ހޯމަ ދުވަހުން ފެށިގެން ހުރިހާ ކުޅުންތެރިން އެކުގައި ތަމްރީނުކުރުމުގެ ހުއްދަ ސްޕެނިޝް ލީގުގެ ކްލަބުތަކަށް ދީފި އެވެ.

ހޯމަ ދުވަހުން ފެށިގެން ހުރިހާ ކުޅުންތެރިން އެކުގައި ތަމްރީނުކުރުމުގެ ހުއްދަ ކްލަބުތަކަށް ދިންއިރު، ހުކުރު ދުވަހު ލަލީގާ އިން ވަނީ ޖޫން މަހުގެ 11 ވަނަ ދުވަހު ލީގު އަލުން ފަށަން ނިންމާފައެވެ.

ލީގު އަލުން ފަށާނެ ތާރީޚެއް ލަލީގާގެ ރައީސް ހާވިއޭ ޓެބާސް އިއުލާން ކުރެއްވީ، ޖޫން މަހުގެ އަށްވަނަ ދުވަހުން ފެށިގެން ސްޕެނިޝް ލީގުގެ ކުޅުން ކުރިއަށް ގެންދެވޭނެ ކަމަށް ސްޕެއިންގެ ބޮޑު ވަޒީރު ޕެޑްރޯ ސަންޗޭޒް މީގެ ކުރިން ވިދާޅުވުމާ ގުޅިގެންނެވެ.

އަންނަ ހޯމަ ދުވަހުން ފެށިގެން ހުރިހާ ކުޅުންތެރިން އެކުގައި ތަމްރީނުކުރުމުގެ ހުއްދަ ސްޕެނިޝް ލީގުގެ ކްލަބުތަކަށް ދިންއިރު، މި މަހުގެ ކުރީކޮޅު ކުޅުންތެރިން ވަކިން ތަމްރީނުތައް ހެދުމުގެ ހުއްދަ ދިނެވެ. އަދި މިމަހުގެ 18 ވަނަ ދުވަހުން ފަށައިގެން 10 ކުޅުންތެރިން އެކުގައި ތަމްރީނުތައް ހެދުމުގެ ހުއްދަ ދިންއިރު، މިދިޔަ ހޯމަ ދުވަހު ވަނީ 14 ކުޅުންތެރިން އެކުގައި ތަމްރީނުތައް ހެދުމުގެ ހުއްދަ ދީފައެވެ.

އަންނަ ހޯމަ ދުވަހުން ފެށިގެން ހުރިހާ ކުޅުންތެރިން އެކުގައި ތަމްރީނުތައް ހެދުމުގެ ހުއްދަ ދިންއިރު، ސްޕެއިންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ވަނީ ކޮވިޑް-19ށް މީގެ ކުރިން ޓެސްޓު ކޮށްފަ އެވެ. އެއާއެކު ދެ ޑިވިޝަނުން މީގެ ކުރިން ފަސް ކުޅުންތެރިއަކު ވަނީ ކޮވިޑް-19ށް ޕޮޒިޓިވްވެފަ އެވެ.

ޖޫން މަހުގެ 11 ވަނަ ދުވަހު ސްޕެނިޝް ލީގު އަލުން ފަށާއިރު، އެއްވަނައިގައި އޮތް ބާސެލޯނާ އާއި ދެވަނައިގައި އޮތް ރެއާލް މެޑްރިޑާއި ދެމެދު އޮތީ ދެ ޕޮއިންޓުގެ ފަރަގެކެވެ. ބާސާ އަށް 27 މެޗުން 58 ޕޮއިންޓު ލިބިފައިވާއިރު، ރެއާލަށް ވަނީ 27 މެޗުން 56 ޕޮއިންޓު ލިބިފައެވެ.