ވައުދާ ޚިލާފްވީ އެމްޑީޕީން ކަމަށް ތުހުމަތުކުރައްވައި ގާސިމް ރައްދު ދެއްވައިފި
މިހާރު ޖޮއިންޓް ޕީޖީ އޮތްތޯ ގާސިމް ވަނީ ސުވާލު އުފައްދަވާފައި
ޖެޕީގެ ލީޑަރ ގާސިމް އިބްރާހިމް
ކޯލިޝަން އެއްބަސްވުމާ ޚިލާފްވީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކަމަށް ތުހުމަތުކުރައްވައި، ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރ ގާސިމް އިބްރާހިމް ރައްދު ދެއްވައިފިއެވެ.
ރައީސް ނަޝީދަށް ވާދަނުކުރެއްވޭ ގޮތް ހެދުމަށް ޖޭޕީގެ މެންބަރު ޢަބްދުލް ލަތީފު މުޙައްމަދު ހުށައެޅުއްވި ބިލާ ބެހޭ ގޮތުން އެމްޑީޕީން ނެރުނު ބަޔާނަށް ރައްދު ދެއްވައި ހުކުރު ދުވަހުގެ ރޭ ގާސިމް ކުރައްވާފައިވާ ޓްވީޓްގައި ވަނީ ޖޮއިންޓް ޕާލިމަންޓްރީ ގްރޫޕް އެމްޑީޕީން ރޫޅާލަފާނެ ކަމަށް ބުނުމުން ހައިރާން ނުވާ ކަމަށެވެ. އަދި މިހާރު ޖޮއިންޓް ޕީޖީ އޮތްތޯ ގާސިމް ވަނީ ސުވާލު އުފައްދަވާފައެވެ.
ރައްޔިތުންގެ މަޖިލީހަށް އެމްޑީޕީގެ ޓިކެޓްގައި ވާދަ ކުރުމަށް ނިންމުމުން އެއްބަސްވުމުގައިވާ ވައުދާއި ޚިލާފްވީ ނޫންތޯ ގާސިމްގެ ޓްވީޓްގައި ވެއެވެ.
ހުކުރު ދުވަހު އެމްޑީޕީ ޕާލިމެންޓަރީ ގުރޫޕުން ނެރުނު ނޫސް ބަޔާނެއްގައި ބުނެފައި ވަނީ އެ އިސްލާހު ހުށައަޅާފައި ވަނީ ޤާނޫނުއަސާސީއާ ޚިލާފަށް ކަމަށާއި، އެއީ ޖޮއިންޓް ޕާލިމެންޓަރީ ގްރޫޕްގެ މެމްބަރުން މަސައްކަތްކުރާ އުސޫލުތަކާ ވެސް ޚިލާފަށް ހުށައެޅި އިސްލާހެއް ކަމަށެވެ.
އޭގެ އިތުރުން، ލަތީފް ހުށައަޅާފައިވާ އިސްލާހަކީ ނިމިދިޔަ ސަރުކާރުން ޤާނޫނުއަސާސީއާ ޚިލާފަށް އެ މެމްބަރާ މެދު ހިންގެވި އަމަލުތަކުގެ ނަތީޖާ ކަމަށާއި، އެކަމުގެ ސަބަބުން އެހެން މީހެއްގެ ސިޔާސީ ހައްޤުތަކަކަށް އަރައިގަތުމަކީ ލަތީފް ހިންގެވި ދަށުދަރަޖައިގެ ފިނޑި އަމަލެއް ކަމަށް ވެސް ބަޔާނުގައި ބުނެފައި ވެއެވެ.
