ރޭގަނޑު ފްލައިޓްތައް ފެށުމުން ރިސޯޓުތަކާއި ގެސްޓް ހައުސްތަކުގެ ވިޔަފާރީ އިތުރަށް ފުޅާވެގެންދާނެ: އައިލެންޑް އޭވިއޭޝަން
މިހާރުވެސް ދުވާލަކު އެއް ދަތުރުކުރޭ
މޯލްޑިވިއަންގެ ރޭގަނޑު ފްލައިޓް އިފްތިތާހު ކުރުމުގެ ރަސްމިއްޔާތުގެ ތެރެއިން
ތ. ތިމަރަފުއްޓަށް ރޭގަނޑު ފްލައިޓްތައް ފެށުމާއި ގުޅިގެން ރިސޯޓުތަކާއި ގެސްޓް ހައުސްތަކުގެ ވިޔަފާރީ އިތުރަށް ފުޅާވެގެންދާނެ ކަމަށް އައިލެންޑް އޭވިއޭޝަންގެ މެނޭޖިންގް ޑައިރެކްޓަރު މުހައްމަދު ރިޒްވީ ވިދާޅުވެއްޖެއެވެ.
އަންގާރަ ދުވަހުގެ ރޭ ތ. ތިމަރަފުއްޓަށް ރޭގަނޑު ފްލައިޓްތައް ޖެއްސުމަށް ބޭއްވި ހާއްސަ ރަސްމިއްޔާތުގައި ރިޒްވީ ވިދާޅުވީ ރޭގަނޑު އޮޕަރޭޝަން ކުރިއަށް ގެންދާއިރު އިތުރު ވަޒީފާތައް އިތުރުވެގެން ގޮސް ރިސޯޓުތަކާއި ގެސްޓް ހައުސްތަކުގެ ވިޔަފާރީ ފުޅާވެގެންދާނެ ކަމަށެވެ. އަދި ރޭގަނޑުގެ ފްލައިޓްތައް އިތުރު ފްރީކުއެންސީއަކާއެކު ކުރިއަށް ގެންދާނެ ކަމަށް އޭނާ ވިދާޅުވިއެވެ.
މި ރަސްމިއްޔާތު ޝަރަފުވެރިކޮށްދެއްވާ ވާހަކަ ދައްކަވަމުން މިނިސްޓަރު އޮފް ސްޓޭޓް ފޯ ޓްރާންސްޕޮޓޭޝަން އެންޑް ސިވިލް އޭވިއޭޝަން އަހްމަދު ޒުހައިރު ވިދާޅުވީ މޯލްޑިވިއަންގެ ހިދުމަތް އިތުރުވެގެން ދިޔުމަކީ ތިމަރަފުއްޓަށް އަދި ތ އަތޮޅުގެ ރައްޔިތުންނަށް ވެސް ލިބިގެންދާނެ ވަރަށް ބޮޑު ލުއި ފަސޭހައެއް ކަމަށެވެ.
ރަށްރަށުގައި ގެސްޓް ހައުސް ވިޔަފާރީތައް ހިންގާ ފަރާތްތަކުން ޒަމާނުއްސުރެ ކުރަމުން އަންނަ ޝަކުވާ އަކީ ފަތުރުވެރިންނަށް އެތެރޭގެ އުދުހުންތަކުގެ އަގު ބޮޑުވުމުގެ ވާހަކައެވެ. ރައީސް ސޯލިހްގެ ސަރުކާރުގެ އަމާޒަކަށްވެފައިވަނީ ފަތުރުވެރިންނަށް ވެސް އެތެރޭގެ އުދުހުންތަކުގެ އަގު ފަހިގޮތަކަށް ބައްޓަން ކުރުމެވެ.
ރައީސް ސޯލިހްގެ ސަރުކާރުގެ 100 ދުވަހުގެ ވައުދުތަކުގެ ތެރޭގައި ހިމެނޭ އެތެރޭގެ އުދުހުންތަކުގެ އަގު ހެޔޮކުރުމުގެ ވައުދު ފުއްދުމުގެ ގޮތުން ގައުމީ އެއާލައިންތަކުގެ އެތެރޭގެ އުދުހުންތަކުގެ އަގު ދާދިފަހުން ވަނީ ހެޔޮކޮށްފައެވެ.
މި ރަސްމިއްޔާތުގައި އެޑިއެކޭޝަން މިނިސްޓަރު އައިޝަތު އަލީ އާއި ޖެންޑަރ މިނިސްޓަރު ޝިދާތާ ޝަރީފު އާއި ކިނބިދޫ ދާއިރާގެ މެމްބަރު އަބްދުﷲ ރިޔާޒްއާއި، ތިމަރަފުށީ ދާއިރާގެ މެމްބަރު މުހައްމަދު މުސްތަފާ ބައިވެރިވެވަޑައިގެންނެވިއެވެ.
މޯލްޑިވިއަންގެ ފުރަތަމަ ޝެޑިއުލް ފްލައިޓް ޖައްސާފައިވަނީ އަންގާރަ ދުވަހުގެ ރޭ 7:10 އެހާކަންހާއިރުއެވެ.
