އައްޑޫ ސިޓީގައި އެކްސިޑެންޓެއް ހިނގައި އެސްބީއައި އަށް ބޮޑެތި ގެއްލުންތަކެއް!
އެއްވެސް މީހަކަށް އަނިޔާއެއް ލިބިފައެއް ނުވޭ
ހިތަދޫ ބޮޑު މަގުގައި ހިނގި އެކްސިޑެންޓް
އައްޑޫ ސިޓީގެ ހިތަދޫ ބޮޑު މަގުގައި އެކްސިޑެންޓެއް ހިނގައި ސްޓޭޓް ބޭންކް އޮފް އިންޑިޔާގެ އޮފީހަށް ބޮޑެތި ގެއްލުންތަކެއް ލިބިއްޖެއެވެ.
މިއެކްސިޑެންޓް ހިނގާފައި ވަނީ ހޯމަ ދުވަހުގެ މެންދުރު ފަހު 2:40 އެހާކަށްހާ އިރު ކަމަށާއި އެކްސިޑެންޓްގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށް މަންޒަރު ދުށް މީހަކު ރާއްޖެޓީވީއަށް މައުލޫމާތުދިނެއެވެ.
މި އެކްސިޑެންޓްގައި ހިތަދޫ ބޮޑު މަގުގައި ހުންނަ ސްޓޭޓް ބޭންކް އޮފް އިންޑިޔާގެ އޮފީހަށް ވަނީ ބޮޑެތި ގެއްލުންތަކެއް ލިބިފައިވާއިރު، އެއޮފީހުގެ ބިއްލޫގަނޑު ތަޅައިގެން ދިއުމުގެ އިތުރުން ސީލިންގއިން ބައެއް ވެސް ވަނީ ވެއްޓިފައެވެ.
މި ހާދިސާ ހިނގިއިރު ކާރު ދުއްވަން އިނނީ އަންހެނެއް ކަމަށާއި އޭނާއަށް އަނިޔާއެއް ލިބިފައި ނުވި ނަމަވެސް ކާރަށް ވަނީ ގެއްލުން ލިބިފައެވެ. މި ހާދިސާ ހިނގަން މެދުވެރިވި ސަބަބެއް އަދި މުޅިން ސާފުވެފައި ނުވި ނަމަވެސް ފުލުހުން ދަނީ މިކަން އިތުރަށް ތަހްޤީޤް ކުރަމުންނެވެ.
