ޖަލްސާ ބާއްވަން ހަތް ދުވަސް - އަދި އެންމެ 22 މެމްބަރުންގެ ސޮއި!
14 ޖެނުއަރީ 2019 | ހޯމަ 07:55ޖަލްސާ ބޭއްވޭނީ ޖަލްސާ ބޭއްވުމަށް ބޭނުންވާ ގާނޫނީ އަދަދު ކަމަށްވާ 43 މެމްބަރުންގެ ސޮއި ލިބިއްޖެނަމަ
މަޖިލިސް ޗެމްބަރުގައި މެމްބަރުންތައް
ދައުލަތަށް ގެއްލިގެން ދިޔަ ފައިސާ އާއި މަރުތަކުގެ މައްސަލަތައް ބެލުމަށް އުފައްދާފައިވާ ދެ ކޮމިޝަނަށް ބާރު ދިނުމުގެ ބިލް ފާސްކުރުމަށް، ޖެނުއަރީ 20 ގައި ޖަލްސާއެއް ބޭއްވުމަށް މިހާތަނަށް ސޮއި ލިބިފައިވަނީ 22 މެމްބަރުންގެ ކަމަށް ޖޮއިންޓް ޕާލަމެންޓްރީ ގްރޫޕް ލީޑަރ އަދި ކިނބިދޫ ދާއިރާގެ މެމްބަރު އަބްދުﷲ ރިޔާޒު ވިދާޅުވެއްޖެއެވެ.
ރިޔާޒް ވިދާޅުވީ ޖަލްސާ ބޭއްވޭނީ ޖަލްސާ ބޭއްވުމަށް ބޭނުންވާ ގާނޫނީ އަދަދު ކަމަށްވާ 43 މެމްބަރުންގެ ސޮއި ލިބިއްޖެނަމައެވެ. އަދި ސޮއި ހަމަނުވެއްޖެނަމަ، ޖަލްސާ ނޯންނާނެ ކަމަށް ރިޔާޒްވަނީ ވިދާޅުވެފައެވެ.
ރައްޔިތުން އަމަލުކުރުން ލާޒިމު ގާނޫނެއް ފާސްކުރާއިރު، މަޖިލީހުގެ އަޣުލަބިއްޔަތު މެމްބަރުންކަމުގައިވާ 43 މެމްބަރުން ހާޒިރުވެ ތިބެންޖެހެ އެވެ.
ޖަލްސާ ބޭއްވުމަށް އެންމެ ހަތް ދުވަހަށް ވެފައިވާއިރު، އަދިވެސް މެމްބަރުންގެ ސޮއި ހަމަވެފައިނުވަނީ ކީއްވެތޯ، ރާއްޖެ އެމްވީން ސުވާލުކުރުމުން ރިޔާޒް ވިދާޅުވީ، ސޮއި ލިބިފައިނުވަނީ ގިނަ މެމްބަރުން މި ވަގުތު ރާއްޖޭގައި ނެތުމުން ކަމަށެވެ.
ސަރުކާރު ކޯލިޝަންގައި ހިމެނޭ އެންމެ ބޮޑު ސިޔާސީ ޕާޓީ ކަމަށްވާ އެމްޑީޕީއަށް ނިސްބަތްވެވަޑައިގަންނަވާ ބައެއް މަޖިލިސް މެމްބަރުން ބުނެފައިވަނީ، ޖަލްސާ ބޭއްވުމަށް ބޭނުންވާ މިންވަރަށް ސޮއި ލިބުމުގައި ދަތިތަކެއް ދިމާވެފައިވަނީ، ޕާޓީގެ މަޖިލިސް ޕްރައިމަރީގެ ކެމްޕޭންއަށް މެމްބަރުންތައް މާލޭން ބޭރުގައި އުޅުއްވާތީ ކަމަށެވެ.
ދެ ކޮމިޝަންގެ ބިލް ފާސްކުރުމަށް އެޖެންޑާކޮށްފައި އޮތީ މަޖިލީހުގެ މިއަހަރުގެ އެންމެ ފަހު ޖަލްސާއަށެވެ. ނަމަވެސް ޑިސެމްބަރު 15 ގައި ބޭއްވި އެ ޖަލްސާގައި އެ ބިލް ފާސްކުރަން ވޯޓަށް ނޭހީ، ވޯޓަށް އެހުމުގެ ކޯރަމް ހަމަވާ މިންވަރަށް މެމްބަރުން މާލަމުގައި ހާޒިރުވެ ނެތުމުންނެވެ.
މަޖިލީހުގެ ދައުރުން ބޭރުން ޖަލްސާއެއް ބާއްވަނީ ދެ ކޮމިޝަންގެ ބިލް ފާސްކުނުކޮށް ދައުރު ނިންމާލުމަކީ ކަންބޮޑުވެވަޑައިގަންނަވާ ކަމެއް ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެފައިވުމާއި، ކޯލިޝަންގައި ހިމެނޭ ހަތަރު ޕާޓީގެ ލީޑަރުން މިދިޔަ މަހުގެ 20 ގައި ހޮޓެލް ޖެންގައި ބޭއްވި ބައްދަލުވުމުގައި ކޮމިޝަންގެ ބިލް ފާސްކުރަން ދައުރުން ބޭރުގައި މަޖިލީހުގެ ޖަލްސާއެއް ބޭއްވުމަށް އެއްބަސްވެވަޑައިގެންފައިވާތީ އެވެ.
މަޖިލީހުގެ ގަވާއިދުގައިވާ ގޮތުން، ދައުރުން ބޭރުން ޖަލްސާއެއް ބާއްވާނަމަ މަޖިލީހުގެ ތިން ބައިކުޅަ އެއްބައި މެމްބަރުން ސަބަބު ބަޔާންކޮށް، ސޮއިކޮށް ރައްޔިތުންގެ މަޖިލީހަށް ހުށަހަޅަންޖެހެއެވެ. މި ގޮތަށް ހުށަހަޅާތާ 14 ދުވަހުގެ ތެރޭގައި ޖަލްސާ ބޭއްވޭނެ ގޮތް މަޖިލީހުން ހަމަޖައްސައިދޭން ޖެހެއެވެ. ތިން ބައިކުޅަ އެއްބަޔަކީ މަޖިލީހުގައި ހިމެނޭ 85 މެމްބަރުންގެ ތެރެއިން 29 މެމްބަރުންނެވެ.
