މިދިޔަ މަހު ރާއްޖެއަށް 4.2 ބިލިއަން ރުފިޔާގެ މުދާ އިމްޕޯޓްކޮށްފައިވޭ: ކަސްޓަމްސް

ފާއިތުވި ޑިސެމްބަރ މަހު ރާއްޖެއަށް އިމްޕޯޓު ކުރެވުނު މުދަލުގެ ސީއައިއެފް އަގު 2017 ވަނަ އަހަރުގެ ޑިސެމްބަރ މަހާ އަޅާބަލާއިރު 9 އިންސައްތަ މޯލްޑިވްސް ކަސްޓަމްސް ސާރވިސްގެ ތަފާސް ހިސާބުތަކުން ދައްކައިފިއެވެ.

ތަފާސް ހިސާބުތަކުން ދައްކާ ގޮތުގައި 2017 ވަނަ އަހަރުގެ ޑިސެމްބަރ މަހު ދިވެހިރާއްޖެއަށް 3.9 ބިލިއަން ރުފިޔާގެ މުދާ އިމްޕޯޓްކޮށްފައިވާއިރު މިދިޔަ އަހަރުގެ ޑިސެމްބަރު މަހު މި އަދަދު ވަނީ 4.2 ބިލިއަން ރުފިޔާއަށް އިތުރުވެފައެވެ. މިއީ އެ މުއްދަތާ އަޅާބަލާއިރު 9 އިންސައްތަ އިތުރުވުމެކެވެ. އަދި 2017 ވަނަ އަހަރުގެ ޑިސެމްބަރު މަހު 444.6 މިލިއަން ރުފިޔާގެ މުދާ ރާއްޖެއިން އެކްސްޕޯޓްކޮށްފައިވާއިރު މިދިޔަ އަހަރުގެ ޑިސެމްބަރު މަހު އެކްސްޕޯޓްކޮށްފައި ވަނީ 525 މިލިއަން ރުފިޔާގެ މުދަލެވެ. މިއީ 18 އިންސައްތަ އިތުރުވުމެކެވެ.

މީގެ އިތުރުން 2017 ވަނަ އަހަރުގެ ޑިސެމްބަރު މަހު 285 މިލިއަން ރުފިޔާ ދައުލަތުގެ އާމްދަނީގެ ގޮތުގައި ލިބިފައިވާއިރު މިދިޔަ އަހަރު އާމްދަނީގެ ގޮތުގައި ދައުލަށް ލިބިފައި ވަނީ 327 މިލިއަން ރުފިޔާއެވެ. އެހެންކަމުން މިއީ އެ މުއްދަތާ އަޅާބަލާއިރު ވެސް 18 އިންސައްތަ އިތުރުވުމެކެވެ.

މިދިޔަ މަހު އިމްޕޯޓްކުރި މުދަލުގެ އަގުގެ ގޮތުން 16 އިންސައްތަ ސިންގަޕޫރުން އިމްޕޯޓް ކޮށްފައިވާއިރު، ޔޫ.އޭ.އީ އިން 15 އިންސައްތަ އަދި ޗައިނާއިން 12 އިންސައްތަ މުދާ ވަނީ އެތެރެކޮށްފައި ވެއެވެ.

މީގެ އިތުރުން މިދިޔަ އަހަރުގެ ޑިސެމްބަރު މަހު އެންމެ ގިނައިން ރާއްޖެއިން މުދަލުގެ އަގުގެ ގޮތުން، ތައިލެންޑަށް 58 އިންސައްތަ، ޖަރުމަންވިލާތަށް 10 އިންސައްތަ އަދި އިނގިރޭސިވިލާތަށް 5 އިންސައްތަ މުދާ ވަނީ އެކްސްޕޯޓްކޮށްފައެވެ.