ހިގުއައިން ޗެލްސީއަށް ވިއްކާލަން ޔުވަންޓަސް އިން ވެސް އެއްބަސްވެއްޖެ

އޭސީ މިލާނަށް ކުޅެމުން އަންނަ އާޖެންޓީނާގެ ފޯވާޑް ގޮންޒާލޯ ހިގުއައިން ޔުވަންޓަސްއަށް ވިއްކާލަން ޔުވަންޓަސްއިންވެސް އެއްބަސްވެފައިވާ ކަމަށް ރިޕޯޓްތައް ބުނެފިއެވެ.

ގޯލްޑޮޓްކޮމް އިން ބުނީ، ޖެނުއަރީ ޓްރާންސްފާގައި ހިގުއައިން ޗެލްސީއަށް ވިއްކާލަން ޔުވަންޓަސްއިން އެއްބަސްވެފައިވާ ކަމަށާއި، އެގޮތުން މިހާރު އޭނާ ކުޅެމުން އަންނަ އޭސީ މިލާނާ އެކު ހަދާފައިވާ ލޯން އެއްބަސްވުން ވެސް ނިމުމަކަށް ގެންނަން ނިންމާފައިވާ ކަމަށެވެ.

އުމުރުން 31 އަހަރުގެ ހިގުއައިން ގެންނަން ޗެލްސީން 36 މިލިއަން ޕައުންޑު ހަރަދުކުރާނެ ކަމަށް ރިޕޯޓްތައް ބުނާއިރު، ޗެލްސީ އާއި ޔުވަންޓަސް ހަދާ އެއްބަސްވުމުގެ ދަށުން ހިގުއެން ޗެލްސީގައި ދައްކާ ކުޅުމަށް ބަލާފައި ބޯނަސް ފައިސާ ޔުވަންޓަސްއަށް ދޭން ޖެހޭނެއެވެ.

ހިގުއައިން އޭސީ މިލާނަށް ބަދަލުވީ އެއް އަހަރު ދުވަހުގެ އެއްބަސްވުމެއްގެ ދަށުން 16 މިލިއަން ޕައުންޑަށް މިދިޔަ އަހަރުގެ އޯގަސްޓް މަހުއެވެ. އޭނާ ކްލަބުގައި ދާއިމީ ގޮތެއްގައި ބަހައްޓަން ބޭނުންވާ ނަމަ އޭސީ މިލާނުން އިތުރަށް 32 މިލިއަން ޕައުންޑު ހަރަދު ކުރަން ޖެހޭނެއެވެ.

ރިވާ ޕްލޭޓުން 2004 ވަނަ އަހަރު ކެރިޔަރު ފެށި ހިގުއައިން ވަނީ އެ ކްލަބަށް 41 މެޗު ކުޅެ، 15 ލަނޑު ކާމިޔާބުކޮށްފައެވެ. އެ އަށް ފަހު އޭނާ ބަދަލުވީ 2006 ވަނަ އަހަރުގެ ސީޒަނުގައި ރެއާލްއަށެވެ.

އޭނާ ވަނީ ރެއާލްއަށް ކުޅުނު 264 މެޗުގައި 121 ލަނޑު ކާމިޔާބުކޮށްފައެވެ. އަދި ރެއާލްއާ އެކު ހިގުއައިން ވަނީ ތިން ލަލީގާ، އެއް ކޮޕާޑެލްރޭ އަދި ދެ ސްޕެނިޝް ސުޕާ ކަޕް ކާމިޔާބުކޮށްފައެވެ.

ރެއާލް ދޫކޮށް ހިގުއައިން ދެން ގުޅުނީ 2013 ވަނަ އަހަރުގެ ސީޒަނުގައި ނަޕޯލީއާ އެވެ. އޭނާ ވަނީ ނަޕޯލީއަށް ކުޅުނު 146 މެޗުގައި 91 ލަނޑު ކާމިޔާބުކޮށް، އެޓީމާއެކު ކޮޕާ އިޓަލިއާ އަދި އިޓާލިއަން ސުޕާ ކަޕް ކާމިޔާބުކޮށްފައެވެ.

ހިގުއައިން ވަނީ 2016 ވަނަ އަހަރުގެ ސީޒަނުގައި ޔުވަންޓަސްއަށް ބަދަލުވެ އެޓީމަށް ކުޅުނު 105 މެޗުގައި 55 ލަނޑު ކާމިޔާބުކޮށް، ދެ ލީގު ތަށި އަދި ދެ ކޮޕާ އިޓަލިއާ ކާމިޔާބުކޮށްފައެވެ.

އާޖެންޓީނާއާ އެކު 2014 ވަނަ އަހަރު ބްރެޒިލްގައި ބޭއްވި ވޯލްޑް ކަޕްގެ ދެވަނަ ހޯދި ހިގުއައިން ވަނީ ގައުމީ ޓީމަށް މިހާތަނަށް ކުޅުނު 75 މެޗުގައި 31 ލަނޑު ކާމިޔާބުކޮށްފައެވެ.