ތުޅާދޫ ދާއިރާގެ ވޯޓްލުން ދެގަޑިއިރު ފަހުން ފަށައިފި
18 ޖެނުއަރީ 2019 | ހުކުރު 11:35ވެރިއަކު އަދި އޮފިޝަލެއް ނެތް މައްސަލަ ވެސް ފެންމަތިވި
އެމްޑީޕީގެ ޕްރައިމަރީގެ ވޯޓުލުން ކުރިއަށްދަނީ
އެމްޑީޕީގެ ޕްރައިމަރީގެ ވޯޓުލުން ފެށިތާ ދެގަޑިއިރު ފަހުން ބ. ތުޅާދޫ ދާއިރާގެ ވޯޓުލުން ފަށައިފިއެވެ.
އެމްޑީޕީ ތުޅާދޫ ދާއިރާ މާލެ ފޮށިގެ ވޯޓުލުން ގަޑިއަށް ނުފެށުނު ވަކި ސަބަބެއް ހާމައެއް ނުކުރެއެވެ. ވޯޓުލުން ލަސްވެގެންދިޔައިރު އެތަނުގައި ވެރިއަކު އަދި އޮފިޝަލެއް ނެތް މައްސަލަ ވެސް ފެންމަތިވެގެން ދިޔައެވެ.
އެމްޑީޕީގެ ޕްރައިމަރީގެ ވޯޓުލުން ރާއްޖޭގެ އެކިކަންކޮޅުތަކުގައި ހުކުރު ދުވަހުގެ 2:30 ގައި ފަށާފައިވާއިރު ވޯޓުލުން ނިއްމުމަށް ހަމަޖެހިފައިވަނީ މިރޭ 08:30 ގައެވެ. މި އިންތިޚާބުގައި ޖުމުލަ 77 ދާއިރާއަކުން 279 ކެންޑިޑޭޓުން ވާދަކުރެއެވެ.
ޕްރައިމަރީގައި 270 ވޯޓް ފޮށި ބަހައްޓާފައިވާއިރު ރާއްޖެއިން ބޭރުގައި ތިން ވޯޓް ފޮއްޓެއް ވަނީ ބަހައްޓާފައެވެ. އެއީ އަވަށްޓެރި ސްރީ ލަންކާ އާއި އިންޑިއާގެ އިތުރުން ގިނަ އަދަދެއްގެ ދިވެހިން ދިރިއުޅޭ މެލޭޝިއާ އެވެ. މިހާރު މި ގައުމުތަކުގައި ވެސް ވޯޓްލުން ފަށައިގެން ކުރިއަށްދެއެވެ. މި ފަހަރުގެ ޕްރައިމަރީގައި 86،091 މީހުން ވޯޓުލާނެ ކަމަށް އެމްޑީޕީން ބުނެއެވެ.
