މި އަހަރުގެ އެޕްރީލު މަހު ބާއްވާ ރައްޔިތުންގެ މަޖިލީހުގެ އިންތިޚާބުގައި އެމްޑީޕީގެ ފަރާތުން ކުރިމަތިލާނެ ކެންޑިޑޭޓުން ހޮވުމަށް ބާއްވާ ޕްރައިމަރީގައި ވޯޓުލާ އެމްޑީޕީގެ މެންބަރުން، ރީރެޖިސްޓަރ ކުރުމަށް ހުޅުވާލުމުން ކުރިމަތިވި މައްސަލަތައް އެމްޑީޕީން ހުކުރު ދުވަހު ޙައްލުކޮށްފިއެވެ.
އެމްޑީޕީން ބުނީ އެ ޕާޓީގެ މެންބަރުން ރީރެޖިސްޓަރ ކުރުމަށް ދާއިރާގެ ރައީސުންނަށާއި ކެންޑިޑޭޓުންނަށް ދޫކުރި ޔޫސަރ ގެތެރެއިން ބައެއް ޔޫސަރއަށް، ނާޖާއިޒުގޮތުގައި ލޮގިންވެ، ވޯޓުލާތަން ބަދަލުކޮށްފައި ހުރިކަން ފާހަގަވެފައިވާ ކަމަށެވެ.

އެ މައްސަލާގައި ހުށަހެޅުނު ޝަކުވާތައް ބަލައި، ގާތްގަނޑަކަށް 2000 މެންބަރުންގެ ރީރެޖިސްޓްރޭޝަން ރަނގަޅު ތަނަށް ބަދަލުކުރެވުނުކަމަށެވެ. ޝަކުވާ ކޮމިޓީން މި މައްސަލަ މިހާރު ދަނީ ތަޙްޤީޤުކުރަމުން ކަމަށް އެ ޕާޓީން މައުލޫމާތުދެއެވެ.