އެމްޑީޕީގެ ޕްރައިމަރީއަކީ ރާއްޖޭގައި ބޭއްވޭ އެންމެ ބޮޑު ސިޔާސީ ހަރަކާތް: ރައީސް ނަޝީދު

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޕްރައިމަރީއަކީ ރާއްޖޭގައި އިންތިޒާމް ވެގެން ހިންގާ އެންމެ ބޮޑު ސިޔާސި ހަރަކާތް ކަމުގައި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

އަންގާރަ ދުވަހު އެމްޑީޕީގެ މީދޫ ދާއިރާގެ މަޖިލިސް ޕްރައިމަރީގައި ވާދަކުރައްވާ ހުސައިން ޝާހިދުގެ ކެމްޕެއިން ހަފުލާގައި ވާހަކަދައްކަވަމުން ނަޝީދު ވިދާޅުވީ، އެމްޑީޕީގެ ޕްރައިމަރީގައި ޕާޓީގެ ހުރިހާ މެމްބަރުންނަށް ބައިވެރިވެވޭނެ ކަމަށެވެ.

"އެ ހަރަކާތުގައި އެމްޑީޕީގެ ހުރިހާ މެމްބަރުން ވެސް ބައިވެރިވުމަކީ މުޅި ޕާޓީއަށް ލިބޭ ވަރަށް ބޮޑު ކުރިއެރުމެއް. ޕާޓީގެ ހައިބަތާއި، ޕާޓީގެ ކުރިއެރުމަށް އަދި ޕާޓީގެ ކާމިޔާބަށް މިއަށް ވުރެ ބޮޑު އެހީތެރިކަމެއް ނޯންނާނެ." ނަޝީދު ވިދާޅުވިއެވެ.

މީގެ އިތުރުން ނަޝީދު ވިދާޅުވީ އެމްޑީޕީގެ ޕްރައިމަރީއަކީ، ގައުމެއްގެ ވޯޓުލެވޭ އާބާދީގެ ނިސްބަތުން ދެވަނައަށް އެންމެ ގިނަ ބަޔަކު ވޯޓުލާނެ، ޕާޓީއެއްގެ އެތެރޭގެ އިންތިހާބުކަމަށެވެ. ނަޝީދު ވިދާޅުވީ މި ފަހަރުގެ ޕްރައިމަރީގައި 269 ވޯޓުފޮށްޓަށް 86091 މީހަކު ވޯޓުލާން ހަމަޖެހިފައިވާ އިރު، ވޯޓުލުމުގެ ކަންކަން ބަލަހައްޓަން 600 އޮފިޝަލުންނާއި 1192 އޮބްސާވަރުން ބައިވެރިވާނެ ކަމަށެވެ.

"އެމްޑީޕީ މި އަންނަ ހުކުރު ދުވަހު ނުކުމެ މި ވޯޓުދޭ އިރު ގަބޫލުފުޅުކުރައްވާ، މިއީ ނިސްބަތުން ދުނިޔޭގައި އޮތް އެއްމެ ބޮޑު، ޕާޓީއެއްގެ އެތެރޭގެ ވޯޓު ލާނެ ޕާޓީ" ނަޝީދު ވިދާޅުވިއެވެ.

ރައީސް ނަޝީދު ވަނީ އެމްޑީޕީގެ ޕްރައިމަރީގައި ވޯޓުލައްވާ ހުރިހާ މެމްބަރުންގެ ކިބައިން ވެސް ސުލްހަވެރިކަމާއި އެކީ ވޯޓުލުމުގެ ކަންކަން ކުރިޔަށް ގެންދިޔުމަށް އެދިވަޑައިގަންފައެވެ.

މިފަހަރުގެ ރައްޔިތުންގެ މަޖިލިސް އިންތިޚާބުގައި 87 ދާއިރާއަށް ވާދަކުރަން ހުޅުވާލުމުން 86 ދާއިރާއަކަށް 286 މީހަކުވަނީ ކުރިމަތިލާފައެވެ. އޭގެ ތެރެއިން އެއްމެ މީހަކު ކުރިމަތިލީ 9 ދާއިރާ ފިޔަވައި ބާކީ ހުރި 77 ދާއިރާއަށް މިމަހުގެ އަށާރަވަނަ ދުވަހު ވޯޓްލުން އޮންނާނެއެވެ. އެމްޑީޕީން ކުރިމަތި ނުލަނީ ފ.ނިލަންދޫ ދާއިރާއަށެވެ.