އެސްޓީއޯއިން ވިއްކާ ޕެޓްރޯލާއި ޑީސަލްގެ އަގު ހެޔޮކޮށްފިއެވެ.
އެސްޓީއޯ އިން ބުނީ ތެޔޮ ވިއްކާ އަގު ހެޔޮކުރަން އެސްޓީއޯ އިން ނިންމީ ދުނިޔޭގެ ބާޒާރުގައި ތެލުގެ އަގު ހެޔޮވުމާއި ގުޅިގެން ކަމަށެވެ. އެގޮތުން ޖެނުއަރީ 14 ވަނަ ދުވަހުން ފެށިގެން ޑީސަލް ލީޓަރެއް 9.99ރ އަށް، އަދި ޕެޓްރޯލް ލީޓަރެއް 10.19ރ އަށް ހެޔޮވެފައިވާ ކަމަށެވެ.
މީގެ ކުރިން ޑީސަލް ލީޓަރެއް ވިއްކަމުން ދިޔައީ 11.99ރ އަށެވެ. އެހެންކަމުން މިހާރު ޑީސަލް ލީޓަރަކުން ހެޔޮވެފައިވަނީ 2ރ އެވެ. އަދި ޕެޓްރޯލް ލީޓަރެއް މީގެކުރިން 11.19ރ އަށް ވިއްކަމުންދިޔައިރު ލީޓަރަކުން މިހާރު ހެޔޮވެފައިވަނީ 1ރ އެވެ.
މީހުން ދިރިއުޅޭ ރަށްރަށުގައި ހުންނަ ޕެޓްރޯލާއި ޑީސަލް ވިއްކާތަންތަން 24 ގަޑިއިރު ހުޅުވާފައި ބެހެއްޓޭ ގޮތަށް ސަރުކާރުން ވަނީ މިދިޔަ އަހަރުގެ ޑިސެމްބަރު މަހު ހުއްދަ ދީފިއެވެ. އިމްޕޯޓު މުދަލުގެ ވިޔަފާރިކުރުމުގެ ގަވާއިދަށް އިސްލާހު ގެނެސް އިކޮނޮމިކް މިނިސްޓްރީ އިން ޑިސެމްބަރު މަހުގެ 4 ވަނަ ދުވަހު ދުވަހު ގެޒެޓްކޮށްފައިވާއިރު އެ ގަވާއިދަށް ގެނައި އިސްލާހުގައިވާ ގޮތުން މީހުން ދިރިއުޅޭ ރަށްރަށުގައި ހުންނަ ޕެޓްރޯލާއި ޑީސަލް ވިއްކާ ތަންތަން 24 ގަޑިއިރު ހުޅުވާފައި ބެހެއްޓިދާނެއެވެ. އެކަމަކު އެއީ ކަމާބެހޭ ގާނޫނުތަކާއި ގަވާއިދުތަކުގެ ދަށުން ސަރުކާރުގެ ހުއްދަ ލިބިފައިވާ ތަންތަނަށް ވާންޖެހޭނެ ކަމަށް އެ އިސްލާހުގައިވެއެވެ.
