ކޮރަލް ބުލެވާޑް އިމާރާތްކުރުމަށް ބަންދު ކުރި މަގު އަލުން ހުޅުވަނީ
ޖެނުވަރީ މަސް ނިމުމުގެ ކުރިން މަގު ހުޅުވާލާނެ
ކޮރަލް ބުލެވާޑް އެޅުމަށް ބަންދުކޮށްފައިވާ ސަރަހައްދު
ރަސްފަންނު ސަރަހައްދުގައި ކޮރަލް ބުލެވާޑް އިމާރާތްކުރުމަށް، ބޮޑުތަކުރުފާނު މަގުން ބަންދުކުރި ސަރަޙައްދު އަލުން ހުޅުވާލާނެކަމަށް މާލެ ސިޓި ކައުންސިލުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން މާލެ ސިޓީ ކައުންސިލްގެ ޑެޕިއުޓީ މޭޔަރ ޝަމާއު ޝަރީފް ވިދާޅުވީ، ސިޓީ ކައުންސިލްގެ ފަރާތުން ހައުސިންގް މިނިސްޓްރީއަށް ބޮޑުތަކުރުފާނު މަގުގައި ޖަހާފައިވާ ބިތްގަނޑު ނެގުމަށް އެދި ސިޓީލާފައިވާ ކަމަށާއި، އެ ސިޓީއަށް އަދި ޖަވާބެއް ނުލިބޭކަމަށެވެ.
ޝަމާއު ވިދާޅުވީ، ކޮރަލް ބުލެވާޑް އިމާރާތްކުރާ ކުރާ ކުންފުނި، ޗަންގް ހުއާ ކޮންސްޓްރަކްޝަނުން އެ އިމާރާތް ހުޅުމާލެއަށް ބަދަލުކުރުމަށް އެއްބަސްވެފައިވާކަން ރައީސް އޮފީހާއި މީޑިއާ ރިޕޯޓްތަކުން އެނގިވަޑައިގެންފައިވާ ކަމަށެވެ. އެކުންފުނިން ހައުސިންގް މިނިސްޓްރީއާއި އެކު އެއްބަސްވުމެއް ހަދާފައިވުމުގެ ސަބަބުން ލަސްތަކެއް ދިމާވާ ކަމަށާއި މި ހިނގާ ޖަނަވަރީ މަސް ނިމުމުގެ ކުރިން މަގު ހުޅުވާލާނެކަމަށް ޝަމާއު ވިދާޅުވިއެވެ.
ރަސްފަންނު ސަރަހައްދުގައި އެޅުމަށް ނިންމި 100 މީޓަރު އުސް ހަތަރު ޓަވަރުގެ ތެރެއިން އެއް ޓަވަރު ތަރައްގީ ކުރަނީ 228 ކޮޓަރިއާ އެކު ލަގްޒަރީ ހޮޓަލެއްގެ ގޮތުގައެވެ. އެ ހޮޓަލުގެ ބޮޑު މިނަކީ 8،600 އަކަފޫޓެވެ. އަނެއް ތިން ޓަވަރު ހާއްސަކޮށްފައި ވަނީ 533 އެޕާޓްމެންޓާ އެކު ރެޒިޑެންޝަލް ޑިވޮލަޕްމެންޓަށެވެ. އެއީ ދެ ކޮޓަރި އާއި ހަތަރު ކޮޓަރީގެ ލަގްޒަރީ އެޕާޓްމަންޓްތަކެކެވެ. ދެވަނަ ޓަވަރުގައި 10،000 އަކަފޫޓް ހިމެނޭއިރު ތިންވަނަ ޓަވަރު ތަރައްގީ ކުރަނީ 13،000 އަކަފޫޓުގެ ބިމެއްގައެވެ.
ބަންދު ކޮށްފައިވާ ސަރަޙައްދު
ރެޒިޑެންޝަލް ޓަވަރުތަކުގެ 15 ޕަސެންޓްގައި ގުދުރަތީ ގަސް ހިމެނޭ ގޮތަށް ތަރައްގީކުރާ އިރު މިއީ ޒަމާނީ ފެންވަރުގެ ސްވިމިން ޕޫލްތަކާއި ކުޑަކުދިން ކުޅެން ހާއްސަ ސަރަހައްދުތަކުގެ އިތުރުން ބާބަކިއު އޭރިޔާއެއް ވެސް ހިމެނޭ ގޮތަށް ތަރައްގީކުރާ ޓަވަރުތަކެކެވެ. މާލޭގައި ޓަވަރުތައް އެޅުމަށް ނަގާފައިވަނީ ހަތްދިހަ ހާސް އަކަފޫޓުގެ ސަރަހައްދެކެވެ.
