އިންޑިއާ ކަނޑުގެ ސަލާމަތަށް އެމެރިކާއާ ރާއްޖޭގެ ގުޅުން މުހިއްމު: ޝާހިދު
23 ޖެނުއަރީ 2019 | ބުދަ 11:51އިންޑިއާ ކަނޑުގެ ސަލާމަތާއި ރާއްޖޭގެ ސަލާމަތާ ވެސް ގުޅިފައިވާ ކަމަށް މިނިސްޓަރު ވަނީ ވިދާޅުވެފައި
އެމެރިކާގެ ވެރިރަށް ވޮޝިންޓަންގައި ޤާއިމްކޮށްފައިވާ ތިންކްޓޭންކެއްކަމަށްވާ ސެންޓަރ ފޮރ ސްޓްރެޓީޖިކް އެންޑް އިންޓަރނޭޝަނަލް ސްޓަޑީޒްގައި އޮތް ބައްދަލުވުމުގެ ތެރެއިން
އިންޑިއާ ކަނޑުގެ ސަލާމަތާއި ރައްކާތެރިކަން ކަށަވަރުކުރުމުގައި ރާއްޖެ އާއި އެމެރިކާއާ ދެމެދު އޮންނަ ގުޅުން މުހިއްމު ކަމަށް ޚާރިޖީ ވަޒީރު އަބްދުﷲ ޝާހިދު ވިދާޅުވެއްޖެއެވެ.
މިނިސްޓަރު ޝާހިދު މިފަދައިން ވިދާޅުވީ އެމެރިކާގެ ވެރިރަށް ވޮޝިންޓަންގައި ޤާއިމްކޮށްފައިވާ ތިންކްޓޭންކެއް ކަމަށްވާ ސެންޓަރ ފޮރ ސްޓްރެޓީޖިކް އެންޑް އިންޓަރނޭޝަނަލް ސްޓަޑީޒްގައި އޮތް ވަށްމޭޒު މަޝްވަރާއެއްގައި ވާހަކަ ދައްކަވަމުންނެވެ. މިނިސްޓަރ ޝާހިދު ވިދާޅުވީ އެމެރިކާ އާއި ރާއްޖެއާ ދެމެދު ބަދަހި ގުޅުމެއް އޮތުމަކީ އިންޑިއާ ކަނޑު ސަރަހައްދުގެ އިތުރުން މުޅި ދެކުނު އޭޝިއާ ސަރަހައްދުގެ ސަލާމަތަށާއި، ސަރަހައްދީ އަދި ބައިނަލްއަޤްވާމީ ފެންވަރުގައި ރާއްޖެ އިތުރަށް ބާރުގަދަވުމަށް ވެސް މުހިއްމު ކަމެއް ކަމަށެވެ.
މީގެ އިތުރުން އިންޑިއާ ކަނޑުގެ ސަލާމަތާ ރާއްޖޭގެ ސަލާމަތާ ވެސް ގުޅިފައިވާ ކަމަށް މިނިސްޓަރ ޝާހިދު ފާހަގަކުރެއްވިއެވެ. އިންޑިއާ ކަނޑުގެ ސަލާމަތާ ބެހޭ ގޮތުން އެމެރިކާގައި މިނިސްޓަރ ޝާހިދު ވާހަކަ ދައްކަވާފައި މިވާ ދަނޑިވަޅަކީ އެމެރިކާގެ ސްޓްރެޓީޖިކް ވިސްނުން ޕެސިފިކް އަދި އިންޑިއާ ކަނޑުގެ ސަރަހައްދަށް އަމާޒު ހިފާފައިވާ ދަނޑިވަޅެކެވެ.
މިނިސްޓަރ ޝާހިދު ވޮޝިންޓަނަށް ކުރައްވާ މިދަތުރުފުޅުގައި އެމަނިކުފާނުގެ އަރިހުގައި ފޮރިން މިނިސްޓްރީގެ ސްޓޭޓް މިނިސްޓަރ އަހުމަދު ޚަލީލާއި، ރާއްޖެއިން އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބު އަދި އެމެރިކާއަށް ކަނޑައަޅުއްވާފައި ހުންނަވާ ސަފީރު އަލީ ނަސީރު ބައިވެރިވެވަޑައިގަންނަވައެވެ.
