ނާސްތާ ޕްރޮގްރާމާ އެކު ދިރާސީ އާ އަހަރުގެ ކިޔެވުން ފަށައިފި
ދިރާސީ އާ އަހަރު ފެށީ 70،000 ވުރެ ގިނަ ދަރިވަރުންނާ އެކު
ހެނދުނުގެ ނާސްތާ
ސަރުކާރުގެ ނާސްތާ ޕްރޮގްރާމްގެ އިފްތިތާހުކޮށް، ހަތްދިހަހާހަށް ވުރެ ގިނަ ދަރިވަރުންނާ އެކު ދިރާސީ އާ އަހަރުގެ ކިޔެވުން ފަށައިފިއެވެ.
ރާއްޖޭގެ 213 ސްކޫލުގެ ތެރެއިން މިއަހަރު ނާސްތާ ޕްރޮގްރާމް ފަށާފައި ވަނީ 25 ސްކޫލެއްގައެވެ.
ތަޖުރިބާ ކުރުމުގެ ޕްރޮގްރާމެއްގެ ގޮތުގައި ނާސްތާ ޕްރޮގްރާމް އިފްތިތާހު ކުރުމުގެ ރަސްމިއްޔާތު ބާއްވާފައި ވަނީ އާދީއްތަ ދުވަހުގެ ހެނދުނު އަމީނިއްޔާ ސްކޫލުގައެވެ. އެ ޕްރޮގްރާމް ފައްޓަވައި ދެއްވީ ނައިބު ރައީސް ފައިސަލް ނަސީމެވެ.
އެ ޕްރޮގްރާމްގައި އިފްތިތާހުކޮށްދެއްވުމުން ނައިބު ރައީސް ފައިސަލް ނަސީމު ވިދާޅުވީ ދުވަހަކު ވެސް ތައުލީމަށް ހަރަދު ނުކުރާ މިންވަރަށް ސަރުކާރުން ތައުލީމަށް ހޭދަ ކުރައްވާނެ ކަމަށެވެ.
އާދީއްތަ ދުވަހު ދިރާސީ އާ އަހަރުގެ ކިޔެވުން ފެށިއިރު، ހެނދުނު ދަންފަޅީގައި ކިޔަވާ 25 ސްކޫލެއްގެ 14،000 ވުރެ ގިނަ ދަރިވަރުންނަށް ސަރުކަރުން ވަނީ ނާސްތާ ދީފައެވެ. ގިނަ ދަރިވަރުންނަށް ނާސްތާ ދީފައި ވަނީ ކިޔެވުން ފެށުމުގެ ކުރިން ކްލާސް ރޫމުގައެވެ. ދަރިވަރުންނަށް ނާސްތާ ދިނުމަށް ބަޖެޓުގައި 50 މިލިއަން ރުފިޔާ ވަނީ ހިމަނައިފައެވެ.
ޔުނިސެފްގެ އެހީއާ އެކު މިނިސްޓްރީން ވަނީ ނާސްތާއަށް 10 މެނޫއެއް ވެސް ތައްޔާރުކޮށްފަ އެވެ. އޭގެ ތެރޭގައި ރޮއްޓާއި ބިސްގަނޑާއި ކިރާއި ތަރުކާރީ މަސްހުންޏާއި ބަރަބޯ މަސްހުންޏާއި ސޭންޑްވިޗް ފަދަ ތަކެތި ހިމެނެ އެވެ. ދަރިވަރުންނަށް ކޮންމެ ދުވަހަކު ވެސް އޭގެ ތެރެއިން ތިން މެނޫއެއް އޮންނާނެ އެވެ.
