މެންޗެސްޓާ ޔުނައިޓެޑަށް ކުޅެމުން އަންނަ އެންޑްރޭ ހެރޭރާ ބޭނުންވަނީ އެ ކްލަބުގައި މަޑުކުރަން ކަމަށް ރިޕޯޓްތައް ބުނެފިއެވެ.

މެންޗެސްޓާ އިވްނިން ނިއުސްއިން ބުނީ، ޔުނައިޓެޑާއެކު ހެރޭރާ ހަދާފައިވާ އެއްބަސްވުން މި ސީޒަނަށްފަހު ހަމަވި ނަމަވެސް އޭނާ ބޭނުންވަނީ ކްލަބުގައި މަޑުކުރަން ކަމަށެވެ.

ހެރޭރާ ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުން ކަމަށް ރިޕޯޓްތައް ބުނެއެވެ. އަދި އޭގެ ތެރޭގައި އޭނާ ކުރިން ކުޅުނު އެތުލެޓިކް ބިލްބާއޯވެސް ހިމެނޭ ކަމަށްވެސް ރިޕޯޓްތައް ބުނެއެވެ.

ރެއާލް ޒަރަގޯޒާ އިން 2008 ވަނަ އަހަރު ކެރިޔަރު ފެށި އުމުރުން 27 އަހަރުގެ ހެރޭރާ ވަނީ އެޓީމަށް ޖުމްލަ 86 މެޗު ކުޅެދީ ހަ ލަނޑު ކާމިޔާބުކޮށްފައެވެ. އެއަށް ފަހު ދެން އޭނާ ބަދަލުވީ ބިލްބާއޯއަށެވެ. އެގޮތުން އޭނާ ވަނީ އެޓީމުގައި ހޭދަކުރި ތިން ސީޒަނުގައި ކުޅުނު 128 މެޗުގައި 11 ލަނޑު ކާމިޔާބުކޮށްފައެވެ.

ޔުނައިޓެޑަށް 2014 ވަނަ އަހަރު ބަދަލުވި ހެރޭރާ ވަނީ މިހާތަނަށް އެޓީމަށް ކުޅުނު 179 މެޗުގައި 19 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެޓީމާ އެކު އެފްއޭކަޕް، އެފްއޭކަޕް އަދި ޔުއެފާ ޔޫރޮޕާ ލީގު ވެސް ކާމިޔާބުކޮށްފައެވެ.

ސްޕެއިން ގައުމީ ޓީމަށް ދެ މެޗު ކުޅެފައިވާ ހެރޭރާ ވަނީ އެޓީމާއެކު 21 އަހަރުންދަށޫގެ ޔޫރޯ ފުޓުބޯޅަ މުބާރާތް ވެސް ކާމިޔާބުކޮށްފައެވެ.