ފަރެސްމާތޮޑާ ދާއިރާގެ ޕްރައިމަރީގެ މައްސަލަތަކަށް ގޮތެއް ނިންމުމަށް ޤައުމީ މަޖިލީހަށް ހުށަހަޅަނީ
21 ޖެނުއަރީ 2019 | ހޯމަ 13:53އެމައްސަލަތައް އިތުރު ހެއްކާ އެކު ވަނީ ހުށަހަޅާފައި
ޕްރައިމަރީގެ ވޯޓުލުން ކުރިއަށް ގެންދަނީ
ފަރެސްމާތޮޑާ ދާއިރާގެ ވޯޓުފޮށިތަކުގެ މައްސަލަ ގައުމީ މަޖިލީހުން ގޮތެއް ނިންމުމަށް، ޕާޓީގެ ޗެއާޕާސަނަށް ހުށަހެޅުމަށް އެމްޑީޕީ މަޖިލިސް ޕްރައިމަރީއާގުޅޭ ޝަކުވާ ކޮމިޓީން ނިންމައިފިއެވެ.
އެމްޑީޕީން ބުނީ ވޯޓު ލީ ދުވަހު، 48 ފަރާތަކުން ގދ. ރަތަފަންދޫގައި ވޯޓު ކަރުދާސް ފާޅުގައި ދެއްކި ކަމަށް ފަރެސްމާތޮޑާ ދާއިރާގެ ކެންޑިޑޭޓް، ޢަލީ ޝާމް، ޝަކުވާ ކޮމިޓީއަށް ހުށަހެޅުމުން، މި މައްސަލަ ބެލެން ނެތް ކަމަށް ކަނޑައަޅާފައި ވަނިކޮށް، ދާއިރާގެ އެހެން ކެންޑިޑޭޓުން ކަމުގައިވާ ޙަމްދޫން ޢަބްދުﷲ އާއި ފަރީޝާ ޢަބްދުﷲ ވެސް މި މައްސަލަ އާއި އަދި އެހެން މައްސަލަތަކެއް އިތުރު ހެއްކާ އެކު ހުށަހަޅާފައިވާ ކަމަށެވެ.
އެމްޑީޕީން ބުނީ މި ދެ ބޭފުޅުން ވަކިވަކި ހުށަހެޅުއްވި ޝަކުވާގައި ބުނެފައި ވަނީ ވޯޓަކީ ސިއްރު ވޯޓެއް ކަމުގައިވީ ނަމަވެސް، ރަތަފަންދޫގައި ވޯޓުލީ ބައެއް ފަރާތްތަކުން ވޯޓުކަރުދާހުގައި ފާހަގަ ލުމަށް ފަހު އެ ވޯޓު ކަރުދާސް ވޯޓުލާ މަރުކަޒުގެ ބޭރުގައި ތިބި ފަރާތްތަކަށް ދައްކާފައިވާ ކަމަށެވެ. މިކަން މިހެން ހިނގަމުން ދިޔަ ނަމަވެސް އެކަން ވަނީ ނުހުއްޓުވި ކަމަށް ފާހަގަކޮށްފައި ވެއެވެ. އަދި ރަތަފަންދޫގައި ބެހެއްޓި ފޮށްޓައް ލައިފައިވާ ވޯޓެއް ނަގައި، ވޯޓު ކަރުދާސް ވީދާލުމަށް ފަހު އަލުން އިތުރު ކަރުދާހެއް ހޯދައި ވޯޓުލައިފައިވާ ކަމުގެ ޝަކުވާ ވެސް ހުށަހަޅާފައިވާ ކަމަށެވެ.
އެމްޑީޕީން ބުނީ މާލޭގައި ވޯޓުލީ މަރުކަޒު ކަމުގައިވާ އަމީނިއްޔާ ސްކޫލުގެ ކްލާސް 6ޑީ ގައި ހުރި ފޮށްޓަށް، ގަދަވެ ސަލާމަތުން ހުރި މީހަކުގެ ވޯޓު، އެހެން ފަރާތަކުން ލުމާއި ދެ މީހެއްގެ ވޯޓުގައި އެކަކު ފާހަގަ ޖެހުމުގެ މައްސަލަ ވެސް ހުށަހަޅާފައިވާ ކަމަށެވެ.
ކޮމިޓީއަށް ބަޔާންދިން މީހުންގެ ބަޔާންތަކަށް އަލިއަޅުއްވާލައްވާ އެމްޑީޕީން ބުނީ ވޯޓުލުމަށް އެއް ދުވަހަށް ވެފައި ވަނިކޮށް ރަތަފަންދޫގެ ގޭބިސީތަކަށް 5000 ރުފިޔާގެ މަގުން، އެހެން ޕާޓީތަކުން ބަހާފައިވާކަމަށާއި، ވަކި ކެންޑިޑޭޓެއް ހޮވުމަށް އެހެން ޕާޓީތަކުން 6 ލައްކަ ރުފިޔާ ހޭދަކޮށްފައިވާ ކަމަށެވެ.
އެހެންކަމުން، މި މައްސަލަތަކަށް ގޮތެއް ނިންމައި، ދާއިރާއިން އެންމެ ގިނަ ވޯޓު ލިބުނު ކެންޑިޑޭޓުކަމުގައިވާ ފަތުޙުﷲ އަޙްމަދުގެ ކެންޑިޑަސީ ބާޠިލު ކުރުމަށް ނުވަތަ ވޯޓު އަލުން ނެގުމަށް ޤައުމީ މަޖިލީހުން ގޮތެއް ނިންމުމަށްޓަކައި މި މައްސަލަ އެ މަޖިލީހަށް، ޗެއާޕާސަން މެދުވެރިކޮށް، ހުށަހަޅާފައިވާ ކަމަށް އެމްޑީޕީގެ ޝަކުވާ ކޮމިޓީން ވަނީ ނިންމާފައެވެ.
