ޑރ އިޔާޒްގެ ހޫނު ރައްދެއް ނާޒިމްއަށް
19 ޖެނުއަރީ 2019 | ހޮނިހިރު 05:48މަޖިލިސްއަށް ބަޔަކު އިންތިޚާބު ކުރާއިރު އެ މީހެއްގެ ފާއިސާވެރި ކަމަށް ބެލުމުގެ ބަދަލުގައި އެމީހެއްގެ އިހްލާސްތެރިކަން ހުރި ވަރު ބެލުމަށް އިޔާޒް ވަނީ ގޮވާލައްވާފައި
ޑރ މުހައްމަދު އިޔާޒު ވަނީ މަޖިލިސްއަށް ބޭނުންވަނީ އިހްލާސްތެރިން ކަމަށް ވިދާޅުވެފައި
ރަައްޔިތުންގެ ޒަރޫރީ ބޭނުންތައް ފުއްދުމަށް ރައްޔިތުންގެ މަޖިލިހަށް ހޮވަން ޖެހޭނީ ތަނަވަސް، ފޯރުންތެރި މީހުން ކަމަށް ކުރީގެ ޑިފެންސް މިނިސްޓަރު ކާނަލް (ރޓޑ) މުހައްމަދު ނާޒިމް ވިދާޅުވި ބަސްފުޅަށް މަޝްހޫރު ދީނީ އިލްމުވެރިޔާ ޑރ މުހައްމަދު އިޔާޒު ހޫނު ރައްދެއް ދެއްވައިފިއެވެ.
އަންނަ އޭޕްރީލް މަހުގެ ހަ ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިޚާބުގައި ޖުމްހޫރީ ޕާޓީ (ޖޭޕީ) ގެ ޓިކެޓުގައި ދަނގެތި ދާއިރާއަށް ވާދަކުރައްވާ ނާޒިމްގެ ކެމްޕެއިން ލޯންޗު ކުރުމަށް ބޭއްވި ހަފްލާގައި އޭނާ ވިދާޅުވީ މަޖިލީހަށް ތަނަވަސް މީހުން ހޮވައިގެން ނޫނީ ރައްޔިތުންނަށް ކުރިއެރުމެއް ނެތް ކަމަށެވެ.
ނާޒިމް ވިދާޅުވި ބަސްފުޅަށް ރައްދުދެއްވާ އަދާލަތު ޕާޓީގެ އިލްމުވެރިންގެ މަޖިލީހުގެ މެމްބަރުންކަންވެސް ކުރައްވަމުން ގެންދަވާ ޑރ އިޔާޒު ކުރައްވާފައިވާ ޓުވީޓެއްގައި ގޮވާލައްވާފައިވަނީ މަޖިލިސްއަށް ބަޔަކު އިންތިޚާބު ކުރާއިރު އެ މީހެއްގެ ފާއިސާވެރި ކަމަށް ބެލުމުގެ ބަދަލުގައި އެމީހެއްގެ އިހްލާސްތެރިކަން ހުރި ވަރު ބެލުމަށެވެ. އިޔާޒް ކުރައްވާފައިވާ ޓުވީޓްގައި އިތުރަށް ވިދާޅުވެފައިވަނީ ތަނަވަސްކަމަކީ މުދާ ގިނަވުން ނޫން ކަމަށާއި، ތަނަވަސް ކަމަކީ ހިތުގެ ތަނަވަސްކަން ކަމަށެވެ.
ނާޒިމްގެ ކެމްޕޭން ލޯންޗިންގައި އޭނާ ވިދާޅުވެފައިވަނީ ރައްޔިތުންގެ މަޖިލީހަށް ހޮވޭ މީހަކީ ތެދުވެރިކަމާއި އިހްލާސްތެރިކަމާ އެކު އެ މީހެއްގެ އަމިއްލަ ނަފުސަށް ކޮޅަށް ހުރެވޭ މީހަކު ކަމުގައި ވާންޖެހޭ ކަމަށެވެ. އަދި ތެދުވެރިކަމާއި އިހްލާސްތެރިކަން އަންނާނީ އަމިއްލަ މަސައްކަތުން އުޅެވޭ މީހަކަށް ވެގެން ކަމަށެވެ.
19 ވަނަ ރައްޔިތުންގެ މަޖިލީހުގެ މައްޗަންގޮޅީ މެދު ދާއިރާއަށް އެމްޑީޕީގެ ޓިކެޓް ކަށަވަރުވެފައިވާ ރައީސް ނަޝީދުވެސް ގެންދަވަނީ ރައްޔިތުންގެ މަޖިލިސް ފާއިސާވެރިންގެ ވަކިތަކުން ސަލާމަތް ކުރަންޖެހޭ ކަމަށް ގޮވާލައްވަމުންނެވެ.
