ވޯޓުލާން ރަށްވެހިވެފައިވާ ތަން ބަދަލުކުރެވޭނީ 15 ޖެނުއަރީގެ ނިޔަލަށް: އީސީ
10 ޖެނުއަރީ 2019 | ބުރާސްފަތި 12:15ރާއްޖެއިން ބޭރު 8 ތަނެއްގައި ވޯޓު ފޮށި ބަހައްޓަން ވިސްނާ
އިލެކްޝަން ކޮމިޝަން ޕްރެސް
އަންނަ މަޖިލިސް އިންތިހާބުގައި ވޯޓުލާން ރަޖިސްޓްރީ ކޮށްފައިވާ ތަން ބަދަލުކުރެވޭނީ 15 ޖެނުއަރީގެ ނިޔަލަށް ކަމަށް އިލެކްޝަން ކޮމިޝަނުން ބުނެފިއެވެ.
އިލެކްޝަން ކޮމިޝަނުގެ އޮފީހުގައި ބުުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި އެ ކޮމިޝަނުގެ ރައީސް އަހްމަދު ޝަރީފް ވިދާޅުވީ، ވޯޓާރސް ލިސްޓް އާންމު ކުރުމަށް ފަހު ވޯޓުލުމަށް ކަނޑައެޅިފައިވާ ތަން ބަދަލުކުރުމަކީ ޤާނުނީ ގޮތުން ކުރެވޭނެ ކަމެއް ނޫން ކަމަށެވެ.
" އެހެންވީމާ އަޅުގަނޑުމެން އިއުލާނު ކުރުމުގެ ކުރިން ރަށްވެހި ވެފައިވާ ތަނުގެ ، ލިސްޓުގެ އަސްލެއްގެ ގޮތުގައި އަޅުގަނޑުމެން ނަގާނީ އައިޑީކާޑު ޔުނިޓުގައި ރަޖިސްޓްރީ ވެފައިވާ ތަން. އެގޮތުން 15 ޖެނުއަރީގެ ނިޔަލަށް ރަޖިސްޓްރީ ކުރުމަށް ، ރަޖިސްޓްރީ ބަދަލުކުރަން ބޭނުންވާ ފަރާތްތަކަށް ރަޖިސްޓްރީކޮށް ނިންމުމަށް، އަތޮޅުތަކަށާއި ސިޓީ ކައުންސިލު ތަކަށް އަޅުގަނޑުމެން ވާނީ މިހާރު އާންމުކޮށް ސިޓީއަކުން ދަންނަވާފައި،" ޝަރީފް ވިދާޅުވިއެވެ.
ޝަރީފް ވިދާޅުވީ، އެ މަސައްކަތްތައް ކުރިއަށްދާ ކަމަށް އައިޑީކާޑު ޔުނިޓުން މައުލޫމާތު ދީފައިވާ ކަމަށެވެ.
އޭގެ އިތުރުން، އޭޕްރިލް މަހު ބާއްވާ ރައްޔިތުންގެ މަޖިލިސް އިންތިހާބުގައި ރިސޯޓްތަކުގައި ވޯޓް ފޮށި ބެހެއްޓުމާ ގުޅޭ ގޮތުން އިލެކްޝަންސް ކޮމިޝަނުން މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީސް (މަޓީ) އާއި ޓޫރިޒަމް މިނިސްޓްރީއާ އެކު ވަނީ މަޝްވަރާ ކޮށްފައިވާ ކަމަށް ޝަރީފް ވިދާޅުވިއެވެ. އެގޮތުން ރިސޯރޓްތަކާއި، ސިނާއީ ރަށްތައް އަދި ޖަލުތަކުގައި ވޯޓު ލުމަށް 50 މީހުން ރީރަޖިސްޓްރީ ކޮށްފި ނަމަ އެ ތަންތަނުގައި ވޯޓު ފޮށި ބަހައްޓާނެ ކަމަށް ޝަރީފް ވިދާޅުވިއެވެ.
"މިފަހަރު ރާއްޖެއިން ބޭރުގަ އަޅުގަނޑުމެން ވޯޓު ފޮށި ބަހައްޓާނަން ކުރިއެކޭ ވެސް އެއްގޮތަށް. މިފަހަރު 150 މީހުން ރީ ރަޖިސްޓަރ ކޮށްފި ނަމަ އަށް ތަނެއްގައި ވޯޓް ފޮށި އެބަ ބަހައްޓަން. އަދި އެއާ އެކު ރިސޯޓްތަކާއި ސިނާއީ ރަށްތައް އަދި ޖަލު ވޯޓުފޮށި ބެހެއްޓޭނީ، ކުރީގަ ރިޔާސީ އިންތިހާބުގައި ބޭސްލައިނެއްގެ ގޮތުގައި ކަނޑައަޅާފައިވާނީ 100. ނަމަވެސް މިފަހަރު އަޅުގަނޑުމެން ކޮމިޝަނުން ނިންމާފައި މި ވަނީ އެތަންތަނުގައި 50 މީހުން ރީ ރަޖިސްޓްރީ ކުރާ ނަމަ އެތަންތަނުގައި ވޯޓު ފޮށި ބަހައްޓާނެ ކަމަށް" ޝަރީފް ވިދާޅުވިއެވެ.
މަޖިލިސް އިންތިހާބާ ގުޅޭ ގިނަ މައުލޫމާތުތަކެއް މިއަދުގެ ބައްދަލުވުމުގައި އިލެކްޝަނުން ހިއްސާކޮށްފައިވާއިރު، އެ ކޮމިޝަނުގެ ލޯގޯ އާއި ވޯރކިންގް ކިޓް ޑިޒައިން ކުރަމުންދާ ކަމަށާއި، ޕްރައިމަރީ ކުލައެއްގެ ގޮތުން ދަނބުކުލަ އަދި މިހާރު ވެސް ބޭނުންކުރާ ޓާރކިޝް ބްލޫ ހިިމެނޭ ކަމަށް ޝަރީފް ވިދާޅުވެފައި ވެއެވެ. އަދި އެ ކުލަތައް ފާސްވުމާ އެކު، އެއްވެސް ސިޔާސީ ޕާރޓީއެއްގެ ލޯގޯގައި އެ ކުލަ ބޭނުން ނުކުރެވޭނެ ކަމަށް ވެސް ޝަރީފް ވިދާޅުވިއެވެ.
