ޕްރައިމަރީގައި ރަށްރަށުގައި ބަހައްޓާ ވޯޓުފޮށިތަކާ ޙަވާލުވާ ފަރާތްތައް ޢާންމުކޮށްފި
14 ޖެނުއަރީ 2019 | ހޯމަ 10:04ފޮށިތަކާ ޙަވާލުވާ އިސްވެރީންނަށް ހަމަޖައްސާފައިވަނީ އެމްޑީޕީއަށް ނިސްބަތްވާ މިނިސްޓަރުންނާއި ސަރުކާރުގެ އިސް ބޭފުޅުން
އެމްޑީޕީގެ ޕްރައިމަރީ އޮންނާނީ މި މަހުގެ 18 ވަނަ ދުވަހު
މި މަހުގެ 18 ވަނަ ދުވަހު ބާއްވާ އެމްޑީޕީގެ ޕްރައިމަރީގެ ވޯޓުފޮށިތަކާ ހަވާލުވާ ފަރާތްތައް އެ ޕާޓިން އާންމުކޮށްފިއެވެ.
އެމްޑީޕީން ހޯމަ ދުވަހު ކުރި އިއުލާނުގައިވާ ގޮތުން ރާއްޖޭގެ ސިޓީތަކުގައި ބަހައްޓާ ފޮށިތައް ފިޔަވައި އެހެން ރަށްރަށުގައި ބަހައްޓާ ވޯޓު ފޮށިތަކާ ޙަވާލުވާ އިސްވެރީންނަށް ހަމަޖައްސާފައި ވަނީ އެމްޑީޕީއަށް ނިސްބަތްވާ މިނިސްޓަރުންނާއި ނައިބުންނާއި ސްޓޭޓް މިނިސްޓަރުންނެވެ.
މީގެ އިތުރުން އެމްޑީޕީއަށް ނިސްބަތްވާ ސަރުކާރު ކުންފުނިތަކުގެ ވެރިން ފަދަ ސިޔާސީ ބޭފުޅުންގެ އިތުރުން، ޕްރައިމަރީއަކާ ނުލައި ޓިކެޓް ލިބޭ 10 ދާއިރާގެ ކެންޑިޑޭޓުންގެ ތެރެއިން ބައެއް ބޭފުޅުންނާއި ގައުމީ މަޖިލީހުގެ މެމްބަރުން ވެސް ވޯޓު ފޮށިތަކާއި ހަވާލުވެގެން ތިއްބަވާނެ ކަމަށް އެ ޕާޓިން މައުލޫމާތުދެއެވެ.
ވޯޓު ފޮއްޓާ ހަވާލުވާ ''އިސް ފަރާތް'' ކަމަށް ކަމަށް ބުނެފައި ވަނީ އެމްޑީޕީގެ އެތެރޭ އިންތިހާބުގައި އަމަލުކުރާނެ އުސޫލުތައް އެމްޑީޕީގެ ގަވާއިދުގެ 22 ވަނަ މާއްދާގައި ބަޔާންކުރާ ފަރާތްތަކެވެ. އެ މާއްދާގައިވާ ގޮތުން ވޯޓުނެގުމާއި ބެހޭ އެންމެހާ ކަންކަން ބަލަހައްޓާ (“އޮފިޝަލުން”)ގެ މައްޗަށް “އިސް ފަރާތެއް” އިންތިޚާބާއި ބެހޭ ކޮމިޓީން ޢައްޔަންކުރަންވާނެ ކަމަށެވެ.
ޕްރައިމަރީގައި ރަށް ރަށުގައި ވޯޓުފޮށިތަކާ ޙަވާލުވާ ފަރާތްތައް ލިސްޓް އެމްޑީޕީގެ ވެބްސައިޓް ގައި ވަނީ ޝާއިއު ކޮށްފައެވެ.
