އެފްއޭއެމްގެ ރައީސްކަމުން އިތުބާރު ގެއްލިފައިވާ ބައްސާމް ދުރުކުރަންޖެހޭ؟

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ކަމަށް ބައްސާމް އަދީލް ޖަލީލް ގެނައީ އެތައް ބަޔެއްގެ ބުރަ މަސައްކަތުންނެވެ. ބައްސާމް މަގާމާ ހަވާލުވީ ބޮޑު ޓީމެއްގެ އިތުބާރާއެކުގައެވެ. އޭނާގެ ފަހަތުގައި ގިނަ ބަޔަކު އޭރު ތިއްބެވެ. ނަމަވެސް އޭގެ ތެރެއިން ގިނަ ބަޔަކު ވަނީ ބައްސާމްގެ އިތުބާރު ގެއްލިފައިވާ ކަމަށް ބުނެ، ކުރި ތާއީދު އަނބުރާ ގެންގޮސްފައެވެ. ގިނަ ބަޔަކު ހިފާފައިހުރީ މަގާމުން ބައްސާމް ދުރުކުރާށެވެ. ސަބަބުތައް ބައިވަރެވެ.

އެފްއޭއެމްގެ ރައީސްކަމުގެ މަގާމާ ބައްސާމް ހަވާލުވީ އެތައް ވައުދުތަކެއް ވެގެންނެވެ. ސިޔާސީ ނުފޫޒުން އެފްއޭއެމް ސަލާމަތްކުރާނެ ކަމަށް ވިދާޅުވިއެވެ. ލީޑާޝިޕްގައި ހިމެނޭ ސިޔާސީ ބޭފުޅުން ދުވަސްގަނޑަކަށްފަހު ދުރުކުރާނެ ކަމަށް ވިދާޅުވިއެވެ. ނަމަވެސް މިއަދާ ހަމައަށްވެސް އެފްއޭއެމްގެ އެގްޒެކެޓިވް ކޮމިޓީ (އެކްސްކޯ) ގައި ރައްޔަތުންގެ މަޖިލިސްގެ ބައެއް މެމްބަރުން ހިމެނެއެވެ. އެކްސްކޯއަކީވެސް ނަމަކަށް އޮންނަ އެއްޗަކަށް ވަނީ ވެފައެވެ. އެ ކޮމިޓީން ބައްދަލުވުމެއް ބާއްވަނީ ހާލަކުން ފަހަރެކެވެ.

އެފްއޭއެމްގެ ކަންކަން ކުރިޔަށްދާނީ ވަރަށް ބޮޑަށް ދެފުށް ފެންނަ ގޮތަށް ކަމަށް މަގާމާ ހަވާލުވިއިރު ބައްސާމް ވިދާޅުވިއެވެ. ނަމަވެސް ފަހުން އައިސް މީޑިއާތަކާ ބައްސާމް ދުރުވިއެވެ. އެފްއޭއެމްގެ ގިނަ ކަންކަން ސިއްރުކުރަން ފެށިއެވެ. ބޮޑެތި ބަދަލުތަކެއް ގެންނައިރު މަޝްވަރާއެއް ނުކުރެއެވެ. އެފްއޭއެމްގެ ކަންކަމާ ނުވެސް ބެހޭ މީހުން ޗެއާކޮށްގެން ބައްދަލުވުންތަކެއް ބޭއްވުމަށްފަހު ކުއްލިއަކަށް ބަޔާންތައް ނެރެއެވެ. މިއީ ކަން ހިނގާ އުސޫލެވެ. އެފްއޭއެމްއަކީ ތިމާމެންގެ އަމިއްލަ ހަރު މުދަލެއް ކަހަލައެވެ.

ބައްސާމް އިންތިހާބުކުރުމަށް ނިކުތް ޓީމު. ގިނަބަޔަކު މިހާރު ފަހަތުގައި ނެތްއިރު، ތާއީދުވެސް ވަނީ އަނބުރާ ގެންގޮސްފައި

އެފްއޭއެމްގެ ލީޑާޝިޕް ބަދަލުކުރަން ކްލަބްތަކުން ތެދުވެފައި ކަމަށް މައުލޫމާތު ލިބެއެވެ. އެފްއޭއެމްގެ ލީޑާޝިޕް ބަދަލުކުރެވޭނީ 12 ކްލަބްގެ ސޮޔާއެކު އެކްސްޓްރާ އޯޑިނަރީ ކޮންގްރެސްއެއް ބާއްވާ ބައްސާމްގެ އިތުބާރު ނެތްކަމުގެ ވޯޓެއް ނަގާ، މަގާމުން ދުރުކޮށްގެންނެވެ. އެއީ ފުރަތަމަ ކުރަން ޖެހޭ ކަމެވެ.

އެގޮތުން މައުލޫމާތު ލިބޭގޮތުގައި ބައްސާމް މަގާމު ދުރުކުރުމަށް، ފުރަތަމަ ޑިވިޝަންގެ ފަސް ކްލަބްގެ ސޮޔާއެކު، ޖުމްލަ 15 ކްލަބެއްގެ ސޮއި މިހާރު ވަނީ ހޯދާފައެވެ. އަދި އަންނަ ހަފްތާގައި އެކްސްޓްރާ އޯޑިނަރީ ކޮންގްރެސް ބާއްވާނެ ކަމަށްވެސް މައުލޫމާތު ވަނީ ލިބިފައެވެ.

ގަބޫލުކުރަން ބޭނުންވިޔަސް ނުވިޔަސް ކަރަޕްޝަނުން ފުރިގެންވާ، ގިނަ ބަޔަކު އިތުބާރުނުކުރާ އަދި އެތައްބަޔެއްގެ ނުފޫޒު ވަދެފައިވާ އެފްއޭއެމް ސަލާމަތްކުރަން ސަރުކާރުންވެސް ބޭނުންވެއެވެ. ކްލަބްތަކުންވެސް ބޭނުންވެއެވެ. ފުޓުބޯޅައިގެ މުޅި އާއިލާވެސް ބޭނުންވެއެވެ. އެގޮތުން އެންމެން އިއްތިފާގުވާގޮތުން އެފްއޭއެމް ސަލާމަތްކުރެވޭނީ މަގާމުން ބައްސާމް ދުރުކޮށް، މިހާރު އޮތް ލީޑާޝިޕް ބަދަލުކޮށްގެންނެވެ.