ޖޭޕީން އެދުމުންވެސް އިސްލާހު ނުނަގާނެ ކަމަށް ލަތީފް ވިދާޅުވެއްޖެ!
16 ޖެނުއަރީ 2019 | ބުދަ 13:41މަރުވިޔަސް މަރުވާނީ ވަރުގަދަ ހަގުރާމައެއް ކޮށްގެން: ލަތީފު
ދިއްދޫ ދާއިރާގެ މެމްބަރު އަބްދުއްލަތީފް މުހައްމަދު
ރައީސްކަން ކޮށްފައިވާ މީހަކަށް ރައްޔިތުންގެ މަޖިލީހަށް ކުރިމަތިނުލެއްވޭ ގޮތަށް ދިއްދޫ ދާއިރާގެ މެމްބަރު އަބްދުއްލަތީފް މުހައްމަދު މަޖިލީހަށް ހުށަހެޅުއްވި އިސްލާހު ނެގުމަށް އޭނާ ނިސްބަތްވެވަޑައިގަންނަވާ ޖުމްހޫރީ ޕާޓީ (ޖޭޕީ)ން އެދުމުން ވެސް، އިސްލާހު ނުނަގާނެ ކަމަށް އޭނާ ވިދާޅުވެއްޖެއެވެ.
ސަރުކާރު ކޯލިޝަންގައި ހިމެނޭ ޖޭޕީގެ ޕާލަމެންޓްރީ ގްރޫޕް މެމްބަރު ލަތީފް ވިދާޅުވީ، އިސްލާހު އަނބުރާ ނުގާނެ ކަމަށާއި، "މަރުވިޔަސް މަރުވާނީ ވަރުގަދަ ހަގުރާމައެއް ކޮށްގެން" ކަމަށެވެ.
އިސްލާހު ނުނަގާނެ ކަމަށް ލަތީފް ވިދާޅުވެފައިވާއިރު، ޖޮއިންޓް ޕާލަމެންޓްރީ ގްރޫޕް ލީޑަރު އަބްދުﷲ ރިޔާޒު ވިދާޅުވެފައި ވަނީ އެ މައްސަލަ އަނބުރާ ނަގަން ލަތީފަށް އަންގާފައިވާ ކަމަށެވެ. ރިޔާޒް ވިދާޅުވެފައި ވަނީ އެއީ އެއްގޮތަކަށް ވެސް ޕާޓީއަށް އެނގިގެން ލަތީފް ހުށަހަޅުއްވާފައިވާ އިސްލާހެއް ނޫން ކަމަށެވެ.
ލަތީފް ހުށަހެޅުއްވީ ރައްޔިތުންގެ މަޖިލީހުގެ އިންތިޚާބުގެ އަށް ވަނަ މާއްދާގެ (ނ) އަށް ނަމްބަރެއް އިތުރު ކުރުމަށެވެ. އިންތިހާބުގައި ވާދަ ނުކުރެވޭނެ ފަރާތްތައް ބަޔާންކުރާ އެ މާއްދާގެ ފަސް ވަނަ ނަމްބަރަކަށް ލަތީފް ހުށަހެޅުއްވީ "ރައީސްކަން ކޮށްފައިވާ ފަރާތަކަށް ވުން" މި ޝަރުތެވެ.
އެމްޑީޕީން ބުނެފައިވަނީ އެއީ ސީދާ އެ ޕާޓީގެ ރައީސް މުހައްމަދު ނަޝީދަށް އަމާޒުކޮށް ހުށަހެޅުއްވި އިސްލާހެއް ކަމަށެވެ. އެ އިސްލާހަކީ މަޖިލީހަށް ބަލައިގަނެވޭނެ އަދި ބަލައިގަންނާނެ އިސްލާހެއްވެސް ނޫން ކަމަށް އެމްޑީޕީން ވަނީ ބުނެފައެވެ.
ކޯލިޝަންގެ ތެރެއިން ރައީސް ނަޝީދަށް އަމާޒުކުރައްވާ އިސްލާހެއް ހުށަހެޅުއްވުން ކޯލިޝަންގެ ތެރޭގައި ރެނދު ލާފައިވަނީތޯ ރާއްޖެ އެމްވީން ސުވާލު ކުރުމުން ޗެއަރޕާސަން ވިދާޅުވީ ލަތީފު، އެ އިސްލާހު ހުށަހެޅުއްވުމަކީ ކޯލިޝަންގެ ތެރޭގައި މައްސަލައެއް އުޅޭ ކަމުގެ ނިޝާނެއް ނޫން ކަމަށެވެ. އެ އިސްލާހަކީ ކޯލިޝަންގައި މަޝްވަރާ ކުރެވިގެން ހުށަހެޅި އިސްލާހެއް ނޫން ކަމަށް ޕީޖީ ލީޑަރު ރިޔާޒު ވިދާޅުވެފައިވުމަކީ ހިތްހަމަޖެހުމެއް ކަމަށް ވެސް ހަސަން ލަތީފް ވަނީ ވިދާޅުވެފައެވެ.
