ފެބްރުއަރީ 7 ގައި މަޖިލީހުގެ ޖަލްސާތައް ފަށަނީ
10 ޖެނުއަރީ 2019 | ބުރާސްފަތި 10:40މި ޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރިޔާސީ ބަޔާން އިއްވާވާނެ
ރައްޔިތުންގެ މަޖިލިސް
މި އަހަރުގެ މަޖިލީހުގެ ފުރަތަމަ ދައުރުގެ ފުރަތަމަ ޖަލްސާ، ފެބްރުއަރީ މަހުގެ 7 ވަނަ ދުވަހު ބޭއްވުމަށް ހަމަޖައްސައިފިއެވެ.
ބުރާސްފަތި ދުވަހު މަޖިލީހުގެ އިދާރާއިން އިއުލާނު ކޮށްފައި ވަނީ ޖަލްސާ ބާއްވަން ހަމަޖެހިފައި ވަނީ ދަރުބާރުގޭގައި ކަމަށެވެ. އަދި މި ޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރިޔާސީ ބަޔާން އިއްވަވާނެ ކަމަށް ވެސް އެ އިދާރާއިން ވަނީ ބުނެފައެވެ.
މަޖިލީހުގެ ޖަލްސާއެއް އެއްމެ ފަހުން ބޭއްވީ ޑިސެމްބަރު މަހުގެ 15 ވަނަ ދުވަހުއެވެ. އެ ދުވަހު ވޯޓަށް އަހަން ތާވަލު ކޮށްފައި އޮތް ޕެންޝަނާ ބެހޭ ގާނޫނަށް ހުށަހަޅާފައިވާ އިސްލާހާއި، ބަރ އެސޯސިއޭޝަން އުފައްދަން ހުށަހަޅާފައިވާ ގާނޫނީ ހިދުމަތުގެ ބިލާއި، ރިޔާސީ ކޮމިޝަންތަކަށް ބާރު ދިނުމުގެ ބިލަށް މަޖިލީހުގެ ގަވައިދުގައި ބުނާ އަދަދަށް މެމްބަރުން ހާޒިރު ނުވެގެން ވޯޓެއް ނުނަގައެވެ.
މަޖިލީހުގައި ސަރުކާރުގެ އަޢްލަބިއްޔަތު އޮވެ، ބިލްތައް ފާސް ނުވުމުން ވަރަށް ގިނަ ބައެއްގެ ފާޑުކިޔުން އަމާޒުވިއެވެ. ނަމަވެސް މި ސަރުކާރުގެ ވައުދުތަކާއި ގުޅޭ ގިނަ ބިލްތަކެއް މަޖިލީހުގެ ދައުރު ނިމުމުގެ ކުރިން ފާސްކޮށްފައިވާ ކަން ވެސް ފާހަގަކޮށްލެވެއެވެ.
ރިޔާސީ ކޮމިޝަންތަކަށް ބާރު ދޭ ބިލް ފާސްކުރުމަށް ދައުރުން ބޭރު ޖަލްސާއެއް ބޭއްވުމަށް ލީޑަރުންގެ މެދުގައި އެއްބަސްވެވުނު ނަމަވެސް މިހާތަނަށް ވެސް ޖަލްސާ ބާއްވާނެ ތާރީހެއް އިއުލާނުކޮށްފައެއް ނުވެއެވެ.
މި ފެށޭ ދައުރު ވެގެން ދާނީ މި ހިނގަމުންދާ މަޖިލީހުގެ އެއްމެ ފަހު ދައުރަށެވެ.
