ޕޯސްޓްގެ ޒަރިއްޔާ އިން ބެލްޖިޔަމް އިން ރާއްޖެއަށް އެތެރެކުރަން އުޅުނު މަސްތުވާތަކެތި 24 ޖަނަވަރީ 2019 ވި ބުރާސްފަތި ދުވަހު ކަސްޓަމްސުން އަތުލައިގެންފިއެވެ.

ކަސްޓަމްސުން ބުނީ ޕޯސްޓުން ގެނައި ޕާރުސަލެއް، އޭގެ ވެރިފަރާތުގެ ޚާޒިރުގައި ކަސްޓްމްސް އިން ކެނޑިއިރު މަސްތުވާތަކެއްޗައް ޝައްކުކުރެވޭ 1943 ގުޅަ (ބަރުދަނުގައި 1105 ގްރާމް) ފެނިފައިވާ ކަމަށެވެ. އަދި އެތަކެތި ކަސްޓަމްސުން ޓެސްޓް ކުރާއިރު މަސްތުވާތަކެތީގެ ބާވަތެއް ކަމުގައިވާ އެމްޑީއެމްއޭ (އެކްސްޓަސީ) ޕޮސިޓިވް ވެފައިވާ ކަމަށް ވެސް ކަސްޓަމްސުން ބުންޏެވެ.

އަތުލައިގަނެވުނު މަސްތުވާތަކެތި މިހާރު މޯލްޑިވްސް ޕޮލިސް ސަރވިސްއާ ޙަވާލުކުރެވިފައިވާއިރު، އެ މައްސަލަ ފުލުހުން ދަނީ އިތުރަށް ތަޙްޤީގްކުރަމުންނެވެ.