނަ ދުވަހުގެ ކުރިން، ބައިވެރިވާން އެދޭ ފޯމް ފުރުމަށްފަހު އެ އެސޯސިއޭޝަނަށް ހުށަހަޅަން ޖެހޭނެ ކަމަށާއި، ބައިވެރިވާން އެދޭ ފޯމް، ގަލޮޅު ދަނޑުގައި ހުންނަ ހޭންޑްބޯލް އެސޯސިއޭޝަން އޮފް މޯލްޑިވްސްއިން ލިބެން ހުންނާނެ ކަމަށެވެ.