އާ މަޖިލީހަށް ހުށަހަޅާނެ ބިލްތަކާ ގުޅޭ މަސައްކަތު ބައްދަލުވުމެއް އެމްޑީޕީން ފަށައިފި
26 ޖެނުއަރީ 2019 | ހޮނިހިރު 08:54ބައްދަލުވުމަށް ފަހު ބިލްތަކާ ގުޅޭ މައުލޫމާތު ރައްޔިތުންނާ ހިސާބަށް ފޯރުކޮށްދޭނެ
އެމްޑީޕީން ހޮނިހިރު ދުވަހު ފެށި މަސައްކަތު ބައްދަލުވުގެ ތެރެއިން:-
ކުރިއަށް އޮތް ރައްޔިތުންގެ މަޖިލީހަށް އެމްޑީޕީން ހުށައަޅަން ގަސްތުކޮށްފައިވާ ބައެއް ބިލްތަކާ ބެހޭ މައުލޫމާތު ހިއްސާކޮށް ހިޔާލު ހޯދުމަށް އެމްޑީޕީގެ ކެންޑިޑޭޓުންނާއެކު މަސައްކަތު ބައްދަލުވުމެއް ފަށައިފިއެވެ.
ހޮނިހިރު ދުވަހުގެ ހެނދުނު ފެށި މި މަސައްކަތު ބައްދަލުވުމުގައި އެންމެ އެންމެ އިސްކޮން ހުންނެވީ އެމްޑީޕީގެ ރައީސް އަދި ކުރީގެ ރައީސުލް ޖުމްހޫރިއްޔާ މުހައްމަދު ނަޝީދެވެ. އެމްޑީޕީގެ ޓިކެޓް ކަށަވަރުވެފައިވާ ހުރިހާ ކެންޑިޑޭޓުނަށް ދައުވަތު ދީގެން ފެށި މި ބައްދަލުވުމުގައި 19 ވަނަ ރައްޔިތުންގެ މަޖިލީހަށް ހުށަހައަޅަން ނިންމާފައިވާ ބައެއް ބިލްތައް ޕްރެޒެންޓޭޝަނެއްގެ ގޮތުގައި ވަނީ ހުށައަޅާފައެވެ. އެ ބިލްތަކަށް މަޖިލީހަށް ފޮނުވުމުގެ ކުރިން އެ ބިލްތަކަށް ގެންނަން ބޭނުންވާ ބަދަލުތަކާ ގުޅޭ ގޮތުން ކެންޑިޑޭޓުންގެ މެދުގައި ވަނީ މަޝްވަރާ ކުރުމަށް ވަނީ ނިންމާފައެވެ.
ބައްދަލުވުމުގައި މަޝްވަރާ ކުރުމަށް ހަމަ ޖެހިފައިވާ މައުލޫތަކުގެ ތެރޭގައި ބޯހިޔާވަހިކަން ފޯރުކޮށްދިނުމާއި، ލާމަރުކަޒު ކުރުމާއި، އަމިއްލަ އާމްދަނީން ޓެކްސް ނެގުމާއި، އެންމެ ކުޑަ އުޖޫރަ ކަނޑައެޅުމާއި، ދަރިވަރުންގެ ދަރަންޏާއި، އަން އެމްޕޮއިމެންޓް ބެނެފިޓް ދިނުމާއި، ވަލާއި ފަރުތައް ހިމާޔަތްކޮށް ބެލެހެއްޓުމާއި، ފެނާއި ކަރަންޓްގެ އަގު ހެޔޮ ކުރުމާއި، ދަތުރުފަތުރާއި، މަހުގެ ހަމަ އަގާއި، ޖަވާބު ދާރީ ކުރުވަނިވި ދައުލަތެއް ބިނާ ކުރުމާއި، އެގްރި ވިޔަފާރިއާއި، ޓްރާސްސިޝަނަލް ޖަސްޓިސް އާއި ޓުއަރިޒަމް އާއި ގެސްޓް ހައުސްގެ އިތުރުން ޖުޑިޝަރީ އިސްލާހް ކުރުމާއި، ރައްޔިތުންގެ މަޖިލީހުގެ މެމްބަރުންގެ ނަޒާހަތްތެރިކަން ހިމެނެއެވެ.
އެމްޑީޕީން ހޮނިހިރު ދުވަހު ފެށި މަސައްކަތު ބައްދަލުވުމުގައި ރައީސް ނަޝީދު ވާހަކަފުޅު ދައްކަވަނީ
މި ބައްދަލުވުން ފައްޓަވާ ދެއްވަމުން ރައީސް ނަޝީދު ވިދާޅުވީ އެމްޑީޕީން މަޖިލިސް އިންތިހާބު ކާމިޔާބު ކުރާނެ ކަމަށާއި އެކަމަށް ބޭނުންވާ ހުރިހާ ވަސީލަތްތަތަކާއި ސިޔާސަތުތައް އެބަ ހުރި ކަމަށެވެ.
އަދި ވިދާޅުވީ މި މަސައްކަތު ބައްދަލުވުމަށް ފަހު އާންމުންނަށް ބަހާނެ ލީފްލެޓްތައް ތައްޔާރު ކުރެވިގެންދާނެ ކަމަށެވެ. އަދި އެހެންމެ ރައްޔިތުންނާ މުހާތަބުކޮށް ކެންޑިޑޭޓުން ދައްކާނެ ވާހަކަތަކުގެ ނުކުތާތަކާއި ބެނާތައް މި ބައްދަލުވުމަށް ފަހު ރައްޔިތުންނާ ހިސާބަށް ދާނެ ކަމަށެވެ.
