ޓްރީޓޮޕު ހޮސްޕިޓަލުން، އަމާނާ ތަކާފުލްގެ މެޑިކަލް ކަސްޓަމަރުންނަށް އިންޝުއަރެންސް ކާޑު ތައާރަފުކޮށްފި އެވެ.

އަމާނާ ތަކާފުލްގެ މެޑިކަލް ކަސްޓަމަރުންނަށް ޓްރީޓޮޕް ހޮސްޕިޓަލުން ކޭޝްލެސް ހިދުމަތާއެކު، އެ ކުންފުނީގެ އިންޝުއަރެންސް ކާޑު ބޭނުން ކުރުމުގެ ޚިދުމަތް ތައާރަފްކުރީ އެއްބަސްވުމެއްގައި ސޮއިކުރުމަށްފަހުއެވެ. 

މި އެއްބަސްވުމުގައި ޓްރީޓޮޕް ހޮސްޕިޓަލްގެ ފަރާތުން ސޮއިކުރެއްވީ އެހޮސްޕިޓަލްގެ މެނޭޖިން ޑިރެކްޓަރު އާދަމް ސަލީމްއެވެ. އަމާނާ ތަކާފުލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހަރީޒް ސުލައިމާންއެވެ.

ޓްރީޓޮޕް ހޮސްޕިޓަލުން ބުނީ އެ ހޮސްޕިޓަލުގެ އަމާޒަކީ ރައްޔިތުންނަށް އެންމެ ފުރިހަމަ ޚިދުމަތްތަކެއް ދިނުން ކަމަށެވެ. އަދި އާސަންދައިގެ އިތުރުން އެހެނިހެން އިންޝުއަރެންސުގެ ޚިދުމަތްތައް ވެސް ދިނުން ކަމަށެވެ.

ޓްރީޓޮޕް ހޮސްޕިޓަލްއަކީ ރާއްޖޭގައި މިހާތަނަށް ހުޅުވި އެންމެ ފެންވަރު ރަނގަޅު އެއް ހޮސްޕިޓަލެވެ. ގާތްގަނޑަކަށް 90 މިލިއަން ޑޮލަރުގެ އިންވެސްޓްމަންޓެއްގެ ގޮތުގައި ހުޅުމާލޭގައި ތަރައްގީ ކުރަމުން ގެންދާ މުޅި ހޮސްޕިޓަލަކީ ފަހުގެ ޓެކްނޮލޮޖީ އާއެކު "ފުލީ އޮޓޯމެޓިކު" ހޮސްޕިޓަލަކަށްވާއިރު މި ހޮސްޕިޓަލްގައި ބަލި މީހުން އެޑްމިޓްކުރުމަށް ތަފާތު ފަސް ކެޓަގަރީގެ ކޮޓަރި ހުރެއެވެ.

އެގޮތުން ދެ މީހަކަށް އެއްފަހަރާ ޚިދުމަތްދެވޭ 30 ކޮޓަރި އާއި އެކަކަށް ޚިދުމަތް ދެވޭ ގޮތަށް ހަދާފައިވާ 57 ކޮޓަރި އާއި ހަތަރު ޖޫނިއަރ ސުއިޓާއި، ހަ ސުޕީރިއާ ސުއިޓް އަދި ދެ ޕްރެޒިޑެންޝަލް ސުއިޓް ހިމެނެއެވެ.