ބާސެލޯނާއަށް ކުޅެމުން އަންނަ ބްރެޒިލްގެ މިޑްފިލްޑަރު ފިލިޕޭ ކުޓީނިއޯއަށް ޗެލްސީން ފާރަލަމުން އަންނަ ކަމަށް ރިޕޯޓްތައް ބުނެފިއެވެ.

ދަ އެކްސްޕްރެސްއިން ބުނީ ކުޓީނިއޯ ހޯދުމަށް ޗެލްސީން ބޭނުންވާ ކަމަށާއި، އެގޮތުން އޭނާއަށް ފާރަލަމުން އަންނަ ކަމަށެވެ.

ރިޕޯޓްތައް ބުނާގޮތުން ކުޓީނިއޯގެ އަގު 100 މިލިއަން ޕައުންޑަށްވުރެ ބޮޑުވާއިރު، އެ އަގު ކުޑަކުރުމަށްވެސް ޗެލްސީން މަސައްކަތް ކުރަމުން އަންނަ ކަމަށެވެ.

ކުޓީނިއޯ ހޯދުމަށް ޗެލްސީގެ އިތުރުން ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ޕީއެސްޖީ އާއި ރެއާލް މެޑްރިޑްވެސް ހިމެނެއެވެ.

ކުޓީނިއޯއާއެކު ބާސާއިން ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، އޭނާގެ ރިލީޒް ފީއެއްގެ ގޮތުގައި ބާސާއިން ކަނޑައަޅާފައިވަނީ 400 މިލިއަން ޔޫރޯއެވެ.

ލިވަޕޫލް އިން ވިދާލި ކުޓީނިއޯ ވަނީ އެ ކްލަބަށް ކުޅުނު 201 މެޗުގައި 54 ލަނޑު ކާމިޔާބުކުރުމުގެ އިތުރުން އެ ކްލަބާއެކު ފުޓްބޯލް ލީގް ކަޕް އަދި ޔޫރޮޕާ ލީގުގެ ދެވަނަ ހޯދާފައެވެ. އަދި ބާސާ އަށް މިހާތަނަށް ކުޅުނު ދެ ސީޒަނުގައި 49 މެޗުގައި 16 ލަނޑު ކާމިޔާބުކޮށްފައިވާ ކުޓީނިއޯ ވަނީ އެ ކްލަބާއެކު ލަލީގާ އަދި ކޮޕާޑެލްރޭ ވެސް ކާމިޔާބުކޮށްފައެވެ.

ބްރެޒިލް ގައުމީ ޓީމަށް ކުޅުނު 45 މެޗުގައި 13 ލަނޑު ކާމިޔާބުކޮށްފައިވާ ކުޓީނިއޯ ވަނީ ބްރެޒިލްގެ 17 އަހަރުން ދަށުގެ ޓީމާއެކު ސައުތް އެމެރިކަން ފުޓްބޯލް ޗެމްޕިއަންޝިޕް އަދި 20 އަހަރުން ދަށުގެ ޓީމާއެކު ވޯލްޑް ކަޕް ކާމިޔާބުކޮށްފައެވެ.