ބާކީ ދެ މެޗު އޮއްވާ، ޗެލްސީން އިނގިރޭސި ޕްރެމިއާ ލީގުގެ ޗެމްޕިއަންކަން ކަށަވަރު ކޮށްފިއެވެ.

ޗެލްސީއިން ލީގު ކަށަވަރުކުރީ ހުކުރު ދުވަހުގެ ރޭ ވެސްޓް ބްރޮމްއާ ދެކޮޅަށް ކުޅުނު މެޗް ކާމިޔާބުކޮށް 87 ޕޮއިންއިންޓް ހޯދައިގެންނެވެ. ދެވަނާގައި އޮތް ޓޮޓެންހަމް އަށް ބާކީ އަދި ތިން މެޗު އޮތް ނަމަވެސް، އެ ތިން މެޗު ކާމިޔާބުކޮށްގެން ވެސް އެޓީމަށް ލިބޭނީ 86 ޕޮއިންޓެވެ.

ލީގު ނިމުމާ ގާތަށް އައިރު ވަރަށް ވާދަވެރިކޮށް ދިޔަ ނަމަވެސް އެއްވަނާގައި އޮތް ޗެލްސީއަށް ފުރުސަތު ބޮޑުވީ ޓޮޓެންހަމް އެންމެ ފަހުން ކުޅުނު މެޗުން ވެސްޓްހޭމް އަތުން 1-0 އިން ބަލިވެ ޗެލްސީ އޭގެ ފަހުން ކުޅުނު މެޗުން މިޑްސްބަރާ އަތުން 3-0 އިން މޮޅުވެފައި ވާތީއެވެ.

ހުކުރު ދުވަހުގެ މެޗް ޗެލްސީއިން ކާމިޔާބުކުރީ 1-0 ގެ ނަތީޖާއަކުންނެވެ. މެޗުގެ ފުރަތަމަ ހާފުގައިވެސް މޮޅަށް ކުޅެ ގިނަ ހަމަލާ އުފައްދާފައި ވަނީ ޗެލްސީންނެވެ. ނަމަވެސް ހާފު ނިމުނީ ލަނޑެއް ނުޖެހި ނަތީޖާ ހަމަހަމަ ވެގެންނެވެ. ދެވަނަ ހާފުގެ ކުރީކޮޅުގައި ވެސް މޮޅަށް ކުޅެފައިވަނީ ޗެލްސީންނެވެ. ނަމަވެސް އޭގެ ފަހުން ވެސްޓް ބްރޮމްއިން މެޗުގެ ކޮންޓްރޯލް އަތުލާފައިވަނިކޮށް ޗެލްސީން ވަނީ މެޗުގައި ފެނިގެންދިޔަ ހަމައެކަނި ލަނޑު ކާމިޔާބުކޮށް މެޗު ކާމިޔާބުކޮށްފައެވެ. މި ލަނޑު 82 ވަނަ މިނެޓުގައި އެޓީމަށް ކާމިޔާބުކޮށްދިނީ ބެލްޖިއަމްގެ ފޯވާޑް މިޝީ ބަޓްޝުއާއީ އެވެ.

ފާއިތުވި ސީޒަނުގައި ތާވަލުގެ 10 ވާނާގައި އޮވެ ޗެލްސީއަށް ލީގު ނިންމާލަން ޖެހުމުން ގިނަ ފަރާތްތަކަކުން ވަނީ އެކުލަބަށް ފާޑު ކިޔާފައެވެ. ނަމަވެސް ކޮންޓޭ ޓީމާ ހަވާލުވެ ޓީމުގެ ކުޅުމަށް ގިނަ ބަދަލުތަކެށް ގެނެސް ޗެލްސީއިން މިވަނީ މިފަހަރުގެ ލީގުގައި ކާމިޔާބު ނަތީޖާއެއް ނެރެފައެވެ.

މި ސީޒަނުގައި ޗެލްސީއިން ދެން އުފުލާލަން ތައްޔާރުވަމުންދާ ތައްޓަކީ އެފްއޭ ކަޕްގެ ތައްޓެވެ. އެފްއޭ ކަޕްގެ ފައިނަލުގައި އާސެނަލްއާ ދެކޮޅަށް ޗެލްސީ ނިކުންނާނީ މިމަހުގެ 27 ވަނަ ދުވަހުއެވެ.