ބެންޒެމާ އަތުގެ އިނގިއްޔެއްގައި ރެނދެއްލައިފި

ރެއާލް މެޑްރިޑަށް ކުޅެމުން އަންނަ ފްރާންސްގެ ފޯވާޑް ކަރީމް ބެންޒެމާ އަތުގެ އިނގިއްޔެއްގައި ރެނދެއްލައި އަނިޔާވެއްޖެއެވެ.

ބެންޒެމާގެ އިނގިލީގައި ރެނދެއްލީ އާދީއްތަ ދުވަހުގެ ރޭ ރެއާލް ބެޓިސް އަތުން 1-2 ގެ ނަތީޖާ އިން ރެއާލް މޮޅުވި މެޗުގައެވެ. އެ މެޗުގައި ބެންޒެމާގެ އިނގިއްޔަށް އަނިޔާވީ ކަނާއަތް މައްޗަށް ވެއްޓިގެންނެވެ.

ބެންޒެމާއަށް އަނިޔާވުމުން ފުރަތަމަ ހާފް ނިމުމުގެ ކުރިން އޭނާ ވަނީ ބަދަލުކޮށްފައެވެ. އޭނާގެ ބަދަލުގައި އަރުވާފައި ވަނީ ކްރިސްޓޯއެވެ.

ބެންޒެމާއަށް އަނިޔާވިކަން ރެއާލުން ވެސް ވަނީ ކަށަވަރުކޮށްދީފައެވެ. އެގޮތުން ރެއާލުން ބުނީ، ޓެސްޓްތަކުން ބެންޒެމާގެ އަތުގެ އިނގިލީގައި ރެނދެއްލާފައިވާކަން ދައްކާ ކަމަށާއި، ނަމަވެސް ކުޅުމާ ދުރުގައި ހުންނަންޖެހޭނެ މުއްދަތެއް ނޭނގޭ ކަމަށެވެ.

ލީގުގައި ރެއާލް މިހާތަނަށް ކުޅުނު 19 މެޗުގައި ބެންޒެމާ ކުޅެފައިވާއިރު، އޭނާ ވަނީ އެޓީމަށް ހަތް ލަނޑު ކާމިޔާބުކުރުމުގެ އިތުރުން، ލަނޑުތައް ޖެހުމަށް އެހީތެރި ވެސް ވެދީފައެވެ.