އަސްކަރީ ވެރިކަމަށް ފަސް އަހަރު ވާން ގާތްވެފައި ވަނިކޮށް، ތައިލެންޑުގެ އާއްމު އިންތިހާބު މާޗު މަހުގެ 24 ވަނަ ދުވަހު ބާއްވަނެކަން އެ ގައުމުގެ އިލެކްޝަންސް ކޮމިޝަނުން އިއުލާންކޮށްފިއެވެ.
އިލެކްޝަންސް ކޮމިޝަނުން އިންތިހާބު ބާއްވާނެ ތާރީހެއް އިއުލާންކޮށްފައި ވަނީ، މި އަހަރުގެ ތެރޭގައި އިންތިހާބެއް ބޭއްވުމަށް ތައިލެންޑުގެ ރަސްގެފާނު މަހާ ވަޖިރިލޮންކޮރން އަމުރުކުރައްވާފައި ވަނިކޮށެވެ. ތައިލެންޑުގެ ގާނޫނުގައިވާ ގޮތުން ރަސްގެފާނުގެ އަމުރާއި ގުޅިގެން އިލެކްޝަންސް ކޮމިޝަންއަށް ފަސް ދުވަހުގެ ތެރޭގައި އިންތިހާބު ބާއްވާނެ ތާރީހެއް އިއުލާނުކުރަން މަޖުބޫރުވިއެވެ.
މި އިންތިހާބު ވެގެން ދާނީ އަށް އަހަރުގެ ތެރޭގައި ތައިލެންޑުގައި ބާއްވާ ފުރަތަމަ އިންތިހާބަށެވެ. 2014 ވަނަ އަހަރުގެ ތެރޭގައި ކުރީގެ އަސްކަރިއްޔާގެ ޖެނެރަލް އަދި މިހާރުގެ ބޮޑު ވަޒީރު ޕްރަޔުތް ޗަން-އޫޗާ ވަނީ އެ ގައުމުގައި އިންތިހާބުކުރެވިފައި އޮތް ޔިންގްލުކް ޝިނަވަތްރާގެ ސަރުކާރު ބަޢާވާތްކޮށް ވައްޓާލާފައެވެ. އަސްކަރިއްޔާއިން ސަރުކާރު ވައްޓާލާފައި ވަނީ ހަ މަހަށް ދިގު ދެމިގެން ގޮސްފައި އޮތް މުޒާހަރާތަކާއި ގުޅިގެންނެވެ.
ތަފާތު އެތައް ފަހަރެއްގެ މަތިން ޕްރަޔުތް އިންތިހާބު ބާއްވާނެ ކަމަށް ވިދާޅުވެފައި ކޮންމެ ފަހަރަކުވެސް ލަސްކޮށްފައިވާ އިރު، ރަސްގެފާނުގެ އަމުރާއި ގުޅިގެން އިންތިހާބު ބޭއްވޭނެ ކަން ވަނީ ޔަގީންވެފައެވެ. ކުރިޔަށް އޮތް އިންތިހާބުގައި ޕްރަޔުތް ވެސް ވާދަކުރައްވާނެ ކަމަށް ވަނީ ބެލެވިފައެވެ.
މި އިންތިހާބަކީ ޑިމޮކްރަސީއަށް މަސައްކަތް ކުރާ ފަރާތްތަކަށް ލިބުނު ކުރިއެރުމެއް ކަމަކު، ތައިލެންޑުގެ ގާނޫނު އަސާސީއަށް ގެނެސްފައިވާ ބަދަލުތަކާއި އެކު އަސްކަރިއްޔާގެ ބާރު ކެނޑިގެން ނުދާނެ ކަމަށް މާހިރުން ވަނީ ބުނެފައެވެ. އައު ގާނޫނު އަސާސީގައިވާ ގޮތުން މަޖިލީހުގެ ތިރި ގޭގެ 500 ގޮނޑީގެ ތެރެއިން ތިންބައި ކުޅަ އެއްބައިގައި ތިބޭނީ އަސްކަރިއްޔާއިން އައްޔަނުކުރާ ބޭފުޅުންނެވެ. އެ ގައުމުގެ ގާނޫނު ހަދާ މަޖިލީހުގެ މަތިގޭގެ ހުރިހާ (250 ގޮނޑި) މެމްބަރުން އައްޔަނު ކުރަނީ އަސްކަރިއްޔާއިންނެވެ.
