އީސީއިން ޕީއެންސީއާ ޒާތީވެފައިވާ ކަމަށް އަބްދުއްރަހީމް ތުހުމަތުކުރައްވައިފި
23 ޖެނުއަރީ 2019 | ބުދަ 11:395000 ފޯމްގެ ތެރެއިން ސައްހަވެފައިވަނީ 2300 ފޯމް ކަމަށް އަބްދުއްރަހީމް ވަނީ ވިދާޅުވެފައި
ޕީއެންސީ ރެޖިސްޓްރީ ކުރުމުގައި ގާނޫނީ ގޮތުން ދެވެން އޮތް ހުރިހާ މަގަކުން ދާނެ ކަމަށް އެ ޕާޓީން ވަނީ ބުނެފައި
ރައީސް އަބްދުﷲ ޔާމީން އިސްވެ ހުންނަވާ އުފައްދަވަން މަސައްކަތް ކުރައްވަމުން އަންނަ ޕީޕަލްސް ނެޝަނަލް ކޮންގްރެސް (ޕީއެންސީ)އާ އިލެކްޝަންސް ކޮމިޝަންސް (އީސީ) އިން ޒާތީވެފައިވާ ކަމަށް އެ ޕާޓީން ބުނެފިއެވެ.
އިލެކްޝަންސް ކޮމިޝަންސްއާ ދޭތެރޭ ޕީއެންސީން ހުރި ކަންބޮޑުވުންތަކާ ގުޅޭ ގޮތުން އެ ޕާޓީން ބުދަދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ ވިދާޅުވީ އެ ޕާޓީ ރެޖިސްޓްރީ ނުވެ ލަސްވަމުންދަނީ، އީސީން އެ ޕާޓީއާ މެދު ޒާތީކޮށް އަމަލުކުރަމުންދާތީ ކަމަށެވެ.
ޕީއެންސީ އުފެއްދުމުގައި އިސްކޮށް ހުންނަވާ ފަރާތް ކަމަށްވާ އަބްދުއްރަހީމް ވިދާޅުވީ ޕީއެންސީ އިން އީސީއަށް ހުށަހަޅާފައިވާ މެމްބަރޝިޕް ފޯމްތައް ސައްހަ ނޫން ކަމަށް ބުނެ، ކެންސަލްކުރަމުންދާތީ، އެއީ އުސޫލީ މައްސަލައެއްތޯ އޮޅުން ފިލުއްވުމަށް އިސީގެ މެމްބަރު އިސްމާއިލް ހަބީބަށް ގުޅުއްވުމުން ޕީއެންސީގެ ފޯމްތައް ސައްހަކަން ކަށަވަރުނުވެ ލަސްވަމުން ދަނީ "ޒާތީ" މައްސަލައެއް ޕީއެންސީއާ މެދު އޮވެގެން ކަމަށް ހަބީބު ވިދާޅުވެފައިވާ ކަމަށެވެ.
އީސީ އިން އެ ޕާޓީއާ މެދު ޒާތީ ވެފައި ވަނީ ކޮން ސަބަބަކާ ހެދީތޯ ރާއްޖެ އެމްވީން ސުވާލު ދެންނެވުމުން އަބްދުއްރަހީމް ވިދާޅުވެފައި ވަނީ "ރިޔާސީ އިންތިޚާބުގެ އަމަލުތައް" ކަމަށެވެ. އަބްދުއްރަހީމް އާއި ޕީޕީއެމްގެ ލީޑަރޝިޕުން ވަނީ ނިމިދިޔަ ރިޔާސީ އިންތިޚާބު އެ ޕާޓީއަށް ނާކަމިޔާބުވުމުން އީސީގެ މެމްބަރުންނަށް ބޮޑެތި ފާޑުކިޔުންތަކެއް އަމާޒުކޮށް، އީސީގެ މެމްބަރުންގެ ބޮލުގައި ބޮޑެތި ތުހުމަތުތައް އަޅުވާފައެވެ.
ޕީއެންސީގެ ގިނަ މެމްބަރޝިޕް ފޯމްތައް ސައްހަ ނޫން ކަމަށް އީސީން ނިންމުމާ ގުޅިގެން އަބްދުއްރަހީމް ވަނީ އީސީއަށް ވަރަށް ބޮޑަށް ފާޑުވިދާޅުވެފައެވެ. އަބްދުއްރަހީމް ވިދާޅުވީ މި މަހުގެ 9 ވަނަ ދުވަހު 4000 ފޯމް އިސީއަށް ހުށަހެޅިއިރު، އޭގެ ތެރެއިން އީސީއިން ސައްހަ ކަމަށް ކަނޑައެޅީ 1945 ފޯމް ކަމަށެވެ. އިލެކްޝަންސް ކޮމިޝަނުގެ ދަފްތަރުގައި ސިޔާސީ ޕާޓީއެއް ރެޖިސްޓްރީ ކުރާ ނަމަ ސައްހަ 3000 ފޯމް ހުށަހަޅަންޖެހެއެވެ.
"މައްސަލަތައް ޖެހިފައިވާ ފޯމްތައް ދިނުމަށް އީސީގައި އެދުނިން. ދޭނަމޭ ބުނި. އަދިވެސް ނުލިބޭ" އަބްދުއްރަހީމް ވިދާޅުވިއެވެ.
އީސީއިގެ އެދުމުގެ މަތިން އަނެއްކާ ވެސް އާދީއްތަ ދުވަހު އިތުރު 1100 ފޯމް އީސީ އަށް ހުށަހެޅި ކަމަށާއި، އެ ފޯމްތަކުގެ ތެރެއިން ވެސް ސައްހަ ކަމަށް އީސީން ނިންމާފައި ވަނީ އެންމެ 300 ފޯމް ކަމަށް އަބްދުއްރަހީމް ވިދާޅުވިއެވެ. އީސީއަށް ޖުމްލަ 5000 ފޯމް ހުށަހެޅިއިރު، އޭގެ ތެރެއިން އެންމެ 2300 ފޯމް ސައްހަ ކަމަށް އީސީ އިން ނިންމުމުން، އެއީ "ޒާތީވުން" ނޫންތޯ އަބްދުއްރަހީމް ވަނީ ސުވާލު އުފައްދަވާފައެވެ. އަބްދުއްރަހީމް ވަނީ އީސީއިން އެ ޕާޓީއާ މެދު އަމަލުކުރަމުންދާ ގޮތުން އެ ޕާޓީ އަވަސް މުސްތަގްބަލެއްގައި ރަޖިސްޓްރީ ވާނެ ކަމާ މެދު ސުވާލު އުފައްދަވާފައެވެ.
ރައްޔިތުންގެ މަޖިލީހުގެ ޕްރައިމަރީ މި މަހުގެ 26 ވަނަ ދުވަހުގެ ކުރިން ބާއްވާ ނިންމަންޖެހޭއިރު، ޕީއެންސީ ރެޖިސްޓަރ ކުރުން އީސީން ލަސްކުރަނީ ރައްޔިތުންގެ މަޖިލީހުގައި ވާދަކުރުމުގެ ފުރުސަތު އެ ޕާޓީއަށް ގެއްލުވާލުމަށް ކަމަށް އަބްދުއްރަހީމް ވަނީ ތުހުމަތުކުރައްވާފައެވެ.
"ރައީސް ޔާމީންގެ ފަރާތުން ވާދަކުރާ ކެންޑިޑޭޓުންނަށް ވާދަކުރުމުގެ ފުރުސަތު ގެއްލުވާލުމުގެ ގޮތުން އީސީއިން އެހެން ހަދަނީ" އަބްދުއްރަހީމް ވިދާޅުވިއެވެ.
ޕީއެންސީ ރެޖިސްޓްރީ ކުރުމުގައި ޤާނޫނީ ގޮތުން ކުރިއަށް ދެވެން އޮތް، ހުރިހާ ގޮތަކުން ކުރިއަށްދާނެ ކަމަށް އެ ޕާޓީން ވަނީ ބުނެފައެވެ.
