އަމިއްލަ ރައްކާތެރިކަމާމެދު ދިވެހިން އިންތިހާއަށް އިހުމާލުވެފައިވާކަން ސާބިތުވާ ވީޑިއޯއެއް!

އަމިއްލަ ރައްކާތެރިކަމާ މެދު ދިވެހިން އިހުމާލުވެފައިވާ މިންވަރު ހާމަވާ ވީޑިއޯއެއް އަނެއްކާ ވެސް މީސްމީޑިއާގައި އާންމުވެއްޖެއެވެ.

މޯލްޑިވްސް ނޭޝަނަލް ކޮންސްޓްރަކްޝަން އެސޯސިއޭޝަން އޮފް މޯލްޑިވްސް (އެމްއެންއޭސީއައި) އިން ހުކުރު ދުވަހު އާންމުކުރި ވީޑިއޯއަކުން ފިރިހެނަކު ކުޑަ ދެ ކުދިންނާ އެކު އުސް އިމާރާތަކުން ޖެހިގެން ހުރި ގޭގެ ފުރާޅަށް އަރަން މަސައްކަތްކުރާ މަންޒަރު ފެނިގެން ދެއެވެ.

އެ ވީޑިއޯ އިން ފެންނަނީ ކުޑަ ފިރިހެން ކުއްޖަކު އެ އިމާރާތުގެ ބޭރުގައި ހަރުކޮށްފައި ހުުރި ހަރުގަނޑަކުން އަމިއްލައަށް ފައިބާތަނެވެ. އެ އަށް ފަހު ފިިރިހެން މީހާ ކުޑަ އަންހެން ކުއްޖަކާ އެކު އެ ހަރުގަނޑުން ފައިބާއިރު، ހަރުގަނޑަށް ފޭބުމަށް ހިނގަން ޖެހެނީ ވަރަށް ނުރައްކާތެރި ގޮތަކަށް އޮންނަ ހަނި ފާރުކޮޅެއް މަތިންނެވެ. އަދި ހަރުގަނޑުން ފައިބާއިރު ވެސް އެއްވެސް ސަލާމަތީ ފިޔަވަޅެއް އަޅާފައި ނުވާކަން ވީޑިއޯ އިން ފެނިގެން ދެއެވެ.

މާލޭގައި މި ފަހަކަށް އައިސް އިމާރަތް ކުރާ ތަންތަނުގައި ނުރައްކާތެރި އެކި ހާދިސާތައް ހިނގަމުންދާއިރު، އެމްއެންއޭސީއައި އިން ވަނީ ކޮންމެ މީހަކު ވެސް އަމިއްލަ ސަލާމަތާއި ރައްކާތެރިކަން އިސްކުރުމަށް އިލްތިމާސްކޮށްފައެވެ.