ސާރާ ދެން ފެނިގެންދާނީ ކޮން ފިލްމަކުން؟
25 ޖެނުއަރީ 2019 | ހުކުރު 07:24ސާރާ ކުޅުމަށް ހަމަޖެހިފައިވަނީ ބައޯޕިކް އެއް
ސާރާ އަލީ ޚާން
ސާރާ އަލީ ޚާން ބޮލީވުޑަށް ތަޢާރަފު ވެގެން ގޮސްފައިވާ ފިލްމް "ކެދަރްނާތް" ވެސް ވެގެން ގޮސްފައިވަނީ ބޮކްސް އޮފީހުގައި ކާމިޔާބު ފިލްމަކަށެވެ.
އެއަށް ފަހު ސާރާ ދެން ފެނިގެން ގޮސްފައިވަނީ ރަންވީރު ސިންގް އާއި އެކު "ސިމްބާ" އިންނެވެ.
ސިމްބާގެ ކާމިޔާބީއަށް ފަހު ސާރާ އިތުރު ބޮޑު ފިލްމެއް ކުޅުމަށް ހަމަޖެހިފައިވާ ކަމަށް ރިޕޯޓްތައް ވަނީ ބުނެފައެވެ.
ފިލްމް ފެއަރގައި ރިޕޯޓްކޮށްފައިވާ ގޮތުން ސާރާ ދެން ފެނިގެން ދާނީ ބައޯޕިކް އަކުންނެވެ. އަދި މިފިލްމްގައި ސާރާ އަދާ ކުރާ ރޯލް އޭނާ ކުރިން ކުޅެފައިވާ ދެފިލްމާއި މުޅިން ތަފާތުވާނެ ކަމަށެވެ.
ސިމްބާ އާއި ކެދަރްނާތުގެ ކާމިޔާބަށް ފަހު ސާރާ ވަނީ އޭނާއަކީ މޮޅު ބަތަލާއެއް ކަން ދައްކުވައިދީފަ އެވެ. މި ދެ ފިލްމަށްފަހު ސާރާއަށް ދަނީ ގިނަ ފިލްމްތަކުން ޖާގަ ލިބެމުންނެވެ.
ސާރާ މިހާރު ސޮއި ކޮށްފައިވާ ފިލްމަކީ ކަރަން ޖޯހަރުގެ ދަރްމާ ޕްރޮޑަކްޝަނުން އުފައްދާ ފިލްމެއް ކަމަށާއި އަދި އެއީ ބައޯޕިކްއެއް ކަމަށް ރިޕޯޓްކޮށްވެއެވެ.
"ސާރާއަށް އެ ފިލްމްގެ ސްކްރިޕްޓް ވަރަށް ކަމުދިޔަ އަދި ފިލްމަށް އާއެކޭ ބުނުމަށް ގިނަ ވަގުތެއްވެސް އޭނާ ނުނަގާ" ފިލްމް ފެއަރ ގައި ރިޕޯޓްކޮށްފައި ވެއެވެ.
