ލޯން އެއްބަސްވުމެއްގެ ދަށުން އޭސީ މިލާނަށް ކުޅެމުން އަންނަ އާޖެންޓީނާގެ ފޯވާޑް ގޮންޒާލޯ ހިގުއެން ޗެލްސީއަށް ބަދަލުވެއްޖެއެވެ.
ޔުވަންޓަސްގެ ލޯނެއްގެ ދަށުން މި ސީޒަނުގައި ހިގުއެން އޭސީ މިލާނަށް ކުޅެމުންދިޔަ ނަމަވެސް އެ ލޯން ކެންސަލްކޮށް، ޔުވަންޓަސްއިން ވަނީ ލޯނެއްގެ ދަށުން މި އަހަރުގެ ނިޔަލަށް ހިގުއެން ޗެލްސީއަށް ދޫކޮށްފައެވެ.
ލޯނެއްގެ ދަށުން މިއަހަރުގެ ނިޔަލަށް ހިގުއެން ޗެލްސީއަށް ދޫކުރި ނަމަވެސް އެއްބަސްވުމުގައިވާ ގޮތުން 31.6 މިލިއަން ޕައުންޑު ޔުވަންޓަސްއަށް ދިނުމަށްފަހު ހިގުއެން ގަތުމުގެ ފުރުސަތު ޗެލްސީއަށް އެބައޮތެވެ. އަދި 15.7 މިލިއަން ޕައުންޑު ދިނުމަށްފަހު 2020 ވަނަ އަހަރުގެ ނިޔަލަށް ހިގުއެންގެ ލޯން އެއްބަސްވުން އާކުރުމުގެ ފުރުސަތު ޗެލްސީއަށް އޮންނާނެއެވެ.
It's official!@G_Higuain is a Blue! #HiguaIN
— Chelsea FC (@ChelseaFC) January 23, 2019
ޗެލްސީއާ ގުޅުމަށްފަހު ހިގުއެން ބުނީ، ޗެލްސީފަދަ ކްލަބަކާ ގުޅުމަށް ލިބޭ ފުރުސަތަކީ ދޫކޮށްލެވޭވަރުގެ ފުރުސަތެއް ނޫން ކަމަށާއި، އަބަދުވެސް ޗެލްސީއަށް ކުޅެން ބޭނުންވެފައި ހުރި ކަމަށެވެ.
އުމުރުން 31 އަހަރުގެ ހިގުއެން ޗެލްސީއަށް ކުޅޭ ފުރަތަމަ މެޗަށް ވެގެންދާނީ ބުރާސްފަތި ދުވަހު ލީގް ކަޕްގައި ޓޮޓެންހަމް ހޮޓްސްޕާއާ ދެކޮޅަށް ކުޅޭ މެޗެވެ. ހިގުއެން ބޭނުންކުރާނީ ނުވަ ނަމްބަރު ޖޯޒީއެވެ.
ރިވާ ޕްލޭޓުން 2004 ވަނަ އަހަރު ކެރިޔަރު ފެށި ހިގުއެން ވަނީ އެ ކްލަބަށް 41 މެޗު ކުޅެ، 15 ލަނޑު ކާމިޔާބުކޮށްފައެވެ. އެއަށްފަހު އޭނާ ބަދަލުވީ 2006 ވަނަ އަހަރުގެ ސީޒަނުގައި ރެއާލްއަށެވެ.
އޭނާ ވަނީ ރެއާލްއަށް ކުޅުނު 264 މެޗުގައި 121 ލަނޑު ކާމިޔާބުކޮށްފައެވެ. އަދި ރެއާލްއާއެކު ހިގުއެން ވަނީ ތިން ލަލީގާ، އެއް ކޮޕާޑެލްރޭ އަދި ދެ ސްޕެނިޝް ސުޕާ ކަޕް ކާމިޔާބުކޮށްފައެވެ.
Stamford Bridge.
— Chelsea FC (@ChelseaFC) January 24, 2019
Gonzalo's in! #HiguaIN pic.twitter.com/H2ipWCqI6d
ރެއާލް ދޫކޮށް ހިގުއެން ދެން ގުޅުނީ 2013 ވަނަ އަހަރުގެ ސީޒަނުގައި ނަޕޯލީއާ އެވެ. އޭނާ ވަނީ ނަޕޯލީއަށް ކުޅުނު 146 މެޗުގައި 91 ލަނޑު ކާމިޔާބުކޮށް، އެޓީމާއެކު ކޮޕާ އިޓަލިއާ އަދި އިޓާލިއަން ސުޕާ ކަޕް ކާމިޔާބުކޮށްފައެވެ.
ހިގުއެން ވަނީ 2016 ވަނަ އަހަރުގެ ސީޒަނުގައި ޔުވަންޓަސްއަށް ބަދަލުވެ އެޓީމަށް ކުޅުނު 105 މެޗުގައި 55 ލަނޑު ކާމިޔާބުކޮށް، ދެ ލީގު ތަށި އަދި ދެ ކޮޕާ އިޓަލިއާ ކާމިޔާބުކޮށްފައެވެ.
އާޖެންޓީނާއާއެކު 2014 ވަނަ އަހަރު ބްރެޒިލްގައި ބޭއްވި ވޯލްޑް ކަޕްގެ ދެވަނަ ހޯދި ހިގުއެން ވަނީ ގައުމީ ޓީމަށް މިހާތަނަށް ކުޅުނު 75 މެޗުގައި 31 ލަނޑު ކާމިޔާބުކޮށްފައެވެ.
