އިންޑިއާއިން ރާއްޖެއަށް އާ ސަފީރަކު ކަނޑައަޅައިފި
20 ޖެނުއަރީ 2019 | އާދީއްތަ 10:07މިހާރު ހުންނެވި ސަފީރު އަކިލޭޝް މިޝްރާ އެ މަގާމަށް ވަޑައިގަތީ 2016ގަ
އާ ސަފީރު ސަންޖޭ ސުދިރް
ރާއްޖޭގައި ހުންނަވާ އިންޑިއާގެ ސަފީރުކަމުގެ މަގާމަށް އާ ބޭފުޅަކު ހަމަޖައްސައިފި އެވެ.
ޓައިމްސް އޮފް އިންޑިއާ ނޫހުގައި ބުނެފައިވާ ގޮތުގައި ރާއްޖޭގައި މިހާރު ހުންނެވި ސަފީރު އަކިލޭޝް މިޝްރާގެ ބަދަލުގައި ދެން އެމަގާމަށް ވަޑައިގަންނަވާނީ ސަންޖޭ ސުދިރް އެވެ. އެއީ، ޑެޕިއުޓީ މިނިސްޓަރުންގެ ފެންވަރުގެ މަގާމެކެވެ. އޭނާ މިހާތަނަށް ހުންނެވީ އިންޑިއާގެ މިނިސްޓްރީ އޮފް ޕެޓްރޯލިއަމް އެންޑް ގޭސް ގެ ޖޮއިންޓް ސެކްރެޓަރީ އިންޓަނޭޝަނަލް ކޯޕަރޭޝަން ގެ މަގާމުގަ އެވެ.
ސަންޖޭ މީގެކުރިން ވަނީ އޮސްޓްރޭލިއާގެ ސިޑްނީގައި ހުންނަވާ އިންޑިއާގެ ކޮންސުލް ޖެނެރަލްގެ މަގާމު ވެސް އަދާ ކުރައްވާފަ އެވެ.
ރާއްޖޭގައި މިހާރު ހުންނެވި ސަފީރު އަކިލޭޝް މިޝްރާ އެ މަގާމަށް ވަޑައިގަތީ 2016 އެންމެ ފަހުން އެ މަގާމުގައި ހުންނެވި ރަޖީވް ޝަހާރޭ ޑެންމާކުގައި ހުންނަވާ އިންޑިއާގެ ސަފީރަކަށް ހަމަޖެއްސުމުންނެވެ. އިންޑިއާގެ ފޮރިން ސާވިސްއާ 1989 ވަނަ އަހަރު ގުޅިވަޑައިގެންނެވި މިޝްރާ ރާއްޖެ އަށް ވަޑައިގެންނެވުމުގެ ކުރިން ހުންނެވީ ކެނެޑާގެ ޓޮރޮންޓޯގައި ހުންނަވާ އިންޑިއާގެ ކޮންސުލް ޖެނެރަލްގެ މަގާމުގަ އެވެ.
